မြန်မာ့ နိုင်ငံရေးတည်ငြိမ်မှသာ နေရပ်ပြန်ပို့မည်ဟု မီဇိုရမ်ဝန်ကြီးချုပ် ပြော

ပုံအညွှန်း – မီဇိုရမ်ပြည်နယ်ဝန်ကြီးချုပ် သတင်းစာရှင်းလင်းပွဲ မြင်ကွင်း

ပါခွီး

(မဇ္စျိမ) ။ ။ မြန်မာနိုင်ငံတွင် နိုင်ငံရေးတည်ငြိမ်မှုမရှိမချင်း စစ်ဘေးရှောင်များကို နေရပ်ပြန်ပို့မည် မဟုတ်ကြောင်း မီဇိုရမ်ပြည်နယ် ဝန်ကြီးချုပ် ပူးလားသုအောမ်မာ က ဇန်နဝါရီလ ၆ ရက်က သတင်းစာ ရှင်းလင်းပွဲတွင် ပြောကြားလိုက်သည်။

“ ကျွန်တော် ဗဟိုအစိုးရတာဝန်ရှိသူများနဲ့ တွေ့ဆုံပြီး မြန်မာစစ်ဘေးရှောင်များကို တိုင်းပြည် မတည်မငြိမ်မချင်း ပြန်မပို့ဖို့ အာမခံချက်ရခဲ့ပါတယ်။ တတ်နိုင်သလောက် အကူအညီပေးရေးများကိုလည်း ဆွေးနွေးခဲ့ပါတယ်” ဟု ၎င်းကဆိုသည်။

ပြည်နယ်ဝန်ကြီးချုပ်သည် ရွေးကောက်ခံရပြီးနောက် နယူးဒေလီမြို့ရှိ ဗဟိုအစိုးရ ဝန်ကြီးချုပ် ၊ ပြည်ထဲရေးဝန်ကြီး ၊ နိုင်ငံခြားရေးဝန်ကြီး အပါအဝင် တာဝန်ရှိပုဂ္ဂိုလ်များ နှင့် ဇန်နဝါရီလ ၄ ရက်တွင် တွေ့ဆုံခဲ့ပြီးနောက် ယင်းသို့ ပြောဆိုလိုက်ခြင်း ဖြစ်သည်။

အဆိုပါ တွေ့ဆုံမှုများအတွင်း စစ်ဘေးရှောင်များ၏ ဇီဝအချက်အလက်ကောက်ယူခြင်း နှင့် နယ်စပ် နယ်နမိတ် ခြံစည်းရိုးခတ်ခြင်းအကြောင်းများ ပါဝင်ခဲ့ကြောင်း သိရသည်။

အိန္ဒိယနိုင်ငံ ဗဟိုအစိုးရ ပြည်ထဲရေးဝန်ကြီးဌာနက စစ်ဘေးရှောင်များ၏ ဇီဝအချက်အလက် များကောက်ယူရန် လုပ်ဆောင်မှုသည် မြန်မာစစ်ဘေးရှောင်များကို နေရပ်သို့ ပြန်လည်ပို့ ဆောင်ရန်အတွက်မဟုတ်၍ စိုးရိမ်မှုမရှိကြောင်း ၎င်းကပြောသည်။ အိန္ဒိယနိုင်ငံအတွင်း ဝင်ရောက်လာသည့် နိုင်ငံခြားသားမှန်သမျှ ထိုသို့ ပြုလုပ်ရမည်ဖြစ်သောကြောင်း ၎င်းတို့အနေဖြင့် ငြင်းဆိုရန် မလွယ်ကြောင်းဆိုသည်။

“ကျွန်တော်တို့အနေနဲ့တော့ ဝန်ကြီးချုပ်ရဲ့ ပြောဆိုချက်တွေကို လက်ခံပါတယ် ။ သူများ နိုင်ငံမှာ လာရောက်ခိုလှုံတဲ့အချိန်မှာ သူတို့ရဲ့ စည်းကမ်းကို လိုက်နာဖို့လိုအပ်ပါတယ်။ ပြန်ပို့ဖို့ လုပ်ဆောင်တာမဟုတ်ဘူးဆိုရင် အခုလို အချက်အလက်ကောက်ခြင်းအားဖြင့် စစ်ဘေးရှောင်များအတွက် အကျိုး ယုတ်စရာရှိမယ် မထင်ပါဘူး ။ ပူးပေါင်းပါဝင်ကြဖို့ တိုက်တွန်းပါတယ်” ဟု စစ်ဘေးရှောင်များ ကူညီပေးနေသည့် NGO ခေါင်းဆောင် တဦးက မဇ္စျိမ ကိုပြောသည်။

စရင်းပေးသွင်းထားသည့် စစ်ဘေးရှောင်များအတွက် စိုးရိမ်စရာမရှိဘဲ မူးယစ်ဆေးဝါး နှင့် တရားမဝင်ကုန်သွယ်မှု လုပ်ဆောင်မှု တားဆီးရန် နှင့် တရားဥပဒေ စိုးမိုးမှုများအတွက် ဝိုင်းဝန်ကူညီကြရန် လိုအပ်ကြောင်း ဆိုသည်။

ဗဟိုအစိုးရက အိန္ဒိယနှင့် မြန်မာနယ်နမိတ်ခြံစည်းရိုးကာမည့်အခြေအနေနှင့် ပတ်သက်ပြီး မီဇိုနှင့် ချင်းလူမျိုးများသည် သွေးချင်းညီအကိုများဖြစ်သောကြောင့် ကူးလူး ဆံဆက်မှု တားမြစ်စေသည့် လုပ်ရပ်မျိုးကို လက်မခံကန့်ကွက်ခဲ့ပြီး ယင်းကိစ္စဖျက် သိမ်းသွားနိုင်ရန်မျှော်လင့်ကြောင်း ဝန်ကြီးချုပ်က သတင်းစာရှင်းလင်းပွဲတွင် ပြောဆိုခဲ့သည်။

အိန္ဒိယနိုင်ငံသည် ၁၉၅၁ ခုနှစ် ဒုက္ခသည် ကွန်ဗင်းရှင်းနှင့် ၁၉၆၇ ခုနှစ် နောက်ဆက်တွဲ စာချုပ်ကို လက်မှတ်ထိုးမထားသောကြောင့် မြန်မာစစ်ဘေးရှောင်များကို ဒုက္ခသည် အဖြစ် တရားဝင် အသိအမှတ်မပြုနိုင်သော်လည်း ဗဟိုအစိုးရနှင့်ပူးပေါင်းပြီး အတတ်နိုင်ဆုံး အကူအညီပေးရေးများကို လုပ်ဆောင်သွားမည်ဖြစ်ကြောင်းဆိုသည်။

မြန်မာနိုင်ငံတွင် စစ်တပ်က အာဏာသိမ်းပြီးနောက် အိန္ဒိယနိုင်ငံ ၊ မီဇိုရမ် ၊ မဏိပူရ ၊ နာဂလဲန်းပြည်နယ် နှင့် နယူးဒေလီတို့တွင် မြန်မာနိုင်ငံသား ဦးရေ ၆၀,၀၀၀ကျော် ခိုလှုံလျက် ရှိကြောင်း အကူအညီပေးရေးအဖွဲ့အစည်းများထံက သိရသည်။

စာတည်း။ ။အောင်ကျော်ဖြိုး