ပုံအညွှန်း- နေရပ်စွန့်ခွာ တိမ်းရှောင်နေသည့် ဇရပ်ကြီး ဒေသခံများအား တွေ့ရစဉ် (ဓါတ်ပုံ- Shwe Kit၊ လူမှုကွန်ရက်)
YT
(မဇ္ဈိမ)။ ။ ပဲခူးတိုင်း၊ ထန်းတပင်မြို့နယ်၊ ဇရပ်ကြီးမြို့၌ ဖြစ်ပွားနေသည့် တိုက်ပွဲများနှင့် စစ်ကောင်စီ၏ လေကြောင်းတိုက်ခိုက်မှုများကြောင့် ဇရပ်ကြီးမြို့ခံနှင့် အနီးအနားကျေးရွာများမှ ပြည်သူများ တခြားမြို့နယ်များသို့ ထွက်ပြေးတိမ်းရှောင်နေကြရကြောင်း ဒေသခံများနှင့် အကူအညီပေးနေသူများထံက သိရသည်။
ယမန်နေ့ ဖေဖော်ဝါရီလ ၇ ရက်နေ့၊ နံနက်အစောပိုင်းက စတင်၍ ခြေလျင်တပ်ရင်း ခလရ(၇၃)အပါအဝင် ဇရပ်ကြီးရဲစခန်း၊ ချောင်းခြားစခန်း၊ မြို့စိုးစခန်း၊ ရှားစေလိုစခန်းအပါအဝင် စစ်ကောင်စီတပ်အထိုင်ချရာ တပ်စခန်းများအား တော်လှန်ရေးအင်အားစုပူးပေါင်းတပ်ဖွဲ့က ဝင်ရောက်တိုက်ခိုက်ရာမှ တိုက်ပွဲများ ပြင်းထန်ခဲ့ပြီး စစ်ကောင်စီက လေကြောင်းတိုက်ခိုက်မှုကိုပါ အသုံးပြုခဲ့ကြောင်း စစ်ရေးသတင်းရင်းမြစ်များထံက သိရသည်။
ယနေ့ ဖေဖော်ဝါရီလ ၈ ရက်နေ့၊ နေ့လယ် ၃ နာရီ မေးမြန်းချက်အရ ဇရပ်ကြီးမြို့တဝိုက်တွင် နှစ်ဖက် ထိတွေ့ ပစ်ခတ်မှုများ မရှိတော့သော်လည်း စစ်ကောင်စီတပ်၏ ကျေးရွာ၊ ရပ်ကွက်များအတွင်းသို့ လက်နက်ကြီး ပစ်ခတ်မှုများနှင့် လေကြောင်းတိုက်ခိုက်မှုများ ဆက်လက်ရှိနေဆဲ ဖြစ်ကြောင်း သိရသည်။
” ဒီနေ့က နှစ်ဖက် ပစ်ခတ်မှုတော့ မရှိတော့ဘူးဗျ။ ဒါပေမယ့် လက်နက်ကြီးနဲ့ လေယာဉ်နဲ့ကတော့ ပစ်တုန်းပဲ။ ကျွန်တော်တို့ရှေ့နားလေးတင် အိမ်တွေပေါ် ပစ်ချပြီး (လေယာဉ်) ပြန်သွားတယ်” ဟု ဇရပ်ကြီး ဒေသခံများအား ကယ်ထုတ်ပေးနေသူတဦးက မဇ္ဈိမကိုပြောသည်။
စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီး ပစ်ခတ်မှုများကြောင့် ထောင်ချီသည့် ဇရပ်ကြီးမြို့ပေါ်နှင့် ကင်မွန်းခြုံ၊ မြို့စိုး၊ လယ်ကလေး၊ နတ်ရွာစသည့် ရွာများနှင့် အနီးအနားကျေးရွာများမှ ဒေသခံပြည်သူများသည် တနိုင်တပိုင် ကူညီသူများ၏ အကူအညီဖြင့် တောင်ငူမြို့နယ်ဘက်သို့ တိမ်းရှောင်နေကြကြောင်း သိရသည်။
” အစ်မတို့တော့ ထွက်ခဲ့ပြီ အခုပဲ ရောက်တယ် တောင်ငူကို။ အဆင်မပြေပါဘူး၊ ရုတ်တရက်ကြီး ထွက်လာရတော့ ပစ္စည်းတွေက အကုန်ကျန်နေခဲ့တယ်။ သက်ကြီးပိုင်းရော ကလေးတွေရော ပါတော့ လူပဲ အရ ပြေးခဲ့တာ။ အခုလည်း တယောက်က အကြီးအကျယ် ဖျားနေတယ်” ဟု ဇရပ်ကြီးမြို့ခံ အမျိုးသမီးက မဇ္ဈိမကိုပြောသည်။
” ကျွန်တော်တို့ သယ်ထုတ်တာ လူ တထောင်ကျော်သွားပြီ။ အခုထိလည်း သယ်ထုတ်နေဆဲပဲ။ ဒီဒေသခံတွေအတွက် တောင်ငူက လူမှုကယ်ဆယ်ရေးအသင်းတွေ ကူညီပေးနေကြတယ်။ ဘုန်းကြီးကျောင်းတွေမှာ နေရာချပေးသွားမှာပါ သူတို့အတွက်” ဟု ဇရပ်ကြီးဒေသခံများကို ကယ်ထုတ်ပေးနေသူက မဇ္ဈိမကို ဆက်လက်ပြောဆိုသည်။
ယမန်နေ့ ဖေဖော်ဝါရီလ ၇ ရက်နေ့နှင့် ယနေ့ ၈ ရက်နေ့အထိ စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများကြောင့် ဒေသခံနေအိမ် အလုံး ၂၀ ထက်မနည်း မီးလောင်ပျက်စီးခဲ့ပြီး ဒေသခံတဦး သေဆုံးကာ ၁၀ ဦးထက်မနည်း ဒဏ်ရာရထားကြောင်း ဒေသတွင်း လူမှုကူညီရေးအသင်းတခုထံက သိရသည်။
” ဒေသခံ ဒဏ်ရာရလို့ ဆေးရုံတွေကို ကျွန်တော်တို့ ပို့ပေးတာဆိုရင် ၁၀ ဦးလောက်ရှိပြီဗျ၊ သေဆုံးတာတော့ တလောင်းတွေ့တယ်။ အဲ့ဒီထက်ပိုပြီးတော့တော့ မကြားမိသေးဘူး” ဟု ဒေသတွင်း လူမှုကူညီရေး အသင်းတခုမှ တာဝန်ရှိသူက မဇ္ဈိမကို ဆက်လက်ပြောဆိုသည်။
လက်ရှိ ဇရပ်ကြီးမြို့၏ စစ်ရေးအခြေအနေများနှင့် ပတ်သက်၍ ဗမာပြည်သူ့လွတ်မြောက်ရေးတပ်တော်(BPLA) သတင်းနှင့် ပြန်ကြားရေးတာဝန်ခံ ကိုလင်းလင်းအား ဆက်သွယ်မေးမြန်းရာ အခြေအနေ အသေးစိတ်အား ပြောပြ၍ မရနိုင်သေးကြောင်း ဆိုသည်။
စာတည်း – သန့်ဇော်(သန်လျင်)
