အမ်းမြို့အဝင် ပဲပဒုံစစ်ဆေးရေးဂိတ်(ဓါတ်ပုံ-CJ)
ဓါတု
(မဇ္ဈိမ)။ ။ မင်းဘူး-အမ်းအဝင် ပဲပဒုံစစ်ဆေးရေးဂိတ်တွင် ဆက်ကြေးကောက်သည့်ကိစ္စ သတင်းပေါက်ကြား၍ဟုဆိုကာ အမ်းမြို့နယ်အုပ်ချုပ်ရေးမှူးက ကုန်သည်များအား ကုန်စည်တင်သွင်းခွင့် တလ ပိတ်ခဲ့ကြောင်း ထွေအုပ်ရုံးဝန်ထမ်းတဦးက ဆိုသည်။
မကွေးတိုင်းမှ ရခိုင်ပြည်နယ် အမ်းမြို့သို့အဝင် ပဲပဒုံပူးပေါင်းစစ်ဆေးရေးဂိတ်တွင် တာဝန်ကျသည့် အမ်းမြို့မရဲစခန်းမှ ရဲအုပ်ဇာနည်ထွန််းက ကုန်သည်နှင့်ယာဥ်မောင်းများထံမှ KBZ Pay အကောင့်ဖြင့် ငွေကျပ် သိန်းနှင့်ချီတောင်းခံသည်ဟု မဇ္ဈိမက သတင်းဖော်ပြခဲ့ခြင်းဖြစ်သသည်။
အမ်းမြို့နယ်အုပ်ချုပ်ရေးမှူး ဦးစိုးမင်းထက်က ယမန်နေ့ (ဇူလိုင်လ ၁ရက်နေ့ )နေ့လယ် ၁ နာရီတွင် ကုန်သည်များအားတွေ့ဆုံပြီးနောက် ယင်းကဲ့သို့ငွေကြေးတောင်းခံမှုမှာမဟုတ်မှန်ကြောင်း အတင်းကြပ်ဖိအားပေးလက်မှတ်ရေးထိုးခိုင်းခဲ့သည်ဟုလည်း သိရသည်။
“သူတို့တွေ ( မြို့နယ်အုပ်ချုပ်ရေးမှူး၊ ရဲအုပ်ဇာနည်ထွန်း) တို့ Kpay နဲ့ ငွေတောင်းခဲ့တာရှိပါတယ် ။ဟုတ် ၊ မဟုတ်သူတို့ ဖုန်းနံပါတ် နဲ့ ဖွင့်ထားတဲ့ Kpay နံပါတ်ကို စစ်ကြည့်ရင်သိနိုင်ပါတယ် ။ ဟိုနေ့က မဇ္စျိမသသတင်းမှာ ပါလာတော့ သတင်းဌာနထဲမှာပါသလို Kpay နဲ့လွှဲတာမဟုတ်ဘူး၊ သတင်းဌာနကမမှန်မကန်ရေးသားဖော်ပြတာပေါ့ ငွေတောင်းခံခြင်းမရှိပါဘူး ဆိုပြီးလက်မှတ်ရေးထိုးခိုင်းတယ် အထက်ကို report(အစီရင်ခံစာ) တင်ဖို့ပေါ့။ ပြီးတော့ လူသုံးကုန် နဲ့ စားကုန်တင်သွင်းခွင့်တလပိတ်တယ် ဆိုပြီး ပြောတယ်။သူတို့ ထွေအုပ်ကပဲစားကုန်တွေ တင်သွင်းပြီး ရပ်ကွက်ထဲပြန်ဖြန့်မယ်ပေါ့”ဟု၎င်းက ပြောသည်။
အဆိုပါ ပဲပဒုံစစ်ဆေးရေးဂိတ်တွင် ပြီးခဲ့သည့် ဧပြီလကထွက်ပြေးသွားသည့် ဗိုလ်မှူးထင်လင်းမော်နေရာတွင် ရဲအုပ်ဇာနည်ထွန်းကတာဝန်ကျပြီးနောက် အထက်ကမသိစေရန် ၎င်း၏ KBZ pay နံပါတ်အား ကုန်သည်နှင့်ကုန်တင်ယာဥ်မောင်းများထံကြိုပေးထား၍ ဆက်ကြေးသွင်းရန် ငွေကြိုလွှဲခိုင်းခဲ့ခြင်းဖြစ်ကြောင်း ကုန်သည်များက မဇ္ဈိမကို ပြောကြားထားသည်။
