ဓါတုရေးသားသည်။
မဇ္ဈိမ။ ။ရက္ခိုင့်တပ်တော် (AA) ၏ထိုးစစ်ကာလ လေးလတာအတွင်း တိုက်ပွဲများအရှိန်ပိုမြင့်လာသလို ရခိုင်ပြည်နယ်မှ မြို့ ၁၇ မြို့အနက် ကိုးမြို့ကို AAက သိမ်းပိုက်ထားသည်။
၂၀၂၃ နိုဝင်လာလ ၁၃ရက်မှ စတင်ခဲ့သည့်ထိုးစစ်အတွင်းAA သည် ရခိုင်ပြည်နယ်မြောက်ပိုင်းမှ ကျောက်တော်၊ မြောက်ဦး၊ မင်းပြား၊ ပေါက်တော၊ မြေပုံ၊တောင်ပြို၊ ပုဏ္ဏားကျွန်း၊ ရသေ့တောင်နှင့် တောင်ပိုင်းမှ ရမ်းဗြဲမြို့၊ ချင်းပြည်နယ်မှ ပလက်ဝမြို့တို့ကို သိမ်းယူနိုင်ပြီဖြစ်သည်။ လက်ရှိအချိန်အထိ နောက်ဆုံးသိမ်းယူထားသည့်မြို့မှာ ရသေ့တောင်မြို့ဖြစ်ပြီး မတ်လ ၁၇ ရက်တွင် သိမ်းယူခဲ့ခြင်းဖြစ်သည်။
မေယုမြစ်ကမ်းဘေးရှိ ရသေ့တောင်မြို့သည် စစ်တွေမြို့မြောက်ဘက်မိုင် ၄၀အကွာတွင်တည်ရှိပြီးစစ်တွေမြို့မှ ရေလမ်းခရီးဆက်သွယ်ရေးအရေးပါသည့်မြို့ဖြစ်သည်။ ရခိုင်ပြည်နယ်မြောက်ပိုင်းတွင် စစ်ရေးအရ အချက်အချာကျသည့်နယ်မြေဖြစ်ပြီး နယ်မြေထိစပ်နေသောဘူးသီးတောင်၊မောင်တောမြို့မှ စစ်ကောင်စီစခန်းများကိုလည်း AAက တိုက်ခိုက်နေသည်။
နောက်ထပ်လက်ကျန်စစ်ကောင်စီစခန်းများကို တိုက်ခိုက်ပြီး တမြို့ပြီးတမြို့ ထိုးစစ်ဆင်သိမ်းယူသွားမည်ဟု AAက ထုတ်ပြန်ထားပြီး စစ်ကောင်စီကလည်း လက်ကျန်မြို့များ မဆုံးရှုံးစေရေးအတွက် ခံစစ်ကိုအကြီးအကျယ်ပြင်ဆင်နေသည်။ ထို့ကြောင့်ပင် ယခုလတ်တလောစစ်ရေးအခြေအနေအရ ရခိုင်ပြည်နယ်၏မြို့တော်စစ်တွေ၊ အနောက်ပိုင်းတိုင်းစစ်ဌာနချုပ်အခြေစိုက်အမ်းမြို့နှင့် ဘူးသီးတောင်၊မောင်တောမြို့တို့သည် စစ်ကောင်စီအတွက် နောက်ဆုံးခံတပ်မြို့များဖြစ်လာသည်ဟု ရခိုင်နိုင်ငံရေးအင်အားစုများကပြောသည်။
” ရသေ့တောင်မှာ စစ်ကောင်စီရဲ့ ဗိုလ်မှူးချုပ်အဆင့်ဦးစီးတော့ ရှေ့တန်းစစ်ဆင်ရေးအနေနဲ့ ဆောင်ရွက်တာရှိတယ်။ စစ်တွေမှာ ဒကစပဲရှိတယ်။ဗိုလ်မှူးချုပ်အဆင့်ရှိပေမယ့် ရှေ့တန်းခံစစ်ကြီးကြီးမားမားမရှိဘူး။ ဘူးသီးတောင်က စစ်ကောင်စီတပ်မဌာနချုပ် စကခ(၁၅)ရှိတယ်။မောင်တောကျတော့ border line မှာမောင်တောဌာနချုပ်ကိုအဆင့်မြှင့်ပြီးကြီးကြပ်ကွပ်ကဲနေတာရှိတယ်။ အဲ့ဒီမြို့တွေကို AA ကသိမ်းပိုက်နိုင်ရင် စစ်တွေကိုချောင်ပိတ်ပြီးသွားမှာပေါ့လေ”ဟု AA နှင့်နီးစပ်သည့်သတင်းရင်းမြစ်တဦးကသုံးသပ်သည်။
