ရခိုင်ပြည်နယ်ရှိစစ်ကောင်စီတပ်သား/ဓာတ်ပုံ -AFP (ပုံဟောင်း)
ဓါတု
(မဇ္ဈိမ)။ ။ သံတွဲမြို့ပေါ်ရှိ စေတီဘုရားများတွင် အကာကွယ်ယူ၍ အထိုင်ချသောစစ်ကောင်စီတပ်သည် လက်နက်ကြီးများနှင့် သံတွဲမြို့ လူနေရပ်ကွက်များထံ ပစ်ခတ်နေသဖြင့် သုံးရက်အတွင်း
အရပ်သားခြောက်ဦးသေဆုံးခဲ့ကြောင်း ဒေသခံများထံက သိရသည်။
သံတွဲမြစ်၏ တစ်ဖက်တစ်ချက်စီရှိ ထင်ရှားသောနာမည်ကြီး အံတော်၊ နံတော်တောင်ဘုရားများတွင် တပ်စွဲထားသောစစ်ကောင်စီ အမြောက်တပ်များက ဇွန်လ ၂၁ ရက်မှ ယနေ့ ဇွန်လ ၂၃ ရက်နံနက်ပိုင်းအထိ လက်နက်ကြီးဖြင့် ပစ်ခတ်နေကြောင်း သိရသည်။
” အမှတ် (၁ ) ရပ်ကွက်က အံတော်တောင်ဘုရားရယ်၊ ရွှေကျောင်းပြင်ကနံတော်တောင်ဘုရားတွေမှာ အကာကွယ်ယူပြီးဆက်တိုက်ပစ်နေတယ်။ လက်နက်ကြီးတွေနဲ့ ရမ်းပစ်နေတာ တချို့ဘယ်ကိုကျလို့ကျမှန်းတောင် မသိရတော့ဘူး” ဟု ဒေသခံက ပြောသည်။
ယမန်နေ့ ဇွန်လ ၂၂ ရက်ည ၇ နာရီဝန်းကျင်တွင် နံတော်ဘုရားတောင်ကုန်းများပေါ်မှစစ်ကောင်စီမှပစ်ခတ်သည့်လက်နက်ကြီးကြောင့် အရပ်သား သက်လတ်ပိုင်းအမျိူးသမီးတဦးနှင့်၎င်း၏တူတော်စပ်သူ အသက် ကိုးနှစ်အရွယ် ကလေးငယ်တဦးသေဆုံးသွားကြောင်းသိရသည်။
ထို့အပြင် ယနေ့ဇွန်လ ၂၃ ရက် နံနက် ၁၀ နာရီဝန်းကျင်တွင်လည်း အမှတ်(၁)အထက်တန်းကျောင်းမျက်စောင်းထိုးတံတားတဖက်မှ ရွှေကျောင်းပြင်သို့သွားသည့် ကားတစီးကိုလည်းပစ်ခတ်ရာ ကားမောင်းသူတဦးသေဆုံးသွားကြောင်းဒေသခံသတင်းရင်းမြစ်၏အဆိုအရသိရသည်။
ပြီးခဲ့သည့်ဇွန်လ ၂၁ ရက်တွင်လည်း စစ်ကောင်စီ၏လက်နက်ကြီးကြောင့် သံတွဲမြို့ပေါ်တွင် အရပ်သား သုံးဦးအပါအဝင်ကျွဲ၊နွား တိရစ္ဆာန်များလည်းသေဆုံးသွားကြောင်းသိရသည်။
လက်ရှိ တိုက်ပွဲအခြေအနေကြောင့် မြို့ပေါ်နေဒေသခံများမှာကုန်စျေးနှုန်းများမြင့်တက်နေသည့်အပြင် အခြေခံစားသောက်ကုန်များပြတ်လပ်လာသဖြင့်ဝယ်ယူရန်ခက်ခဲနေသည်။
ထို့အပြင် ဆန်ကုန်သည်များကိုလည်းစစ်ကောင်စီက မရောင်းချရန်သတိပေးနေခြင်းနှင့် ဆန်ဂိုဒေါင်အချို့ကိုလည်း ချိတ်ပိတ်နေမှုကြောင့် ဆန်ကြမ်းကိုပင် အရပ်သားများမှာ ကုန်စုံဆိုင်၊စတိုးဆိုင်အသေးများမှ အကန့်သတ်ဖြင့်သာဝယ်ယူနေရကြောင်းသံတွဲမြို့ခံများကဆိုသည်။
စေတီဘုရားပေါ်များသာမက သံတွဲမြို့ဘားဒေါင့်ဂိတ်ရှိ အရပ်သားအစိုးရလက်ထက်ကဆောက်လုပ်ခဲ့သော အစိုးရအရာရှိများနေထိုင်သည့်ဝန်းထမ်းအိမ်ယာတွင်လည်းစစ်ကောင်စီတပ်က အထိုင်ချတပ်စွဲထားသည်။
ယမန်နေ့က သံတွဲမြို့ပေါ် တွင်လက်နက်ကြီးများအပြင် Y-12 လေယာဥ်ဖြင့်လေကြောင်းမှလည်းဗုံးကြဲတိုက်ခိုက်မှုများရှိကြောင်းဒေသခံများကဆိုသည်။
လက်ရှိသံတွဲမြို့ပေါ်တွင် အာရက္ခတပ်တော်(AA)နှင့်နှစ်ဘက်ထိတွေ့တိုက်ပွဲပြင်းထန်နေပြီး ယနေ့ နံနက်ပိုင်းအထိ လက်နက်ကြီး၊ မောင်းပြန်လက်နက်ငယ်သံများလည်း ကြားနေရကြောင်းတိုက်ပွဲဖြစ်ပွားသည်နေရာနှင့်နီးသော မြို့ခံများထံသိရသည်။
ရခိုင်နှင့် ထိစပ်နေသော ပလက်ဝဒေသအပါအဝင် ဘူးသီးတောင်၊ ရသေ့တောင်၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ မြေပုံ၊ ပေါက်တော၊ ရမ်းဗြဲမြို့တို့ကို စစ်ကောင်စီကလက်လွှတ်ထားရသည်။
လက်ရှိတွင် သံတွဲ၊ တောင်ကုတ်၊ မောင်တောနှင့်အမ်းမြို့နယ်တို့တွင်နှစ်ဘက်တိုက်ပွဲများ ပြင်းထန်နေပြီးစစ်ရေးတင်းမာနေသည်။
စာတည်း။ ။အောင်ကျော်ဖြိုး