မြို့နယ်အုပ်ချုပ်ရေးမှူးစိုးမင်းထက် နှင့် ရဲအုပ်ဇာနည်ထွန်းတို့ကို အထက်က စုံစမ်းစစ်ဆေးခြင်း မပြုလုပ်သည့်အကြောင်းရင်းမှာ ခရိုင်အုပ်ချုပ်ရေးမှူးနှင့် မြို့နယ်ရဲတပ်ဖွဲ့မှူး တို့မှကာကွယ်ပေးနေခြင်းဖြစ်ကြောင်းရဲနှင့်နီးစပ်သူတဦး၏အဆိုအရသိရသည်။
သို့သော် ယင်းဂိတ်တွင်ဆက်ကြေးတောင်းခဲ့သည့် ရဲအုပ်ဇာနည်ထွန်းကိုမူ ယနေ့ဇူလိုင်လ ၂ရက်တွင် တာဝန်ကျသည့်နေရာမှဖယ်ရှားပြီးနောက် ၎င်း၏နေရာတွင် ဒုရဲအုပ် စိုးပိုင်ရောက်ရှိလာကြောင်း၎င်းကဆိုသည်။
ယခုအခါ ကုန်စည်တင်သွင်းခွင့် တလပိတ်မည်ဖြစ်ပြီး မင်းဘူးမြို့မှ အမ်းမြို့သို့ ဆန်၊ဆီ၊ဆား၊ငရုတ်၊ကြက်သွန်စသည့် အခြေခံစားသောက်ကုန်များအား အထွေထွေအုပ်ချုပ်ရေးမှူးကကြီးကြပ်ကာ ကိုယ်တိုင်တင်သွင်းမည်ဖြစ်ကြောင်းသိရသည်။
၎င်းကဦးဆောင်စီမံ၍ ရပ်ကွက်အလိုက်အုပ်ချုပ်ရေးမှူးများနှင့်ပူးပေါင်းဖြန့်ဝေရောင်းချမည်ဖြစ်သည်။ အိမ်ထောင်စုအလိုက် ဖြန့်ဝေရောင်းချမည်ဖြစ်သောကြောင့် အရပ်သားပြည်သူများက သက်ဆိုင်ရာရပ်ကွက်ရုံးများတွင် တန်းစီဝယ်ရမည်ဖြစ်သည်။
ယင်းကဲ့သို့ရောင်းချပါက မြို့ခံပြည်သူများစျေးအဆမတန်ဝယ်ယူရနိုင်ချေရှိသော်ကြောင့် အခက်ကြုံလာရနိုင်သည်ဟု အမ်းမြို့ဒေသခံတဦးကဆိုသည်။
” စာရင်းထဲကတဝက်ပဲဖြန့်ပြီး ကျန်တဝက်ကို သူတို့နဲ့နီးစပ်တဲ့ကုန်သည်တွေကိုရောင်းမယ်။ ထွေအုပ်ကလုပ်ပိုင်ခွင့် ပိုရသွားတာပေါ့။ လာထုတ်တာအယောက် အိတ် ၁၀၀ ဆို အထက်ကိုပြဖို့ စာရင်းမှာ ၁၅၀ ပြပြီး ကျန် ၅၀ ကိုနီးစပ်တဲ့သူတွေကို မှောင်ခိုပြန်ရောင်းမယ်ပေါ့။ ရပ်ကွက်ရုံးတွေမှာသွားဝယ်ရင် အလေးချိန်လည်းမပြည့်ဘူး။ အပြင်ဆိုင်တွေမှာဆိုရင်လည်း စျေး သုံးဆ နဲ့ဝယ်ရနေတော့ ပြည်သူတွေစျေးအဆမတန်ဝယ်ရတဲ့သဘော အရင်ကလည်း ကြုံခဲ့ဖူးတယ်”ဟု၎င်းကပြောသည်။