ရခိုင်ပြည်နယ်မြောက်ပိုင်းတခွင်၌ ရန်ကုန်-စစ်တွေကားလမ်းကြောရှိ မြို့အများစုကို AA ကသိမ်းပိုက်ထားနိုင်သော်လည်း မြို့အလုံးစုံ အပြီးသတ်ရရှိရန်ဘူးသီးတောင်၊မောင်တော၊စစ်တွေမြို့တို့ကျန်ရှိနေသေးသည်။
ရသေ့တောင်မြို့ကို သိမ်းပိုက်ပြီးနောက် AAသည် မြို့တော်စစ်တွေကို အနှေးနှင့်အမြန်တိုက်ပွဲဖော်ဆောင်နိုင်ကြောင်း ဝါရင့်နိုင်ငံရေးသမားဦးဖေသန်းက သုံးသပ်ပြောဆိုသည်။
“အဲ့ဒီမြို့ သုံးမြို့ပြီးရင်တော့စစ်တွေအလှည့်ရောက်လာမှာပေါ့။ စစ်တွေမြို့ရဲ့ တောင်ဘက်ကပင်လယ်ဝိုင်းနေတာ မြောက်ဘက်မှာဆို စစ်တပ်တပ်ရင်းတပ်ဖွဲ့တွေရှိတယ်။ အဲ့ဒီတော့ စစ်တွေကကြည်းတပ်နဲ့ရေတပ်ကြားညှပ်နေတာ။ပေါက်တော၊ရမ်းဗြဲတို့လို စစ်တပ်ကရှုံးရင် ရှူံးမဲမဲတော့တာပဲ။ပြည်သူဘက်မြှားဦးလှည့်၊ မြို့ပျက်ဖြစ်အောင် စစ်တွေလည်းဖြစ်သွားနိုင်တော့ ULA/AA ဘက်ကအဲ့ဒါတွေစဥ်းစားလိမ့်မယ်လို့ကျွန်တော်ထင်တယ်” ဟု ၎င်းကဆိုသည်။
AAသည် စစ်တွေမြို့အထိမနာစေရေးအတွက် ထိုးစစ်ဆင်တိုက်ခိုက်ခြင်းမလုပ်ဘဲ ဝိုင်းပတ်ပိတ်ဆို့ကာ စစ်ကောင်စီတပ်များ လက်နက်ချအညံ့ခံလာရေး ကြိုးစားနေသည်ဟု သုံးသပ်ပြောဆိုသည်။
ရခိုင်မြောက်ပိုင်းတွင် တိုက်ပွဲဖော်ဆောင်ရန်ကျန်သေးသည့်တမြို့တည်းသော စစ်တွေမြို့တွင် ဒေသကွပ်ကဲမှုစစ်ဌာနချုပ်(ဒကစ) အခြေစိုက်ပြီး အနောက်ပိုင်းတိုင်းစစ်ဌာနချုပ်လက်အောက် ခလရ တပ်ရင်းခြောက်ခုနှင့်အမှတ်(၁၂)ရဲတပ်ရင်းနှင့်တပ်ရင်းအချို့ရှိသည်။
ယေဘုယျအားဖြင့်ကြည့်လျှင် စစ်တွေမြို့တွင်စစ်ကောင်စီမှအင်အားအမြောက်အများဖြင့်ခံတပ်များအခိုင်အမာတည်ဆောက်ထားသော်လည်း ပင်လယ်ပြင်ထွက်ပေါက်သာရှိပြီး စစ်ရေးဗျူဟာပိုင်းအရအချက်အချာကျသည့်နယ်မြေမဟုတ်ကြောင်း နိုင်ငံရေးလေ့လာသုံးသပ်သူများနှင့်နယ်မြေကျွမ်းကျင်သူဒေသခံများကပြောသည်။
