စစ်ကောင်စီ၏ ပဲပဒုံ စစ်ဆေးရေးဂိတ်(ဓာတ်ပုံ-CJ)
ဓါတု
(မဇ္ဈိမ)။ ။ ရက္ခိုင့်တပ်တော်(AA)မှ အမ်း-ပဒါန်း ကားလမ်းပိတ်ဆို့ပြီးနောက် စစ်ကောင်စီတပ် ဗိုလ်မှူး အပါအဝင် ဌာနဆိုင်ရာအကြီးအကဲအချို့အမ်းမြို့မှ ထွက်ပြေးသွားကြောင်း တပ်တွင်းနီးစပ်သူများထံကသိရသည်။
ဗိုလ်မှူးထင်လင်းမော်၊ တပ်ဆေးရုံမှ စစ်ဆေးဆရာဝန် နှစ်ဦး၊ အရာခံဗိုလ်တဦး၊ တပ်ကြပ်ကြီးတဦးနှင့် ခရိုင်တရားသူကြီးတို့ ဧပြီလ ပထမပတ်အတွင်း ထွက်ပြေးသွားခြင်း ဖြစ်ကြောင်း သိရသည်။
ဗိုလ်မှူးထင်လင်းမော်မှာ မကွေးတိုင်းမှ အမ်းမြို့သို့အဝင် ဂိတ်ဖြစ်သည့် ပဲပဒုံ ပူးပေါင်းစစ်ဆေးရေးဂိတ်တွင် တာဝန်ထမ်းဆောင်နေသူပြီး အမ်း တိုက်/စည်း သင်တန်းကျောင်းမှ စစ်ဦးစီး ဒုတိယတန်း ( G- 2) အဆင့် ရှိသူဖြစ်ကြောင်း သိရသည်။
၎င်းထွက်ပြေးသည့်နေ့မှာ AA က အဆိုပါကားလမ်းကို စတင်ပိတ်ဆို့သည့် ဧပြီလ ၂ ရက်တွင်ပင်ဖြစ်ကြောင်း စစ်ကောင်စီနှင့် နီးစပ်သူက ပြောသည်။
“ထင်လင်းမော်က ဗိုလ်မှူးအပွင့်တင်တာ မကြာသေးဘူး။ တော်တော်အမိန့်နာခံတာ။ အဲ့ဒီဂိတ်မှာ အလှည့်ကျထိုင်တာ ဝင်ငွေကောင်းတယ်။ AAရဲ့စာထွက်ပြီးနောက်ပိုင်း ထွက်ပြေးတာ။ ဖုန်းပါ ပိတ်ပြီး သေနတ်နဲ့စစ်အသုံးဆောင်ပစ္စည်းတွေ အကုန်ထားခဲ့တယ်။ အဲ့ဒါတွေသူတို့တပ်(တိုက်/စည်း)က လာသိမ်းသွားပြီ။ သူ့ကိုရှာမတွေ့တာတပ်က အတည်ပြုလိုက်ပြီ။ သူမထွက်ပြေးခင်ကလည်း သူ့မိတ်ဆွေ လုပ်ငန်းရှင်တွေကို လိုက်နှုတ်ဆက်ခဲ့တယ်။ ဒီလောက်လမ်းတွေပိတ်ထားတဲ့ကြားက သူဘယ်လိုထွက်ပြေးလည်းဆိုတာ စဥ်းစားစရာဖြစ်နေတယ်”ဟု တပ်တွင်းနီးစပ်သည့်သတင်းရင်းမြစ်တဦးက မဇ္စျိမကိုပြောသည်။
ထို စစ်ဆေးရေးဂိတ်သည် ငွေကြေးလာဘ်စားမှု အများဆုံးရှိသဖြင့် ယခင်ကတာဝန်ကျသည့် ဗိုလ်မှူးများမှာ လပိုင်းတွင်ပင် ပြောင်းရွေ့ခဲ့ရသော်လည်း ဗိုလ်မှူးထင်လင်းမော်မှာမူ အထက်အမိန့်အတိုင်း တသွေမတိမ်း လိုက်နာတတ်သူဖြစ်သောကြောင့် ယင်းစစ်ဆေးရေးဂိတ်တွင် တာဝန်ကျသည်မှာ တနှစ်ရှိပြီဖြစ်ကြောင်း သိရသည်။
ထွက်ပြေးသည့် ဆရာဝန် နှစ်ဦးမှာ နေ့ဖက်တွင်ဆေးကုရပြီး ညဖက်တွင် လက်နက်ငယ်ပစ္စတိုတလက်နှင့် MA အရှည်တလက်စီ ကိုင်ကာ ကင်းစောင့်နေရသဖြင့် ပင်ပန်းဒဏ် မခံနိုင်တော့ ဟုဆိုကာ ထွက်ပြေးသွားခြင်းဖြစ်ကြောင်း သိရသည်။
