ဓါတ်ပုံ-အမ်းမြို့မရဲစခန်း
ဓါတု
(မဇ္ဈိမ)။ ။ ရခိုင်ပြည်နယ်၊ အမ်းမြို့တွင် နိုင်ငံရေး အကျဉ်းသား ဦးရေ ၁၀ကျော်ကို အကျဉ်းထောင်သို့ မပို့ဘဲ စစ်ကောင်စီက တပ်အတွင်း ခေါ်ဆောင်သွားကြောင်း သိရသည်။
ရက္ခိုင့်တပ်တော်(AA)နှင့်ဆက်စပ်သည်ဟုဆိုကာ မတရားအသင်းဆက်သွယ်မှု ၁၇(၁) ပုဒ်မ၊ ရာဇသတ်ကြီးပုဒ်မ ၅၀၅-က တို့ဖြင့် ပြစ်ဒဏ်ချမှတ်ခံထားရသူများအား ထိုသို့ခေါ်ဆောင်သွားခြင်းဖြစ်သည်။
ယခင် မြောက်ဦးမြို့တွင်ဖမ်းဆီးထားသည့်အရပ်သားများအား စစ်ကောင်စီက ပစ်သတ်သကဲ့သို့ ပြုလုပ်မည်ကို အကျဉ်းသားများ၏ မိသားစုဝင်များက စိုးရိမ်ပူပန်နေကြေကြာင်း နီးစပ်သူများက ဆိုသည်။
“တရားရုံးကအသိတယောက်ဆီကျွန်တော်မေးကြည့်တော့ သူတို့ကိုအပေါ်ကနေဖိအားပေးတာပေါ့။ အမ်းအချုပ်မှာတရားခံများလာတဲ့အတွက်ဒီဟာတွေမြန်မြန်ဖြတ်ပြီးတော့အမိန့်ချပပေးပါဆိုပြီး မနေ့က ညနေ ၅ နာရီအထိအမိန့်ချနေတုန်းပဲ။ အမိန့်ချပြီးသူတွေကိုရဲစခန်းမှာထားပြီးနောက်တရက်နေတော့တပ်ကခေါ်သွားတာ ဓါးစာခံလုပ်မလား၊သတ်ပစ်မလားမသိရဘူးပေါ့။”ဟု တရားရုံးနှင့် နီးစပ်သူ တဦးက ဆိုသည်။
ယခုရက်ပိုင်းအတွင်းအမိန့်ချရန် ပြည်နယ်တရားလွှတ်တော်မှညွှန်ကြားထားခြင်းဖြစ်ပြီး မတ်လ ၁၅ ရက် ညနေပိုင်း အချိန်ထိ အမိန့်ချနေဆဲဖြစ်ကြောင်း သိရသည်။
အမိန့်ကျသူများအား အကျဥ်းထောင်သို့မပို့ဆောင်ဘဲ စစ်ကောင်စီတပ်က မျက်နှာဖုံးအနက်စွပ်ကာ တပ်အတွင်းခေါ်ဆောင်သွားခြင်းဖြစ်ကြောင်းတရားရုံးနှင့်နီးစပ်သည့်သတင်းရင်းမြစ်က မဇ္စျိမကိုပြောသည်။
” ရဲစခန်းကနေလာခေါ်ရင်လည်း မျက်နှာဖုံးအနက်စွပ်ခေါ်သွားကြတော့ ဘယ်တပ်တွေကို ခေါ်သွားလည်းဆိုတာ ရဲထဲကဖရဲသီး(အတွင်းသတင်းပေး)လည်းမသိရဘူး ခန့်မှန်းလို့မရဘူး။အရင်ကမြောက်ဦးမှာသတ်ပစ်တဲ့ဖြစ်စဥ်ရှိဖူးတော့ အကျဥ်းထောင်ကိုခေါ်ရင် သိပ်စိတ်မပူပေမယ့်တပ်ထဲကိုခေါ်သွားတော့ မိသားစုဝင်တွေစိတ်ပူနေကြတယ်”ဟု၎င်းကပြောသည်။
