မန်ချက်စတာယူနိုက်တက်မှာ ဗြိတိန်ဘီလျံနာ ဂျင်မ်ရက်ကလစ်ဖ်ရဲ့ ရှယ်ယာ ၂၅ ရာခိုင်နှုန်း ဝယ်ယူ မှုကို အင်္ဂလန်ဘောလုံးအဖွဲ့ချုပ် (FA)မှ အတည်ပြုလိုက်ပြီဖြစ်ပါတယ်။
ရက်ကလစ်ဖ်ရဲ့ သဘောတူညီချက်ဟာ ပရီးမီးယားလိဂ်ရဲ့ ထောက်ခံမှုကို တနင်္လာနေ့ညနေပိုင်းမှာ ရရှိခဲ့ပြီး အခုအခါ FA ကလည်း သူ့ရဲ့ ရင်းနှီးမြှုပ်နှံမှုအတွက် မီးစိမ်းပြခဲ့တာပါ။
ရက်ကလစ်ဖ်ဟာ အိုးထရက်ဖို့ဒ်ဘုတ်အဖွဲ့အခန်းမှာ သူ့နေရာကနေ တစိတ်တပိုင်းဦးဆောင်ဖို့ နီးစပ်လာတာနဲ့အမျှ FA ရဲ့ အတည်ပြုချက်ကို “ရရှိထားပြီးဖြစ်တယ်”လို့ US Securities and Exchange Commission ရဲ့ ထုတ်ပြန်ချက်မှာ ဖော်ပြခဲ့ပါတယ်။
အမှတ်ပေးချိန်ပီယံဖလား အကြိမ် ၂၀ ရထားတဲ့ အသင်းရဲ့ ဘောလုံးလုပ်ငန်းလည်ပတ်မှုတွေကို ထိန်းချုပ်နိုင်စေမယ့် ရက်ကလစ်ဖ်ရဲ့ ရင်းနှီးမြှုပ်နှံမှုဟာ Class A ရှယ်ယာတွေအတွက် တင်ဒါကမ်းလှမ်းမှု အပြီးသတ်မပြီးမချင်း အထမြောက်နိုင်ဦးမှာ မဟုတ်ပါဘူး။
Class A အစုရှယ်ယာပိုင်ဆိုင်သူတွေဟာ ၎င်းတို့ရဲ့ ရှယ်ယာတွေကို ရောင်းချဖို့ တင်ဒါခေါ်ယူတဲ့ ကာလကို ဖေဖော်ဝါရီ ၁၄ ရက်မှ ဖေဖော်ဝါရီ ၁၆ ရက် မွန်းလွဲ ၂၃ နာရီ ၅၉ မိနစ်အထိ တိုးမြှင့်ခဲ့ပါတယ်။
INEOS ဥက္ကဋ္ဌ ရက်ကလစ်ဖ်ဟာ လူကြိုက်မများတဲ့ ပိုင်ရှင်တွေဖြစ်တဲ့ ဂလေဇာမိသားစုထံကနေ ယူနိုက်တက်ရဲ့ ရှယ်ယာ ၂၅ ရာခိုင်နှုန်းကို စတာလင်ပေါင် ၁.၀၂ ဘီလီယံ (ဒေါ်လာ ၁.၃ ဘီလီယံ) ဝန်းကျင်တန်ဖိုးဖြင့် ဝယ်ယူဖို့ သဘောတူခဲ့ကြောင်း ခရစ္စမတ်အကြိုနေ့မှာ ကြေညာခဲ့ပါတယ်။
ရက်ကလစ်ဖ်ဟာ ကလပ်ရဲ့ အခြေခံအဆောက်အအုံအတွက် နောက်ထပ် ပေါင် ၂၃၈ သန်းကို ရင်းနှီးမြှုပ်နှံမှာလည်းဖြစ်ပါတယ်။
အသက် ၇၁ နှစ်အရွယ် ရက်ကလစ်ဖ်က ရင်းနှီးမြှုပ်နှံမှု လုပ်ငန်းစဉ်တွေ ပြီးစီးလုနီးဖြစ်တာကြောင့် မကြာသေးခင် ရက်တွေအတွင်းက ကလပ်အသင်းဝန်ထမ်းတွေ၊ လုပ်ဖော်ကိုင်ဖက်တွေနဲ့ တွေ့ဆုံမှုတွေ ဆက်တိုက်ပြုလုပ်ခဲ့ပါတယ်။
ရက်ကလစ်ဖ်ဟာ လွတ်လပ်တဲ့ Manchester United Supporters’ Trust ခေါင်းဆောင်တွေနဲ့ တွေ့ဆုံခဲ့ပြီး ထရက်ဖို့ဒ်ကောင်စီရဲ့ အကြီးတန်း ကိုယ်စားလှယ်တွေ၊ ဂရိတ်တားမန်ချက်စတာမြို့တော်ဝန် အန်ဒီ ဘန်ဟမ်အပါအဝင် ဒေသခံ ခေါင်းဆောင်တွေနဲ့ စကားပြောဆိုခဲ့ပါတယ်။
ငယ်ဘဝ ယူနိုက်တက်ပရိသတ်တဦးဖြစ်တဲ့ ရက်ကလစ်ဖ်ဟာ ပြီးခဲ့တဲ့အပတ်က မြူးနစ်လေကြောင်းဖြစ်ရပ်ဆိုး အောက်မေ့ဖွယ်အခမ်းအနားသို့ တက်ရောက်သူတွေမှာထဲလည်း ပါဝင်ခဲ့ပါတယ်။
ပရီးမီးယားလိဂ်ချန်ပီယံကို ၂၀၁၃ မှာ နောက်ဆုံးရရှိခဲ့တဲ့ အသင်းတသင်းအတွက် ခက်ခဲတဲ့ ရာသီတခု ပြီးဆုံးတဲ့အခါ ရက်ကလစ်ဖ်ဟာ ယူနိုက်တက် လူစာရင်းရဲ့ ပြန်လည်ဖွဲ့စည်းမှုကို ဦးဆောင်ဖို့ စီစဉ်နေပြီလို့ သတင်းတွေ ထွက်ပေါ်လျက်ရှိပါတယ်။
