(မဇ္ဈိမ)။ ။တအာင်းပြည်နယ်၊ တပ်မဟာ(၄)စစ်ဒေသရှိ နမ္မတူမြို့ ပြည်သူ့ဆေးရုံတွင် CDM ဆရာဝန်များ အပါအဝင် ဒေသခံ CDM ကျန်းမာရေးဝန်ထမ်းများနှင့် စတင်လည်ပတ်နေပြီဖြစ်ကြောင်း TNLA ကျန်းမာ ရေးဌာနမှ တာ၀န်ရှိသူတဦးက ပြောသည်။
အောက်မြန်မာပြည်မှဖိတ်ခေါ်ထားသည့် ကျွမ်းကျင် CDM ဆရာဝန်ကြီးအချို့နှင့်အတူ CDM ပြုလုပ်ထား သည့် ဒေသခံ ကျန်းမာရေးဝန်ထမ်းများ၊ CBHT ဆရာ/ဆရာမများအပါအ၀င် ကျန်းမာရေးဝန်ထမ်း ၁၈ ဦး ဖြင့် စတင်လည်ပတ်နေခြင်းဖြစ်သည်။
“အစပဲရှိသေးတာဆိုတော့ လိုအပ်ချက်တွေက ရှိပါတယ်၊ ဒါပေမယ့် ပြည်သူတွေရဲ့ ကျန်းမာရေးလိုအပ် ချက်တွေကို အချိန်မရွေး အကောင်းဆုံးဝန်ဆောင်မှုပေးဖို့ ကျနော်တို့ကြိုးစားနေပါတယ်”ဟု PSLF/TNLA ကျန်းမာရေးဌာနမှ တာဝန်ရှိသူတဦးက ပြောသည်။
နမ္မတူပြည်သူ့ဆေးရုံတွင် လိုအပ်ချက်တချို့နှင့် ဝန်ထမ်းအင်အား လုံလောက်မှုမရှိသေးသော်လည်း ဒေသခံပြည်သူများ၏ ကျန်းမာရေးလိုအပ်ချက်များကို ၂၄ နာရီ အချိန်ပြည့်ပေးနိုင်ရန် ကြိုးစားနေပြီး CDM ပြုလုပ်ထားသည့် ကျန်းမာရေးဝန်ထမ်းမည် သူမဆို ဖိတ်ခေါ်သည်ဟု TNLA က ဆိုသည်။
“အခုဒီမှာက ဒေသခံ CDM ကျန်းမာရေးဝန်ထမ်းတွေက အများဆုံးပါဝင်ပါတယ်၊ ဝန်ထမ်းအင်အားက လုံလုံလောက်လောက်တော့ မရှိသေးဘူး။ ဒါကြောင့် ဒေသခံတွေအပြင် အနယ်နယ်အရပ်ရပ်က CDM လုပ်ထားတဲ့ ဘယ်သူမဆို ကျနော်တို့နဲ့ ပူးပေါင်းဖို့ ဖိတ်ခေါ်ပါတယ် ”ဟု PSLF/TNLA ကျန်းမာရေးဌာနမှ တာဝန်ရှိသူတဦးက ပြောသည်။
နမ္မတူမြို့အား တအာင်းအမျိုးသားလွတ်မြောက်ရေးတပ်မတော်(PSLF/TNLA)မှ ပြီးခဲ့သည့် ၂၀၂၃ ခုနှစ်၊ ဒီဇင်ဘာလ ၂၈ ရက်နေ့တွင် စစ်ကောင်စီထံမှ အပြီးသတ်သိမ်းပိုက်ခဲ့သည်။
စာတည်း။ ။စောဖေ
