ပုံအညွှန်း-YGF ထံသို့ ခိုလှုံလာသည့် ရဲတပ်ကြပ် နှင့် ၎င်းယူဆောင်လာသည့် လက်နက်ခဲယမ်းများ
မွန်ပြည်နယ်၊ ရေးမြို့နယ်၊ ခေါဇာမြို့နယ်ခွဲ ရဲစခန်းမှ ရဲတပ်ကြပ်အဆင့်ရှိသူသည် လက်နက်အပြည့်အစုံဖြင့် ယနေ့ နိုဝင်ဘာ ၂၅ ရက်နေ့တွင် ခိုလှုံလာကြောင်း ရေးပြောက်ကျားတပ်ဖွဲ့ YGF က ထုတ်ပြန်သည်။
YGFထံ ခိုဝင်လာသူမှာ အသက် ၅၅ နှစ်အရွယ်ရှိ ရဲတပ်ကြပ် မင်းနောင် ဆိုသူဖြစ်ပြီး “စစ်ကောင်စီသည် ပြည်သူများကို အကြောင်းမဲ့ သတ်ဖြတ်နေသည်ကို မနှစ်မြို့ခြင်း၊ ပြည်သူများ၏ အိုးအိမ်စည်းစိမ််များကို မီးရှို့ဖျက်ဆီးခြင်း၊ မတရားသိမ်းဆည်းခြင်း၊ ခိုးယူလုယက်ခြင်းကို ရွံရှာပြီး အာဏာရှင်စနစ်အတွက် ကျွန်သဖွယ် လုပ်ကိုင်ရသည်ကို မုန်းတီးခြင်းတို့ကြောင့် CDM ပြုလုပ်ရခြင်းဖြစ်သည်”ဟု ၎င်းက ဝန်ခံပြောဆိုကြောင်း YGF ၏ ထုတ်ပြန်ချက်တွင် ဖော်ပြထားသည်။
၎င်းသည် ရဲတပ်ဖွဲ့ဝင်အဖြစ် ၃၂ နှစ် တာဝန်ထမ်းဆောင်ခဲ့ပြီး စစ်ကောင်စီလက်အောက်တွင် တာဝန်ဆက်လက် မထမ်းဆောင်လိုသဖြင့် G3 သေနတ် တလက်၊ ကျည်ဘောက်နှစ်ခု၊ ကျည် ၁၀၀ တောင့် နှင့်အတူ YGF တပ်ဖွဲ့ထံ ဆက်သွယ်ကာ ခိုလှုံလာခြင်းဖြစ်ကြောင်း YGF တာဝန်ခံ ဗိုလ်ကျန်ရစ်က ပြောသည်။
![](https://bur.mizzima.com/wp-content/uploads/2023/12/signal-2023-11-25-165850_002.jpg)
“ဒါရေးမြို့နယ်မှာ ပထမဆုံး လက်နက်အပြည့်အစုံနဲ့ CDM လုပ်တာပါ။ အခုက သူတို့(ရဲနှင့် စစ်ကောင်စီတပ်သား)ရဲ့ နောက်ဆုံးအခွင့်အရေးပဲ။ အချိန်ရှိတုန်းမှာ အမြန်ဆုံး ပြည်သူတွေနဲ့ ပူးပေါင်းပေးကြပါ” ဟု YGF တာဝန်ခံ ဗိုလ်ကျန်ရစ်က တိုက်တွန်းပြောဆိုထားသည်။
CDM ပြုလုပ်မည့် စစ်ကောင်စီတပ်ဖွဲ့ဝင်များ၊ ရဲတပ်ဖွဲ့ဝင်များနှင့် ပြည်သူ့စစ်တပ်ဖွဲ့ဝင်များကို လှိုက်လှဲနွေးထွေးစွာ ကြိုဆိုမည့်အပြင် လုံခြုံရေးကိုလည်း အပြည့်အဝ တာဝန်ယူသွားမည်ဟု YGF က ထုတ်ပြန်ထားသည်။
စာတည်း။ ။ ဖူးသိမ်ကျ
စာမူတည်းဖြတ်။ ။အောင်ကျော်ဖြိုး