ရခိုင်လူ့အခွင့်အရေးကာကွယ်မြှင့်တင်သူများအသင်းမှဒါရိုက်တာဦးမြတ်ထွန်းက AAသည် ရသေ့တောင်ကို သိမ်းယူပြီးနောက် နယ်နိမိတ်ချင်းထိစပ်နေသော ဘူးသီးတောင်၊မောင်တောမြို့များကိုလည်း စောလျင်စွာသိမ်းပိုက်နိုင်ကြောင်းနှင့် ထို့နောက်ပိုင်းတွင် မြို့တော်စစ်တွေသို့ ထိုးစစ်ဦးတည်ဝင်လာနိုင်ကြောင်း သုံးသပ်သည်။
စစ်ကောင်စီသည် ဒေသကွပ်ကဲမှုစစ်ဌာနချုပ်လက်အောက်ရှိစစ်တွေမြို့ အမြင့်ကျွန်း၊ပါဒလိပ်၊ နေဗီတပ်၊စစ်တွေရဲတပ်ရင်းများမှ လက်နက်ကြီးများဖြင့် မကြာခဏပစ်ကူပေးလျက်ရှိပြီး မေယုမြစ်ဘက်မှ စစ်ကောင်စီ၏ ရေယာဥ်များအသုံးပြု၍ စစ်ကူအင်အားဖြည့်တင်းနေသည်။AAကလည်း စစ်ကောင်စီ၏ စစ်ကူလမ်းကြောင်းနှင့်ရိက္ခာပို့သည့်လမ်းကြောင်းများကိုပါ ကြားဖြတ်တိုက်ခိုက်နေသည်။
တောင်ကုန်းများထူထပ်သည့်ဘူးသီးတောင်မြို့သည် မေယုမြစ်ဖျားတွင်တည်ရှိ၍ သင်္ဘောဆိပ်မြို့လည်းဖြစ်သည်။ ဘူးသီးတောင်မြို့သည် စစ်တွေမြို့မှ မြောက်ဘက် ၇၅မိုင်ခန့်အကွာတွင် တည်ရှိသည်။ ဘူးသီးတောင်အခြေစိုက်စစ်ဆင်ရေးကွပ်ကဲမှုဌာနချုပ်-စကခ (၁၅) လက်အောက်ခံ ခမရ( ၅၅၂) တပ်ရင်းကိုလည်း AA က ထိုးစစ်ဆင်တိုက်ခိုက်လျက်ရှိသည်။
ကုန်သွယ်ရေးအချက်အချာကျသော အိန္ဒိယနိုင်ငံနှင့်နယ်စပ်လမ်းကြောင်းပေါ်မှ ချင်းပြည်နယ်၊ပလက်ဝမြို့ကို AA က သိမ်းယူနိုင်ခဲ့သလို ဘင်္ဂလားဒေ့ရှ်နိုင်ငံနှင့်နယ်စပ်ကျသည့် မောင်တောမြို့ကိုလည်း ကုန်သွယ်လမ်းကြောင်းဖွင့်ရန် ဒုတိယနယ်စပ်မြို့ အဖြစ်သိမ်းပိုက်နိုင်ရေးအတွက် လေးလတာကြာမြင့်သည့်အထိအရှိန်မပြတ်အပြင်းအထန်ထိုးစစ်ဆင်သည်ကိုတွေ့ရကြောင်းနိုင်ငံရေးလေ့လာသုံးသပ်သူများကဆိုသည်။
နတ်မြစ်၏အရှေ့ဘက်ကမ်းတွင်တည်ရှိသည့်ကုန်သွယ်ရောင်းဝယ်မှုစည်ကားသောမောင်တောမြို့သည် စစ်တွေမြို့နှင့်၉၆မိုင်ကွာဝေးသည်။ မောင်တောမြို့သည်AAမှသိမ်းပိုက်ထားနိုင်သည့် တောင်ပြိုလက်ဝဲမြို့နှင့်မိုင်၂၀ကွာဝေးသည်။ထို့အပြင် နယ်စပ်ကုန်သွယ်ရေးအတွက် အရေးပါသောမြို့ လည်းဖြစ်သည်။ ဘူးသီးတောင်မြို့ နှင့်၁၆မိုင်ခန့်သာကွာဝေးပြီး စစ်တွေမြို့သို့ သင်္ဘော၊ရှပ်ပြေးရေယာဉ်ဖြင့်သွားလာနိုင်သည်။