မင်းဘူးမြို့တွင် ကြက်သွန်နီတပိသာ ကျပ် ၂၅,၀၀ သာ ပေါက်စျေးရှိသော်လည်း အမ်းမြို့တွင် ကုန်သည်များက တပိသာ ကျပ် ၆၀,၀၀ ဖြင့်ရောင်းချကြောင်း ဒေသခံများကဆိုသည်။
” ကုန်ကား နဲ့ အစီး ၃၀ လောက် ဝင်ပြီးရင်စာရင်း ဇယား ပြပြပြီး သူတို့ ( မြို့နယ်ထွေအုပ်) နဲ့ နီးစပ်တဲ့ ဆိုင်တွေကိုစားကုန်တွေ ပြန်ပြန်ရောက်သွားကြပါတယ်။အဲဒီဆိုင်တွေဆီက ပြည်သူတွေက စျေးကြီးပေးဝယ်ရပြန်ပါတယ်။ မှောင်ခိုမှာသတ်မှတ်စျေးနှုန်းထက် ပိုရောင်းချကြောင်းတိုင်တန်းလည်းထွေအုပ်က အရေးယူတာမရှိဘူးလေ။ ဒီခေတ်မှာ အဲဒီလိုပဲပေါင်းစားနေကြတာပါ။ကျွန်တော်တို့မှာဆက်ကြေးငွေလည်းပေးရသေးတယ်။ငွေမပေးရပါဘူး ဆိုပြီး လက်မှတ်လည်းထိုးရသေးတယ်။အဲဒါကြောင့် အမ်းမြို့ပေါ်မှာ တချို့ကုန်သည်တွေ ဆိုင်တွေ ပိတ်ထားကြတာ။သူတို့နဲ့စကားအပိုမပြောချင်လို့ပေါ့”အမ်းမြို့ကုန်သည်တဦးကမဇ္စျိမကိုပြောသည်။
အမ်းမြို့ရှိ ဒုတိုင်းမှူးနှင့် အမ်းခရိုင်အုပ်ချုပ်ရေးမှူး ဦးအောင်ဇော်ထက် တို့သည် (စစ်တက္ကသိုလ် အပတ်စဥ်-၄၂ )မှဖြစ်ကြပြီး မိတ်ဆွေအရင်းချာများဖြစ်သည်။
မြို့နယ်အုပ်ချုပ်ရေးမှူး ဦးစိုးမင်းထက်မှာ ခရိုင်အုပ်ချုပ်ရေးမှူး အားကိုးဖြင့်ငွေကြေးများတောင်းခံ ခြင်း၊ စားသောက်ကုန်များကို ထွေအုပ်မှ ပြည်သူများဆီ ဖြန့်ဖြူးသယောင်အသွင်ယူပြီး ဆိုင်များသို့ပြန်လည်သွင်းခြင်းများ ပြုလုပ်ပြီး ကြားပေါက်ဝင်ငွေရှာနေသူဖြစ်ကြောင်း တပ်တွင်းနီးစပ်သည့်သတင်းရင်းမြစ်ထံကသိရသည်။
ပဲပဒုံစစ်ဆေးရေးဂိတ််သည် မင်းဘူးမြို့မှအမ်းမြို့သို့ ကုန်စည်အဓိက စီးဆင်းရာလမ်းကြောင်းဖြစ်သော အမ်း-ပဒါန်းလမ်းတွင်တည်ရှိရာ လူသုံးကုန်ပစ္စည်းများအပါဝင် စားသောက်ကုန်ပစ္စည်းများဖြစ်သော ဆန်၊စားဆီ ၊အချို မှုန့် ၊သီဟိုဠ်စေ့၊ဖက်ကြမ်း၊ဆေးလိပ်စသည့်ပစ္စည်းပို့ဆောင်ခြင်းဖြစ်သည်။
စာတည်း။ ။အောင်ကျော်ဖြိုး