ထို့အတူ စစ်လက်နက်ပစ္စည်းထိန်းသိမ်းရေး တပ်မှ တပ်ကြပ်ကြီးတဦး နှင့် နပခရုံးအုပ် ဖြစ်သူ အရာခံ ဗိုလ်တဦး မှာလည်း စစ်အင်အား လုံလောက်မှု မရှိသည့် ကြားမှ နေ့ ရော ၊ ည ပါ ကင်းစောင့် နေရသောကြောင့်ထွက်ပြေးသွားခြင်းဖြစ်ကြောင်း ၎င်းတို့ နှင့်နီးစပ်သူများက ဆိုသည်။
“အမ်းမြို့ကလည်း မလွဲမသွေ မကြာခင်ကျတော့မှာဆိုတော့ ဆရာဝန်တွေက မနက်ဆေးကု ညကင်းစောင့်ရတော့မခံနိုင်တော့လို့ ထွက်ပြေးသွားတယ်။ ဘယ်လိုလမ်းကြောင်းနဲ့ထွက်ပြေးလည်းတော့မသိရဘူး။ “ဟုတပ်နှင့်နီးစပ်သူတဦးကပြောသည်။
နပခတည်ရှိရာ အမ်းတပ်နယ်တခုလုံးတွင် စစ်အင်အား မရှိတော့ကြောင်း ၊ တောင်ကုတ်တပ်မ မှ စေလွှတ်လိုက်သည့် တပ်ကူများမှာလည်း အမ်းမြို့အနီး ပြောင်သေကျေးရွာ တိုက်ပွဲတွင် ကျဆုံးသွားခြင်း၊ မင်းပြားမြို့ တိုင်းဗဟို (၉ )သင်တန်းကျောင်းမှ အမ်းမြို့သို့ ထွက်ပြေးလာသည့် အင်အား အနည်းငယ်သာရှိခြင်းတို့ကြောင့် နပခဌာနချုပ်အား AA ၏ထိုးစစ်ဝင်လာလျှင် စစ်ရှုံးနိမ့်နိုင်သည့် အနေအထားရှိနိုင်သဖြင့် ထွက်ပြေးရခြင်း ဖြစ်ကြောင်း တပ်တွင်းနီးစပ်သူများနှင့် ဒေသခံအချို့က ယူဆကြသည်။
ထို့အပြင် အမ်းခရိုင်တွင် တာဝန်ကျသည်မှာ တလခန့်သာ ရှိသေးသည့်အမ်းခရိုင်တရားသူကြီးလည်း မည်သည့် လမ်းကြောင်းဖြင့် ထွက်ပြေးသွားကြောင်း အတိအကျမသိရှိရဘဲ တရားရုံးသို့ လာရောက်ခြင်းမရှိသလို ၎င်း၏နေအိမ်တွင်လည်းမတွေ့ရှိတော့ကြောင်း သိရသည်။
အမ်းမြို့တွင် အချုပ်တရားခံများ ရန်ကုန်အင်းစိန်အကျဥ်းထောင်သို့ ပို့ဆောင်ခဲ့သဖြင့် ရာဇဝတ်မှုများ စစ်ဆေးခြင်းမရှိတော့သော်လည်း တရားမမှုများကို ခရိုင်တရားရုံးတွင် ဆက်လက်စစ်ဆေးနေသေးကြောင်း တရားမမှုရင်ဆိုင်နေရသူတစ်ဦးထံက သိရသည်။
ယမန်နေ့ ဧပြီလ ၈ ရက်ကလည်း အမ်းမြို့အထွက်တွင် စစ်ကောင်စီလက်အောက်ခံသစ်တော၊ စိုက်ပျိုးရေးနှင့် ငါးလုပ်ငန်းဦးစီးဌာနမှ မြို့နယ်အဆင့် ဦးစီးအရာရှိ သုံးဦးမှာလည်း ဆိုင်ကယ်တစီးဖြင့် ထွက်ပြေးကြရာ လမ်းခုလတ်တွင် ရက္ခိုင့်တပ်တော်(AA)နှင့် ထိပ်တိုက်တွေ့သဖြင့် စစ်ဆေးရာမှ တိမ်းရှောင်လာသည်ကိုသိရှိခဲ့ရခြင်းဖြစ်ကြောင်း AA နှင့်နီးစပ်သည့်သတင်းရင်းမြစ်တဦးကမဇ္စျိမကိုပြောသည်။