ဒေသခံများ၏အဆိုအရ မောင်တောမြို့နယ်တဝက်ကို AA မှထိန်းချုပ်ထားနိုင်ပြီး နယ်ခြားစောင့်စခန်းအချို့အပါအဝင် နယ်ခြားစောင့်ရဲတပ်ဖွဲ့ခွဲ-နခခ(၄) လက်အောက်ရှိ ဗောဓိကုန်းစခန်းကိုလည်းAA မှဆက်လက်ထိုးစစ်ဆင်တိုက်ခိုက်လျက်ရှိသည်ဟုဆိုသည်။ဗောဓိစခန်းမကျရေးအတွက်လည်းစစ်ကောင်စီတပ်က လေကြောင်း၊ရေကြောင်းမှအပြင်းအထန်ခုခံကာကွယ်နေသည်။
ရခိုင်စစ်မြေပြင်အတွင်း စစ်ကောင်စီအထိနာခဲ့သည့် လူသိရှင်ကြားတိုက်ပွဲမှာ အမှတ်(၉) စစ်ဆင်ရေးကွပ်ကဲမှုဌာနချုပ်အခြေစိုက်သည့် ကျောက်တော်မြို့နယ်တွင် ဖေဖော်ဝါရီလအတွင်းကဖြစ်ပွားခဲ့သည့် တိုက်ပွဲဖြစ်သည်။ ကျောက်တော်မြို့နယ်၊ အပေါက်ဝရွာအနီးတွင်ဖေဖော်ဝါရီလ ၇ရက်နှင့် ၈ရက်က ဖြစ်ပွားခဲ့သည့်ရေကြောင်းတိုက်ပွဲ၌ စစ်ကောင်စီ၏ စစ်သင်္ဘောနှစ်စီး၊ ဇက်သင်္ဘောတစီးအား AAကတိုက်ခိုက်နှစ်မြုပ်စဉ် စစ်ကောင်စီတပ်ဖွဲ့ဝင်များ ရေကူးထွက်ပြေးခဲ့ကြရသည်။ ထိုတိုက်ပွဲအတွင်း အသက်လုထွက်ပြေးသည့် စကခ (၉) တပ်မမှူး ဗိုလ်မှူးချုပ်ဇော်မင်းထွန်းကို တပ်ဖွဲ့ဝင်အချို့နှင့်အတူ အရှင်လက်ရဖမ်းဆီးမိခဲ့ကြောင်း၊သေဆုံးသူများလည်းရှိကြောင်း AA က ထုတ်ပြန်ခဲ့သည်။ရက္ခိုင့်တပ်တော်၏သမိုင်းတွင် ဖေဖော်ဝါရီလ (၈) ရက်နေ့သည် အာရက္ခရေပြင်ထက်တွင် ရန်သူ့သင်္ဘောများအား အလဲထိုးပြီး အောင်ပွဲရယူနိုင်ခဲ့သော နေ့တနေ့ဖြစ်ခဲ့သည်ဟု AAက ဟစ်ကြွေးခဲ့သည်။
ရခိုင်တွင် မြေပြင်စစ်ကြောင်းများရော ရေကြောင်းတိုက်ပွဲတွင်ပါ အထိနာသည့် စစ်ကောင်စီက လေကြောင်းမှစစ်ကူပို့ခြင်းကိုအားပြုလာသည်။ ဖေဖော်ဝါရီလအတွင်းတိုက်ပွဲများတွင် အမ်းမြို့မှ အနောက်ပိုင်းတိုင်းစစ်ဌာနချုပ်လက်အောက်တပ်ရင်းများအပါအဝင် ဧရာဝတီတိုင်းအခြေစိုက်တပ်ရင်းတပ်ဖွဲ့များမှ အင်အား ၁၀၀ ကျော်ကို ရဟတ်ယာဥ်များဖြင့် စစ်ကူစေလွှတ်ခဲ့သည်။ သို့သော် ယင်းစစ်ကြောင်းကို AAက တိုက်ခိုက်ရာသေဆုံးသူအများအပြားရှိခဲ့ပြီး အရှင်ဖမ်းမိသူများလည်းရှိခဲ့သည်။ ဆက်လက်ထိန်းချုပ်နိုင်ခြင်းမရှိတော့သည့် မြို့များမှ ဆုတ်ခွာလာသည့် စစ်ကောင်စီစစ်ကြောင်းများသည် ဆုတ်ခွာရာလမ်းကြောင်းတလျှောက်ရှိ တံတားအချို့ကို ဖောက်ခွဲဖျက်ဆီးခြင်း၊ လမ်းပိုင်းအချို့အား ဖျက်ဆီးခြင်းများပြုလုပ်ခဲ့သည်။
