ဓါတု
မန္တလေးတိုင်း၊ငါန်းဇွန်မြို့နယ်၊ထန်းတပင်ကျေးရွာကို စစ်ကောင်စီတပ်က ဝင်ရောက်စစ်ကြောင်းထိုးနေပြီး အရပ်သားနှစ်ဦးအား PDFဟု စွပ်စွဲကာ ဖမ်းဆီးထားကြောင်း ဒေသခံများထံသိရသည်။
ထန်းတပင်ကျေးရွာမှ ကိုအောင်မြင့်ထွန်း(ခ)ကိုထွန်းတောက်နှင့် ကိုကျော်မင်းသူတို့ကို ယမန်နေ့ ဒီဇင်ဘာလ ၂၇ ရက်နေ့ နံနက်ပိုင်းတွင် စစ်ကောင်စီက ဖမ်းဆီးခြင်းဟုသိရသည်။ ၎င်းတို့နှစ်ဦးသည် PDF များမဟုတ်ကြောင်း ဒေသခံများနှင့် ငါန်းဇွန်မြို့နယ်ပကဖက ပြောသည်။
ငါန်းဇွန်မြို့နယ်ပကဖမှ တာဝန်ရှိသူတဦးက ” ဖမ်းသွားတဲ့ နှစ်ယောက်ကလည်း PDF တွေမဟုတ်ဘူး။ရိုးရိုးအရပ်သားတွေ” ဟု ဆိုသည်။
စစ်ကောင်စီနှင့်ပျူစောထီးပူးပေါင်းတပ်ဖွဲ့သည် ကိုအောင်မြင့်ထွန်းနှင့် ကိုကျော်မင်းသူအပြင် ထန်းတပင်ကျေးရွာမှ ကလေးငယ်များ၊ သက်ကြီးရွယ်အိုများအပါအဝင် ဒေသခံ ၅၀ ကျော်အား ဖမ်းဆီးရိုက်နှက်စစ်ဆေးခဲ့ကြောင်း သိရသည်။ကိုအောင်မြင့်ထွန်းတို့နှစ်ဦးကို ပြန်မလွှတ်ဘဲ ငါန်းဇွန်မြို့ပေါ် သို့ပို့ဆောင်လိုက်ပြီး ကျန်သူများကို ယင်းနေ့ ညနေ ၆ နာရီတွင် ပြန်လွှတ်ပေးခဲ့ကြောင်း ဒေသခံတဦးကမဇ္စျိမကိုပြောသည်။
“မနေ့မနက်က ရွာထဲမွေးကင်းစကလေးရော၊မီးနေသည်တွေ၊သက်ကြီးပိုင်းတွေရောအကုန်နီးပါး ဖမ်းတာ။ ရိုက်နှက်တာတွေလည်းရှိတယ်။ညနေမိုးချုပ်ကျပြန်လွှတ်ပေးလိုက်တယ်။ရွာသူရွာသားတွေကို PDF လည်းမဟုတ်ဘဲ PDF လို့စွပ်စွဲပြီး အတင်းဝန်ခံခိုင်းပြီးရိုက်နှက်တာပါ။ရွာသားနှစ်ယောက်ကိုတော့ ဆက်ဖမ်းထားတာ”ဟု၎င်းကပြောသည်။
ထို့အပြင် ရွာထဲရှိနေအိမ်များမှ မြေပဲဆီပုံးများ၊ဆန်အိတ်များနှင့်ထော်လာဂျီတစီးကိုလည်း စစ်ကောင်စီတပ်ဖွဲ့က ယူဆောင်သွားကြောင်းသိရသည်။
လတ်တလောတွင် စစ်ကောင်စီက တပ်စွဲထား၍ ထန်းတပင်ကျေးရွာမှ ဒေသခံများသည် ယနေ့ ဒီဇင်ဘာလ ၂၈ရက် နံနက်မှစ၍ ရွာလုံးကျွတ်ထွက်ပြေးတိမ်းရှောင်နေရကြောင်းသိရသည်။ထန်းတပင်ကျေးရွာတွင် အိမ်ခြေ ၂၅၇ လုံးနှင့် လူဦးရေ ၁,၀၀၀ခန့်ရှိသည်။
ထန်းတပင်ကျေးရွာအနီးတဝိုက်တွင် စစ်ကောင်စီစစ်ကြောင်းအချို့ ပြောက်ကျားတိုက်ခိုက်ခံရမှုများရှိခြင်းကြောင့် ဒေသခံများအား ကာကွယ်ရေးတပ်ဖွဲ့ဝင်များဟု စွပ်စွဲဖမ်းဆီးခြင်းဖြစ်ကြောင်း ငါန်းဇွန်မြို့နယ်ပကဖက ပြောသည်။
ထန်းတပင်ကျေးရွာအနီးတွင် ပြီးခဲ့သည့်အောက်တိုဘာလ ၂၄ ရက်နေ့ကလည်း ကာကွယ်ရေးတပ်ဖွဲ့၏ တိုက်ခိုက်ခံရပြီးနောက် ဒေသခံသားအဖနှစ်ဦးကို စစ်ကောင်စီက ဖမ်းဆီးသတ်ဖြတ်ခဲ့ကြောင်းသိရသည်။
စာတည်း – အေးချမ်း
