ဖိလစ်ပိုင်သမ္မတ ဖာဒီနန်မားကို့စ်ဂျူနီယာသည် ၂၀၂၃ ခုနှစ် စက်တင်ဘာ ၅ ရက်က ဂျကာတာတွင်ကျင်းပသည့် ၄၃ ကြိမ်မြောက် အာဆီယံထိပ်သီးအစည်းအဝေးသို့တက်ရောက်ခဲ့စဉ်။ (ဓာတ်ပုံ – Mast Irham / POOL / AFP)
Inquirer.net
စစ်ရေးဝရုန်းသုန်းကားအခြေအနေအောက်တွင် ရှိနေသည့် မြန်မာကို ကူညီရန် အရှေ့တောင်အာရှ နိုင်ငံများအသင်း (အာဆီယံ) အနေဖြင့် အသင့်ရှိသင့်ကြောင်း ဖိလစ်ပိုင်သမ္မတ ဖာဒီနန် မားကို့စ် ဂျူနီယာက ဒီဇင်ဘာ ၁၇ ရက်တွင် ပြောသည်။
မားကို့စ်က အာဆီယံ-ဂျပန် ထိပ်သီးအစည်းအဝေး၏ ပထမဆုံးအခမ်းအနား၌ ပြောကြားစဉ် မြန်မာသည် အာဆီယံအုပ်စု၏ အဖွဲ့ဝင်တနိုင်ငံ ဖြစ်နေဆဲဖြစ်ကြောင်း အလေးပေး ပြောဆိုသည်။
ပဋိပက္ခ ဖိစီးနေသည့် မြန်မာနိုင်ငံအစား ဖိလစ်ပိုင်သည် ၂၀၂၆ အာဆီယံအလှည့်ကျဥက္ကဋ္ဌတာဝန်ကို လွှဲပြောင်းရယူထားသည်။
“ပါဝင်ပတ်သက်တဲ့ သက်ဆိုင်သူအားလုံးနဲ့ တက်တက်ကြွကြွ ဆက်ဆံပတ်သက်မှုကနေတဆင့် မြန်မာပြည်သူတွေရဲ့ အတိဒုက္ခနဲ့ ပိုပြီးဆိုးဝါးလာတဲ့ အကြမ်းဖက်မှုတို့ကို ကိုင်တွယ်ဖြေရှင်းဖို့ လိုတယ်ဆိုတာကို အသိအမှတ်မပြုဘဲနဲ့ ကျွန်တော်တို့ဟာ ကျွန်တော်တို့ ဒေသတွင်း ငြိမ်းချမ်းရေးနဲ့ တည်ငြိမ်မှုအကြောင်း ဆွေးနွေးလို့ မရနိုင်ပါဘူး” ဟု မားကို့စ်က ပြောသည်။
“ကျွန်တော်တို့ဘေးမှာ ရှိတဲ့ ထိုင်ခုံဟာ ခုထိ လူမရှိဘဲ ဖြစ်နေဆဲ ဆိုပေမယ့် မြန်မာဟာ အာဆီယံရဲ့ အဖွဲ့ဝင်တနိုင်ငံအဖြစ် ဆက်ရှိနေဆဲပါ။ မိသားစုတစုအနေနဲ့ ကျွန်တော်တို့ဟာ ဘုံသဘောတူညီချက်ငါးရပ်၊ ကုလသမဂ္ဂ လုပ်ထုံးလုပ်နည်းတွေနဲ့ AHA စင်တာ (လူသားချင်းစာနာမှု အကူအညီများအတွက် အာဆီယံ ညှိနှိုင်းဆောင်ရွက်ရေးစင်တာ) တို့ကနေတဆင့် မြန်မာရဲ့ အခြေအနေကို သက်သာရာရစေအောင် ကူညီပေးဖို့အသင့်ရှိနေသင့်ပါတယ်” ဟု ၎င်းက ပြောသည်။
၂၀၂၁ ခုနှစ်က မြန်မာရှိ ပဋိပက္ခကို ကိုင်တွယ်ဖြေရှင်းရေး ဘုံသဘောတူညီချက်ငါးရပ်ကို အာဆီယံခေါင်းဆောင်များက သဘောတူခဲ့ကြသည်။ ထိုသဘောတူညီချက်များထဲတွင် မြန်မာ၌ အကြမ်းဖက်မှုတို့ ချက်ချင်းရပ်ဆိုင်းရေး တောင်းဆိုချက်လည်း ပါဝင်သည်။
ယင်းနောက် သုံးနှစ်သာ ကြာလာသော်လည်း မြန်မာသည် ပဋိပက္ခတိုက်ပွဲများကြောင့် ထိခိုက်ခံစားနေရဆဲဖြစ်သည်။