ရန်ကုန်-စစ်တွေကားလမ်းရှိ အမြင့်ကျွန်းတံတားကိုမိုင်းခွဲဖျက်ဆီးသကဲ့သို့ အမ်းမြို့အဝင်အထွက်ကားလမ်းများကိုလည်းစစ်ကောင်စီက ဖေဖော်ဝါရီလ ၂၈ ရက်က မြေတူးစက်များဖြင့်တူးဖော်ဖြတ်တောက်ခဲ့သည်။စစ်ကောင်စီသည်ရခိုင်စစ်မြေပြင်တွင် အများပြည်သူအသုံးပြုနေသည့်တံတားများအား ဖောက်ခွဲဖျက်ဆီးခဲ့သည်ဟု တိုက်ပွဲအတွင်း AA ဖမ်းမိခဲ့သည့်စစ်ကောင်စီတပ်ဖွဲ့ဝင်အချို့ကထုတ်ဖော်ဝန်ခံခဲ့သည်။ ခလရ(၃၆)မှ ဆေးအရာခံဗိုလ်မျိုးခန့်၏ ထုတ်ဖော်ဝန်ခံချက်ကို AAက မတ်လ ၁၃ရက်ညတွင်ရုပ်သံဖြင့် ထုတ်ဖော်ပြသရာ၌ ဖေဖော်ဝါရီလကတိုက်ပွဲများအတွင်း ခလရ(၃၆)မှ တပ်ဖွဲ့ဝင်များသည် မအီမြို့မှဆုတ်ခွာစဉ် မအီတံတားနှင့် ကျောက်ကြီးပေါက်တံတားကို ဖောက်ခွဲဖျက်ဆီးခဲ့ကြောင်း ထုတ်ဖော်ဝန်ခံထားသည်။
အနောက်ပိုင်းတိုင်းစစ်ဌာနချုပ်ရှိရာ အမ်းမြို့တွင်ထိတွေ့တိုက်ပွဲအနည်းငယ်ရှိသော်လည်း AA အနေဖြင့် မြို့ပေါ်တွင်မူ တိုက်ပွဲဖော်ဆောင်ခြင်းမရှိသေးပေ။AAနှင့်နီးစပ်သည့်ဒေသခံသတင်းရင်းမြစ်၏ အဆိုအရ ရမ်းဗြဲမြို့သို့ စစ်ကူပို့ခဲ့သည့် အမ်းမြို့ရှိ ခြေလျင်တပ်ရင်း-ခလရ(၃၇၂)နှင့်ခလရ(၃၇၃)ကို AA ကကြားဖြတ်ချေမှုန်းနိုင်ခဲ့သဖြင့် ခလရ(၃၇၁) တပ်ရင်းတခုသာအမ်းမြို့တွင်ကျန်သည်။ထို့အပြင်အမ်းမြို့ရှိ စစ်ကောင်စီတပ်ဖွဲ့ဝင် အချို့သည် AAထံခိုလှုံသွားကြောင်းဒေသခံများကဆိုသည်။
အဆိုပါဖြစ်စဥ်နှင့်ပက်သက်၍ AA မှထုတ်ပြန်ထားခြင်းမရှိသေးသလို AA ပြောခွင့်ရ ခိုင်သုခကိုဆက်သွယ်မေးမြန်း၍မရသေးပေ။
“AA ကအပြင်စည်းကနေဝိုင်းထားနိုင်တဲ့အနေအထားပါ။ ရခိုင်တောင်ပိုင်း ရမ်းဗြဲကိုသိမ်းပိုက်နိုင်ပြီဆိုတော့ အမ်းမြို့ကိုလည်းအပြင်ကနေဝိုင်းထားတယ်”ဟု ရခိုင်လူ့အခွင့်အရေးကာကွယ်မြှင့်တင်သူများအသင်းမှဒါရိုက်တာဦးမြတ်ထွန်းကပြောသည်။
စစ်ကောင်စီသည် လတ်တလော၌ ၎င်းတို့ထိန်းချုပ်ထားသည့် မြို့နယ်များတွင် အုပ်ချုပ်ရေးယန္တရားများလည်ပတ်စေရန် အတင်းအကျပ်ဖိအားပေးရုံးတက်ခိုင်းမှုများလည်းရှိနေကြောင်း ကာယကံရှင်ဝန်ထမ်းချို့ကပြောသည်။ ထို့အပြင် ခြေကုတ်ယူထားသောစခန်းများမှနေ၍ လူနေကျေးရွာများကို ပစ်ခတ်တိုက်ခိုက်နေရာ အရပ်သားသေဆုံးမှုများရှိနေကြောင်း AAက ထုတ်ပြန်ထားသည်။
