ပုံအညွှန်း-လွတ်ငြိမ်းချမ်းသာခွင့်ရသည့် အကျဥ်းသားများအား ၎င်းတို့၏ မိသားစုဝင်များက ကြိုဆိုစောင့်ဆိုင်နေစဥ် (ဓာတ်ပုံ- ပုံဟောင်း)
ဓါတု
(မဇ္ဈိမ)။ ။ ကရင်နီပြည်နယ်၊ လွိုင်ကော်အကျဥ်းထောင်မှ နိုင်ကျဥ်း ခြောက်ဦး အပါအဝင် အကျဥ်းသား ၂၀ ဦးမှာ လွတ်ရက်စေ့သော်လည်း မလွတ်မြောက်သေးကြောင်း မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက်(PPNM)ထံသိရသည်။
နိုင်ငံရေးအကျဥ်းသားများမှာ စစ်ကောင်စီ ချမှတ်ထားသော ရာဇသတ်ကြီးပုဒ်မ ၅၀၅-က ဖြင့် အကျဥ်းကျခံထားရပြီး ၎င်းတို့၏လွတ်ရက်စေ့ကာလ ဖြစ်သော်လည်း အကျဥ်းဦးစီးဌာနက လက်ရှိလွိုင်ကော်မြို့ အခြေအနေများကြောင့်ဟုဆိုကာ လုံခြုံရေးအကြောင်းပြချက်ဖြင့် ဆက်လက်ထိန်းသိမ်းထားဆဲဖြစ်ကြောင်း PPNM တာဝန်ခံ ကိုသိုက်ထွန်းဦးက မဇ္စျိမကိုပြောသည်။
“ဒီ ခြောက်ဦးက ဇန်နဝါရီလထဲမှာပဲ လွတ်ရက်စေ့မယ့် နိုင်ငံရေးအကျဥ်းသားစာရင်းတွေပါ။ သူတို့လွတ်ရက်စေ့ပြီဖြစ်တဲ့အတွက် ရာဇဝတ်သားမဟုတ်တော့တဲ့အတွက် ပုံမှန်ပြင်ပမှာသွားလာလှုပ်ရှားခွင့် အခွင့်အရေးတွေရရှိသင့်နေပြီ။ လွတ်ရက်စေ့တဲ့အကျဥ်းသားတွေကို မိသားစုတွေလက်ထဲ အန္တရယ်ကင်းစွာ အပ်ပေးဖို့ ကျွန်တော်တို့ပြောကြားလိုပါတယ် “ဟု ၎င်းကပြောသည်။
အဆိုပါ ခြောက်ဦးမှာ မည်သူမည်ဝါဖြစ်သည်ဆိုသည်ကို ၎င်းတို့၏ လုံခြုံရေးအတွက် သတင်းအချက်အလက်အသေးစိတ်ကို ပြော၍ မရသော်လည်း မြေပြင်သတင်းအရင်းအမြစ်ထံမှ အချက်အလက်များအား ၁၀ ရက်တာ အချိန်ယူစုံစမ်းထားခြင်းဖြစ်ကြောင်း ကိုသိုက််ထွန်းဦးကဆိုသည်။
ထို့အပြင်လွိုင်ကော်အကျဥ်းထောင်၌အဆိုပါ နိုင်ကျဥ်းများ အပါအဝင် ပြီးခဲ့သည့်လ ဇန်နဝါရီ ၄ ရက်နေ့တွင် လွတ်ငြိမ်းချမ်းသာခွင့်ရရှိခဲ့သော တခြားရာဇဝတ်မှုအကျဉ်းသား၁၄ ဦးလည်း ယနေ့အထိ သက်ဆိုင်ရာမိသားစုထံသို့ ပြန်လည်မရောက်ရှိသေးကြောင်း ကရင်နီနိုင်ငံရေးအကျဉ်းသားများအစည်းအရုံး(KPPA)နှင့် မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ယက်(PPNM)က ယနေ့ ဖေဖော်ဝါရီလ ၃ ရက်တွင် ထုတ်ပြန်ထားသည်။
သက်ဆိုင်ရာအာဏာပိုင်များမှ အကြောင်းအမျိုးမျိုးပြ၍ ဆက်လက်ထိန်းသိမ်းထားခြင်းသည် လူ့အခွင့်အရေးချိုးဖောက်ခြင်းဖြစ်နေသောကြောင့်
အကျဉ်းဦးစီးဌာနအနေဖြင့် ချက်ချင်းပြန်လွတ်ပေးရန်ထုတ်ပြန်ချက်၌ ဖော်ပြထားသည်။
အဆိုပါဒေသတွင် စစ်ရေးတင်းမာနေသည့် အခြေအနေ၌ လွတ်မြောက်အကျဉ်းသားများ နေရပ်ပြန်နိုင်ရေးအတွက် အပြည်ပြည်ဆိုင်ရာကြက်ခြေနီအဖွဲ့(ICRC)နှင့် ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး(UN OCHA) တို့မှ ကြားဝင်စေ့စပ်ကူညီဆောင်ရွက်ပေးကြပါရန်လည်း တဆက်တည်းတောင်းဆိုထားသည်။
စစ်အာဏာသိမ်းပြီးနောက် ကရင်နီပြည်နယ်တွင်စစ်ကောင်စီက ဖမ်းဆီးခံထားရသူ ၁၅၂ ဦးရှိပြီး သေဒဏ်ကျခံထားရသူ သုံးဦး၊ထောင်ဒဏ်တသက် ကျခံထားရသူ ခုနစ်ဦးရှိကြောင်း ကရင်နီပြည်သူ့အင်အားစု (PKPF) စာရင်းတွင် ဖော်ပြထားသည်။
လက်ရှိ ကရင်နီပြည်နယ်ရှိ မြို့နယ်နေရာအများစုအား တော်လှန်ရေးတပ်ဖွဲ့များမှ ထိန်းချုပ်စိုးမိုးထား၍ လွိုင်ကော်မြို့တွင်လည်း ကရင်နီတော်လှန်ရေးတပ်ဖွဲ့များမှ မြို့အားဝိုင်းရံပိတ်ဆို့ကာ စစ်ဆင်ရေးများဆင်နွှဲလျက်ရှိပြီး မြို့၏ဧရိယာ သုံးပုံနှစ်ပုံကျော်အား စိုးမိုးထားနိုင်ကြောင်းKNDF ဗဟိုသတင်းနှင့်ပြန်ကြားရေးဌာနက ပြီးခဲ့သည်ရက်သတ္တပတ်ကထုတ်ပြန်ကြေညာထားသည်။
စာတည်း။ ။အောင်ကျော်ဖြိုး
