TNLA ဗိုလ်မှူးချုပ်တာဘုန်းကျော်နှင့် အဖွဲ့ဝင်အချို့ ဖေဖော်ဝါရီလအတွင်းက နမ့်ခမ်းမြို့သို့ သွားရောက်စဥ် (ဓါတ်ပုံ -TNLA သတင်းနှင့်ပြန်ကြားရေးဌာန)
001
(မဇ္ဈိမ) ။ ။ ရှမ်းပြည်နယ်မြောက်ပိုင်း မန်တုံ၊ နမ္မတူနှင့် ကွတ်ခိုင်မြို့တို့တွင် ကချင်လွတ်လပ်ရေးတပ်မတော် (KIA) နှင့် တအာင်းအမျိုးသားလွတ်မြောက်ရေးတပ် (TNLA)တို့အကြား ပြဿနာကြီးထွားလာမှုကို ကြားဝင်ဖြေရှင်းပေးရန် TNLA က တိုင်းရင်းသားလက်နက်ကိုင် ခုနှစ်ဖွဲ့ပါဝင်သည့် FPNCC ထံသို့ TNLAက တောင်းဆိုထားသည်။
“တအာင်းပြည်အတွင်း စစ်ဘေးဒဏ်ကြာရှည်ခံစားနေရသည့် မိဘပြည်သူများကို စာနာနားလည်ကာကွယ်ပေးနိုင်ရန်အတွက် တအာင်းပြည်အတွင်း အခြားလက်နက်ကိုင်တပ်ဖွဲ့များနှင့် ပေါ်ပေါက်နေသည့် ပြဿနာများကို ကြားဝင်ဖြေရှင်းပေးပါရန် အထူးမေတ္တာ ရပ်ခံတောင်းခံတင်ပြအပ်ပါသည်”ဟု FPNCC ထံ မေလ ၃၁ရက်က TNLA ပေးပို့သည့်စာတွင် ဖော်ပြထားသည်။
လက်ရှိတွင် KIA ၏ လုပ်ရပ်များကြောင့် TNLA အောက်ခြေတပ်ဖွဲ့များနှင့် မကြာခဏ ပွတ်တိုက်မှုများဖြစ်ပွားလျက်ရှိပြီး နှစ်ဖက်အဖွဲ့အစည်း၏ ပြဿနာမှာ ထိန်းသိမ်းရန်ခက်ခဲသည့် အခြေအနေသို့ရောက်ရှိလာဖြစ်ကြောင်းလည်းပါရှိသည်။
ရှမ်းပြည်နယ်မြောက်ပိုင်းတွင် ညီနောင်မဟာမိတ်သုံးဖွဲ့က ၂၀၂၃ခုနှစ်၊ အောက်တိုဘာလ ၂၇ရက်မှစတင်၍ ဆင်နွှဲခဲ့သည့် ၁၀၂၇ စစ်ဆင်ရေးအတွင်း TNLA က နမ့်ခမ်း၊ ကွတ်ခိုင်၊ မန်တုံ၊ နမ္မတူ၊ နမ့်ဆန်၊ မိုင်းငေါ့နှင့် မိုင်းလုံစသည့် မြို့ခုနှစ်မြို့ကို သိမ်းပိုက်ရရှိထားသည်။
လက်ရှိတွင် မန်တုံ၊ နမ္မတူနှင့် ကွတ်ခိုင်ဒေသတို့တွင် TNLA ၏ အုပ်ချုပ်ရေး၊ ပညာရေး၊ကျန်းမာရေးလုပ်ငန်းများနှင့် ပတ်သက်ပြီး မဟာမိတ်အဖွဲ့ဖြစ်သည့် KIA က နှောင့်ယှက်ဟန့်တားမှုများကို ပုံစံအမျိုးမျိုးဖြင့် ပြုလုပ်လျက်ရှိကြောင်း TNLA က ပြောထားသည်။
ထို့ပြင် KIA အနေဖြင့် ဒေသခံပြည်သူလူထုများအပေါ် အခွန်မတရားတိုးမြှင့်ကောက်ခံခြင်း၊ ဖမ်းဆီးခြင်း၊ အတင်းအဓမ္မစစ်သားစုဆောင်းခြင်းနှင့် နယ်မြေဒေသအပေါ် အမျိုးမျိုးစိုးမိုးခြယ်လှယ်ခြင်းတို့ကိုလည်း ဆောင်ရွက်လျက်ရှိကြောင်း TNLA က စွပ်စွဲထားသည်။
လတ်တလောတွင်လည်း TNLA၏ စီမံခန့်ခွဲမှုအောက်ရှိ မန်တုံမြို့နယ် အွည်လော-မိုင်းဘော်ဒေသမှ ဘော်ဟိုကျန့် သတ္တုတွင်းလုပ်ငန်းကို KIAမှ လုပ်ငန်းများ ရှေ့ဆက်မလုပ်နိုင်အောင် အမျိုးမျိုးနှောင့်ယှက်ပိတ်ဆို့နေကြောင်းလည်း ဖော်ပြထားသည်။