မတ်လ ၉ ရက်နေ့ ည ၁၁ နာရီခန့်ကစစ်တွေမြို့ပေါ် ရပ်ကွက်တခုပေါ်သို့ စစ်ကောင်စီပစ်သော လက်နက်ကြီးကျရောက်ပေါက်ကွဲပြီး အရပ်သားရှစ်ဦးသေဆုံးပြီး ၁၂ ဦးထက်မနည်းဒဏ်ရာရခဲ့သည်ဟုသိရသည်။ပြီးခဲ့သည့် ဖေဖော်ဝါရီလ ၂၉ ရက်က စစ်တွေမြို့အနီးရှိ စစ်ကောင်စီရေတပ်မှ ကိုးရီးယားဆိပ်ကမ်းမြို့မဈေးအား လက်နက်ကြီးဖြင့်ပစ်ခတ်တိုက်ခိုက်ခဲ့ရာ ပြည်သူ ၁၂ ဦးသေဆုံးသွားပြီး ၈၀ ဦးထက်မနည်းဒဏ်ရာရရှိသွားကြောင်း၊ စစ်ကောင်စီသည် စစ်ရာဇဝတ်မှုကိုပြောင်းပြောင်းတင်းတင်း လက်ရဲဇက်ရဲကျူးလွန်နေကြောင်းAA က သတင်းထုတ်ပြန်ခဲ့သည်။
အင်အားချိနဲ့နေသည့် စစ်ကောင်စီသည်စစ်တွေနှင့် ကျောက်ဖြူမြို့နယ်ရှိဒုက္ခသည်စခန်းမှ ရိုဟင်ဂျာဦးရေ ၁,၀၀၀ခန့်ကိုလည်းစစ်သင်တန်းပေးပြီး စစ်တိုက်ခိုင်းခဲ့ကြောင်း၊ တိုက်ပွဲများ၌ ရိုဟင်ဂျာအချို့သေဆုံးခဲ့ကြောင်း ရိုဟင်ဂျာအရေးဆောင်ရွက်သူ ရိုနေဆန်းလွင်က မဇ္ဈိမအားပြောသည်။
ရခိုင်စစ်မြေပြင်တွင် အထိနာနေသည့် စစ်ကောင်စီတပ်က မတ်လ တတိယလပတ်ထဲတွင် အနောက်ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ်ထင်လတ်ဦးအား ရာထူးမှဖယ်ရှားလိုက်သည်။၎င်း၏နေရာတွင် ခြေမြန်တပ်မဌာနချုပ် တပ်မ(၇၇ )တပ်မမှူးဗိုလ်မှူးချုပ်ကျော်ကျော်ဟန်အား အစားထိုးထားသည်ဟု တပ်တွင်းနီးစပ်သူများကဆိုသည်။
စစ်ကောင်စီတပ်သားများ မသေချင်လျှင် စောစောစီးစီးအလံဖြူထောင်ရန် ဇန်နဝါရီလအတွင်းက သတိပေးခဲ့ဖူးသည့်AA စစ်ဦးစီးချုပ်ဗိုလ်ချုပ်ထွန်းမြတ်နိုင်က ဖေဖော်ဝါရီ ၂၆ရက်က နောက်ထပ်ထုတ်ဖော်ပြောကြားချက်တခုတွင် စစ်ကောင်စီတပ် သေချာပေါက်စစ်ရှုံးနေပြီဖြစ်ပြီး လက်နက်အားကိုးဖြင့် ပြည်သူလူထုအပေါ် ဆက်လက်မိုက်တွင်းမနက်ဘဲ သားသမီးမြေးမြစ်တွေများအတွက် သိက္ခာချန်ထားခဲ့သင့်ပြီး လက်နက်ချသင့်ပြီဟုဗိုလ်ချုပ်မှူးကြီးမင်းအောင်လှိုင်နှင့်ဗိုလ်ချုပ်ကြီးများအား တိုက်တွန်းထားသည်။ ။
စာတည်း – အေးချမ်း