ပုံအညွှန်း- စစ်ကောင်စီလေယာဥ် (ဓာတ်ပုံ- ပုံဟောင်း)
ဓါတု
(မဇ္ဈိမ)။ ။ ရခိုင်ပြည်နယ်၊ အမ်းမြို့နယ် ၊တပ်တောင်မြို့ကို စစ်ကောင်စီက တိုက်ပွဲမရှိဘဲ လေကြောင်းမှဗုံးဖြင့် ငါးကြိမ်ကြဲတိုက်ခိုက်သဖြင့် အရပ်သားနေအိမ်များမီးလောင်ပျက်ဆီးသွားကြောင်း နီးစပ်သည့်ဒေသခံများထံက သိရသည်။
ယနေ့ မတ်လ ၂ ရက်နေ့ နံနက် ၁၁ နာရီ မိနစ် ၃၀ က တိုက်လေယာဉ်ဖြင့် အနောက်ပိုင်းတိုင်းစစ်ဌာနချုပ်တည်ရှိရာ အမ်းမြို့မှ မိုင် ၂၀ အကွာအဝေးရှိ အတပ်တောင်မြို့ မြို့မရဲစခန်းနှင့်နေရာအချို့ကို ဗုံးကြဲတိုက်ခိုက်ခဲ့ခြင်းဖြစ်ကြောင်း ဒေသခံသတင်းရင်းမြစ်တဦးက မဇ္စျိမကိုပြောသည်။
“မျက်မြင်တွေပြောတာ တိုက်လေယာဥ်အဖြူနဲ့လာပစ်တာ။ ၁၀ မိနစ်အတွင်း တခေါက်လာ တလုံး ကြဲနေတာ။ စခန်းကိုစွန့်ခွာပြေးတဲ့ စစ်ကောင်စီတပ်နေတဲ့နေရာတွေကြဲတယ်။ ရက္ခိုင့်တပ်တော်(AA)တွေ လာရောက်နေထိုင်မလားဆိုပြီး သံသယနဲ့ပစ်တာလည်း ဖြစ်နိုင်တယ်။ ဘေးကိုပစ်တယ် ။ စာသင်ကျောင်းကိုလည်း ပစ်တယ် နေအိမ်တွေလည်းပစ်တယ် ။ မီးလောင်တာကတော့ နေအိမ်တွေ အထိအခိုက်အတိအကျတော့ မသိရသေးဘူး။ အထိအခိုက် အသေအပျောက် ရှိနိုင်တယ်။ မနက်ကလာပစ်ပြီး အခုတော့ထပ်မပစ်သေးဘူး” ဟု ၎င်းက ပြောသည်။
လက်ရှိတွင် တပ်တောင်မြို့ခံများနှင့် အဆက်အသွယ်ရရှိနိုင်ရန် ဖုန်းလိုင်းအခက်အခဲရှိနေပြီး ပျက်စီးမှုများနှင့် ကျန်အခြေအနေများသိရှိနိုင်ရန် မဇ္ဈိမက ကြိုးစားဆက်သွယ်နေဆဲဖြစ်သည်။ပြီးခဲ့သည့် ဖေဖော််ဝါရီလဆန်းပိုင်းက တပ်တောင်မြို့မရဲစခန်းမှ စခန်းမှူးအပါအဝင် အင်အား ၂၀ ကျော်သည် စစ်မတိုက်ချင်၍ အမ်းမြို့သို့ ထွက်ပြေးရာ စခန်းမှူးအပါ သုံးဦးအား အမ်းမြို့ရှိ စစ်ကောင်စီက ပြန်လည်ဖမ်းဆီးခဲ့သည်။ ယင်းတို့ သုံးဦးအနက် စခန်းမှူးမှလွဲ၍ ရဲတပ်ကြပ်အဆင့်ရှိကျန်နှစ်ဦးသည် စစ်ကောင်စီတပ်ထံမှ ထွက်ပြေးနိုင်ခဲ့ပြီး ရက္ခိုင့်တပ်တော်( AA )ထံခိုလှုံသွားကြောင်းအမ်းမြို့ဒေသခံများထံသိရသည်။
ထို့ကြောင့် ယနေ့တွင် အဆိုပါရဲစခန်းနှင့်အနီးတဝိုက်ရှိစာသင်ေကျာင်း၊နှင့် ဒေသခံနေအိမ်များကိုဦးတည်ပစ်ခတ်ခြင်းဖြစ်နိုင်ကြောင်းဒေသခံများကဆိုသည်။တပ်တောင်မြို့ကို စစ်ကောင်စီတပ်မှလျှပ်စစ်မီးဖြတ်တောက်ထားသည်မှာ ခြောက်ရက်ခန့်ရှိပြီဖြစ်ပြီး ဖုန်းလိုင်းများလည်း အချိန်ဖြင့်ကန့်သတ်ဖြတ်တောက်ထား သည်။ ထို့အပြင်ပြီးခဲ့သည့်ရက်ပိုင်းကအမ်းမြို့နှင့်ဆက်သွယ်ထားသည့် ကားလမ်းများကိုလည်း စစ်ကောင်စီတပ်က မြေတူးစက်ဖြင့်မြောင်းဖော်ဖြတ်တောက်ထားခြင်းဖြစ်သည်။
ပြီးခဲ့သည့် ဖေဖော်ဝါရီလ ၂၉ ရက်နေ့ နံနက်ပိုင်းကလည်း တိုက်ပွဲမရှိသည့်စစ်တွေမြို့ မြို့မဈေးအား စစ်ကောင်စီမှလက်နက်ကြီးများ ပစ်ခတ်တိုက်ခိုက်ခဲ့ရာ အရပ်သား ၁၂ ဦးသေဆုံး၍ ၈၀ ဦးထက်မနည်း ပြင်းထန်ဒဏ်ရာများ ရရှိခဲ့ကြောင်းရက္ခိုင့်တပ်တော်( AA) က ထုတ်ပြန်ထားသည်။
ပုဏ္ဏားကျွန်း၊ ဘူးသီးတောင်၊ မောင်တောတွင်တိုက်ပွဲများပြင်းထန်နေပြီးရခိုင်ပြည်နယ်တောင်ပိုင်းသို့တဖြည်းဖြည်း တိုက်ပွဲစိမ့်ဝင်လာသည့်ရက္ခိုင့်တပ်တော်(AA)၏ထိုးစစ်အရှိန်ကြောင့် စစ်ကောင်စီတပ်မှအပြင်းအထန်ခုခံတိုက်ခံနေရ၍ တိုက်ပွဲမရှိသည့်ဒေသများတွင် စစ်ရေးပစ်မှတ်မဟုတ်သည့်အရပ်များတည်ရှိရာနေရာများသို့ စစ်ကောင်စီကပစ်ခတ်တိုက်ခိုက်လျက်ရှိသည်။
စာတည်း။ ။အောင်ကျော်ဖြိုး