TNLA အနေဖြင့် ၎င်းတို့ဒေသအား အမျိုးမျိုးနှောင့်ယှက်သူများကို တွေ့ဆုံဆွေးနွေးညှိနှိုင်းခြင်း နည်းလမ်းဖြင့် အလေးထားဆောင်ရွက်သွားမည်ဖြစ်ကြောင်းလည်း ဆိုထားသည်။
ဝတပ်ဖွဲ့ UWSA ကဦးဆောင်ဖွဲ့စည်းထားသည့် ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ (FPNCC) တွင် KIA ၊ TNLA ၊ MNDAA ၊ NDAA ၊ SSPP နှင့် AA တို့ ပါဝင်သည်။
လက်ရှိ FPNCC ကို ကြားဝင်ဖြေရှင်းပေးရန် TNLA ၏ တောင်းခံထားမှုနှင့်ပတ်သက်ပြီး KIO သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူက “အခုလောလောဆယ်ကတော့ စာပဲတွေ့ရတာ။ ကျွန်တော်တို့ KIO ဗဟိုကော်မတီရဲ့ တုံ့ပြန်ချက်တွေပေါ့နော်။ ဘာမှမရှိသေးဘူး။ ဒါကြောင့် ကျွန်တော်တို့ သတင်းဌာန အနေနဲ့တော့ ဘာမှ ပြောစရာမရှိသေးပါဘူး။ မနက်ဖြန် သဘက်ခါ KIO ဗဟိုကော်မတီရဲ့ ဘယ်လိုတုံ့ပြန်မယ်ဆိုတဲ့ဟာရှိလို့ရှိရင်တော့ ပြောပြလို့ရပါတယ်” ဟု ဆိုသည်။
ပြီးခဲ့သည့် ဧပြီလထဲတွင် ကွတ်ခိုင်မြို့တွင် ဖွင့်လှစ်ထားသည့် KIA ဆက်ဆံရေးရုံးကို ပိတ်သိမ်းရန် TNLAက သတိပေးမှုများ၊ ဖေဖော်ဝါရီလထဲတွင်လည်း ကချင်အမျိုးသားတော်လှန်ရေးနေ့အခမ်းအနားကျင်းပရန် ကွတ်ခိုင်မြို့ထဲတွင် KIAက အလံလွှင့်ထူခဲ့မှုကို TNLAက တားမြစ်ခြင်းများရှိခဲ့သည်။
နှစ်ဖက်တပ်ဖွဲ့ကြား ပဋိပက္ခမဖြစ်ရန်နှင့် ထာဝရမဟာမိတ်သဘောတူစာချုပ်ကို ဆက်လက်အသိအမှတ်ပြုထိန်းသိမ်းသွားရန် ၂၀၂၃ခုနှစ်၊မေလက ကချင်ပြည်နယ်၊ မိုင်ဂျာယန်ဒေသ၌ KIA နှင့် TNLA မှ နှစ်ဖက်ကိုယ်စားလှယ်များတွေ့ဆုံဆွေးနွေး သဘောတူခဲ့ကြသည်။KIO ဥက္ကဋ္ဌ ဗိုလ်ချုပ်ကြီးအင်ဘန်လကလည်း တော်လှန်ရေးအဖွဲ့အချင်းချင်း ပွတ်တိုက်မှုများကို စစ်ရေးဖြင့်ဖြေရှင်းရန်ဆန္ဒမရှိဘဲ သမိုင်းကြောင်းအခြေခံပြီးဆွေးနွေးဖြေရှင်းရန်ဆန္ဒရှိကြောင်း ဖေဖော်ဝါရီ လ၅ရက်တွင် ကျရောက်သည့် KIAတည်ထောင်ခြင်း(၆၃)နှစ်ပြည့်နေ့ မိန့်ခွန်း၌ ထည့်သွင်းပြောကြားခဲ့သည်။
ရှမ်းပြည်နယ်မြောက်ပိုင်းတွင် KIA ၊ TNLA ၊ ရှမ်းပြည်တိုးတက်ရေးပါတီ/ရှမ်းပြည်တပ်မတော် (SSPP/SSA)နှင့် ကိုးကန့်တပ် (MNDAA)တို့ အဓိက လှုပ်ရှားနေပြီး အဆိုပါအဖွဲ့များအကြား နယ်မြေအငြင်းပွားမှုများ ရှိနေသည်။
လက်ရှိ နမ့်ခမ်းမြို့တွင်လည်း TNLA နှင့် SSPP တို့အကြား နယ်မြေအငြင်းပွားမှုကြောင့် တင်းမာမှုများ ဖြစ်ပွားနေကြောင်း သိရသည်။
စာတည်း – အေးချမ်း