” သုံးယောက်ဆိုက်ကယ်တစီးနဲ့ အရပ်ဝတ်နဲ့ထွက်ပြေးတာ AA ကဂိတ်မှာ တောလမ်းကနေ ဆိုင်ကယ်နဲ့ပြေးလာတဲ့သူတွေကို မသင်္ကာလို့ စစ်ဆေးတော့ သစ်တော၊ စိုက်ပျိူးရေးက လူတွေဖြစ်လို့ထွက်ပြေးလာတာတဲ့။ တောလမ်းခရီးကို မုဆိုးလမ်းပြငှားရမ်းပြီး လာခဲ့ရတာဆိုလို့ ဆက်သွားခွင့်ပြုလိုက်တယ်”ဟု ၎င်းကပြောသည်။
ထို့ပြင် ယမန်နေ့ကလည်း အမ်းမြို့ လူဝင်မှုကြီးကြပ်ရေးမှ ဦးစီးမှူး ကျော်မင်းထွန်းလည်း ခွင့်ယူကာ မြို့မှ တိမ်းရှောင်ထွက်ပြေးသွားကြောင်း ဒေသခံများထံက သိရသည်။ ၎င်းသည် မိသားစုဝင်များကို ကြိုတင်တိမ်းရှောင်ခိုင်းထားပြီး ရခိုင်ပြည်နယ်အဆင့် လဝကရုံးသို့ တရားဝင်ခွင့်တင်ကာ အမ်းမြိို့မှ ရန်ကုန်မြို့သို့ လေကြောင်းခရီးစဥ်ဖြင့် ထွက်ခွာသွားပြီဖြစ်ကြောင်း သိရသည်။
ရခိုင်ပြည်နယ်ရှိ အမ်းမြို့နှင့် မကွေးတိုင်းသို့ ဆက်သွယ်ထားသည့် ကားလမ်းများတွင် စစ်ကောင်စီက စစ်အင်အားတိုးချဲ့ခြင်း၊ တပ်ပြောင်းရွှေ့ခြင်း၊ ရိက္ခာနှင့်စစ်လက်နက်ခဲယမ်းများကိုအရပ်သားကားများဖြင့်သယ်ဆောင်ခြင်း၊ လမ်းတလျှောက်မြေမြှုပ်မိုင်းထောင်ထားခြင်းများရှိသဖြင့် အဓိကကျသည့် အမ်း -ပဒါန်းလမ်းအား ဖြတ်သန်းသွားလာခြင်း မပြုကြောင်း ရက္ခိုင့်တပ်တော်(AA) ကဧပြီလ ၂ ရက်နေ့တွင် စာထုတ်ပြန်ခဲ့သည်။
ထိုသို့ထုတ်ပြန်ကြေညာပြီးနောက် အနောက်ပိုင်းတိုင်း စစ်ဌာနချုပ် (နပခ) တည်ရှိရာ အမ်းမြို့မှ စစ်ကောင်စီ တပ်ဖွဲ့ဝင်များနှင့် စစ်ကောင်စီလက်အောက်ခံ ဝန်ထမ်းများ တရွေ့ရွေ့ထွက်ပြေးတိမ်းရှောင်မှုများရှိကြောင်း ဒေသခံများထံက သိရသည်။
လက်ရှိအခြေအနေအရ အမ်းမြို့တွင် နှစ်ဖက်ထိတွေ့တိုက်ပွဲမရှိသော်လည်း မြို့နှင့်အနီးအနား တစ်ဝိုက်ရှိတောင်တန်းများကို စစ်ကောင်စီက ဂျက်လေယာဥ်များဖြင့် နေ့စဥ်ခြောက်လှန့်ပစ်ခတ်နေကြောင်းဒေသခံများကဆိုသည်။
ရက္ခိုင့်တပ်တော်(AA)အနေဖြင့် ရခိုင်ပြည်နယ်ရှိ မြို့ကိုးမြို့ကိုသိမ်းပိုက်ထိန်းချုပ်ထားနိုင်ပြီး စစ်ကောင်စီနှင့်နှစ်ဖက်ထိတွေ့တိုက်ပွဲမှာ ငါးလတာနီးပါးကြာမြင့်လာပြီး စစ်ရေးတင်းမာနေဆဲဖြစ်သည်။
စာတည်း။ ။အောင်ကျော်ဖြိုး