စစ်အာဏာသိမ်းပြီးနောက်အမ်းမြို့တွင် ၁၇(၁)ဖြင့် အမှုဖွင့်စွပ်စွဲထားသူ ၃၈ ဦး၊၅၀၅-က အမှု ဖြင့် ၁၀ ဦး ရှိသည့်အနက် တကျော့ပြန်တိုက်ပွဲမတိုင်ခင်အမိန့်ချလိုက်သည့် ပထမတသုတ် ၁၀ ဦးကျော်အားအမ်းမြို့တွင်အကျဥ်းထောင်မရှိသောကြောင့် စစ်တွေအကျဥ်းထောင်သို့လေယာဥ်ဖြင့်ပို့ဆောင်ခဲ့သည်။
သို့သော် တကျော့ပြန်တိုက်ပွဲစတင်ပြီးနောက် ယခုရက်ပိုင်းအတွင်းအမိန့်ကျသည့်ကျန်တသုတ်ကိုမူ စစ်တွေမြို့အကျဥ်းထောင်သို့ပို့ဆောင်ခြင်းမရှိဘဲ စစ်ကောင်စီတပ်ရင်းများရှိရာသို့သာ ခေါ်ဆောင်သွားခြင်းဖြစ်ကြောင်း အမိန့်ကျသည့် မိသားစုဝင်များနှင့်နီးစပ်သည့်ဒေသခံသတင်းရင်းမြစ်ထံသိရသည်။
” ၁၇(၁ ( ကိုကျတော့ AA တပ်ဖွဲ့ဝင်တော့မဟုတ်ဘူး။AA နဲ့ပတ်သက်ပြီးရွာမှာ အစည်းအဝေးခေါ်လို့ တက်တဲ့သူတွေရယ်၊ ၅၀၅ ပုဒ်မတွေကတော့ တကျော့ပြန်တိုက်ပွဲဖြစ်ပြီးမှဖမ်းတာ သူတို့ကိုကျတော့အမ်းမြို့ကို AAဘယ်အချိန်လာသိမ်းမှာလဲ မြန်မြန်လာသိမ်း မြန်မြန်အေးတာပဲလို့ လိုင်းပေါ်ပိုစ့်တင်တဲ့သူတွေကို ဖေ့စ်ဘွတ်ကနေစောင့်ကြည့်ပြီးဖမ်းတာပေါ့”ဟုဒေသခံသတင်းရင်းမြစ်တဦးကပြောသည်။
မြောက်ဦးမြို့အခြေစိုက် စစ်ကောင်စီ၏ ခမရ (၃၇၈ )သည် သတင်းသမား ကိုမြတ်သူထွန်း (ခ) ဖိုးသီဟအပါအဝင်အရပ်သား ခုနစ် ဦးကို ဖမ်းဆီးထားပြီး ဇန်နဝါရီလ ၃၁ ရက် တွင် သေနတ်ဖြင့် ပစ်သတ်လိုက်ခြင်းဖြစ်ကြောင်းရက္ခိုင့်တပ်တော်( AA)က ထုတ်ပြန်ခဲ့သည်။
ထိုဖြစ်ရပ်အပေါ် နိုင်ငံတော် တည်ငြိမ်အေးချမ်းရေး ပျက်ပြားစေရန်ရည်ရွယ်လှုံ့ဆော်ခြင်း၊ ဝါဒဖြန့်ခြင်းဖြစ်သည်ဟုစစ်ကောင်စီဝါဒဖြန့်သတင်းစာများတွင်ဖော်ပြခဲ့ဖူးသည်။
ရခိုင်ပြည်နယ်တွင် တကျော့ပြန်တိုက်ပွဲစတင်ပြီးနောက် စစ်ကောင်စီက ဒေသခံအရပ်သား ၄၀၀ ကျော်ကိုဖမ်းဆီးခဲ့သည်။
ယင်းတို့အနက် ၅၀၅-က ဖြင့် အမှုဖွင့်ဖမ်းဆီးထားသူမှာ တပြည်နယ်လုံးအတိုင်းအတာအရ ၄၀ ဦးဝန်းကျင်ရှိ၍ ၎င်းတို့မှာ စစ်တွေ၊အမ်း၊ကျောက်တော်၊မြောက်ဦးတို့်မှဖြစ်ကြောင်း တရားရေးနှင့်နီးစပ်သည့်သတင်းရင်းမြစ်များထံကသိရသည်။
စာတည်း။ ။အောင်ကျော်ဖြိုး