ဓါတ်ပုံ၊ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်
ကိုခင်မောင်၊ 008
(မဇ္ဈိမ)။ ။ စစ်ကိုင်းတိုင်း၊ ကန့်ဘလူမြို့နယ် မြောက်ခြမ်းရှိ ကျေးရွာများကို စစ်ကောင်စီတပ်ဖွဲ့က လေကြောင်းမှ ငါးကြိမ်တိုက်ခိုက်ခဲ့ရာ သံဃာတော် တပါးနှင့် အမျိုးသမီး နှစ်ဦး အပါအဝင် ဒေသခံပြည်သူ ရှစ်ဦး ထိခိုက် ဒဏ်ရာရရှိခဲ့ကြောင်း ကျွန်းလှတက်ကြွ လှုပ်ရှားသူများအဖွဲ့ တာဝန်ရှိသူကပြောသည်။
” အမျိုးသမီး ထိခိုက်ဒဏ်ရာရရှိခဲ့တယ်။ ဘုန်းကြီးကျောင်းနဲ့ စာသင်ကျောင်းလည်း ပျက်စီးမှုအနည်းငယ် ရှိခဲ့တယ်။ မပေါက်ကွဲတဲ့ ဗုံးသီးနှစ်လုံးကြောင့်လည်း ပြည်သူတွေ အထိအခိုက်သက်သာခဲ့တယ် “ဟု ကျွန်းလှတက်ကြွ လှုပ်ရှားသူများအဖွဲ့ တာဝန်ရှိသူက ပြောသည်။
ဖေဖော်ဝါရီ ၁ရက် နံနက် ၁၁နာရီခန့်မှ စတင်၍ ကိုးတောင်ဘို့တိုက်နယ်၊ ချပ်သင်းတိုက်နယ်နှင့် ပင့်သာတိုက်နယ်တို့ရှိ ကျေးရွာ ခြောက်ရွာကို စစ်ကောင်စီတပ်က လေကြောင်းမှ တိုက်ခိုက်ခဲ့ခြင်းဖြစ်သည်။
” ဂျက်ဖိုက်တာနဲ့ ဗုံးနှစ်လုံးချတာ ဘုန်းကြီးကျောင်းပေါ်တည့်တည့်ကျတာဗျ။ ဘုန်းကြီးက ဆွမ်းဘုန်းပေးနေတဲ့ အချိန်ကြီးဆိုတော့ ဘုန်းကြီး၊ ကပ္ပိယ၊ နောက်ရွာသားတဦးနဲ့ ကျောင်းထဲလာဆော့နေတဲ့ အသက် ၁၁ နှစ်နဲ့ ၁၃ နှစ်ကလေးရော ဆိုတော့ စုစုပေါင်း ငါးယောက်ထိတာ၊ တရွာလုံးသွေးပျက်မတတ်ပဲ ။ ကျောင်းမှာလူစုပြီး ပွဲလမ်းသဘင်လုပ်နေတာမျိုးလည်း မဟုတ်ဘဲ ဒီတိုင်းကြီး ပစ်ခံရတာ။ ဘုန်းကြီးကျောင်းတကျောင်းလုံး ပျက်ဆီးသွားတာ ရစရာကိုမရှိဘူး”ဟု သင်တောရွာသားတဦးကပြောသည်။
ထိုကဲ့သို့ တိုက်ခိုက်ခံရမှုကြောင့် ကိုးတောင်ဘို့တိုက်နယ်၊ ဇော်ချောင်းရွာဘုန်းကြီးကျောင်းမှ ဆွမ်းချက်ဆောင်နှင့် ဇရပ်တဆောင်တို့ပျက်စီးပြီး အသက်၇၈ နှစ်အရွယ် အဖိုးတယောက်၊ ၈၁ နှစ်အရွယ်အဖွားတယောက်ထိခိုက်မိပြီး ချပ်သင်းတိုက်နယ်၊ ဇီးကုန်းရွာတွင်လည်း ဘုန်းကြီးကျောင်းနှင့် စာသင်ကျောင်း ပျက်စီးခဲ့ကာ အမျိုးသမီးတဦးထိခိုက် ဒဏ်ရာရရှိခဲ့ကြောင်း ကျွန်လှတက်ကြွလှုပ်ရှားသူများအဖွဲ့ကဆိုသည်။
“ဆင်းတုတော်တွေနဲ့ စေတီတွေရော အကုန်ပျက်ဆီးသွားတာ၊ သာသနိကအဆောက်အအုံတွေမှန်းသိသိကြီးနဲ့ ပစ်တာကျတော့ ဗုဒ္ဒဘာသာဝင်တယောက်အနေနဲ့ အတော်လေးစိတ်မကောင်းဖြစ်မိတယ်”ဟု ဒေသခံတဦးက ပြောသည်။
ထို့ပြင် မကျီးကုန်းရွာတွင် ပြည်သူပိုင်နေအိမ် ငါးလုံးမီးလောင်ပျက်ဆီးဆုံးရှုံးခဲ့ကြောင်း ကန့်ဘလူ တက်ကြွလှုပ်ရှားသူများအဖွဲ့ကဆိုသည်။
လက်ရှိတွင် ဒဏ်ရာရရှိသူများကို လုံခြုံသည့်နေရာတွင် ဆေးကုသပေးလျက်ရှိပြီး ပင့်သာ၊ချပ်သင်းနှင့်ကိုးထောင်ဘို့တိုက်နယ်အတွင်းရှိကျေးရွာများမှ ဒေသခံ ထောင်ချီထွက်ပြေးတိမ်းရှောင်နေကြကြောင်းသိရသည်။
စာတည်း။ ။အောင်ကျော်ဖြိုး
