(၇၄)နှစ်မြောက် လွတ်လပ်ရေးနေ့ စစ်ရေးပြအခမ်းအနားမှ စစ်ကောင်စီတပ်သားများ/(ဓာတ်ပုံ- စစ်ကောင်စီ )
ဓါတု
(မဇ္ဈိမ)။ ။ မန္တလေးတိုင်း၊ သာစည်မြို့နယ် ဘူးရုံကျေးရွာတွင် စစ်မှုထမ်းမည့်သူများအတွက် ထောက်ပံ့ကြေးကို တအိမ်လျှင် ကျပ် ၂၀၀,၀၀၀ ပေးဆောင်ရန် ကျောင်းထိုင်ဘုန်းကြီးမှ ဦးဆောင်စီစဥ်နေကြောင်း ရွာခံများထံသိရသည်။
ပြီးခဲ့သည့် မတ်လ ၃၀ ရက်က စစ်မှုထမ်းမည့်စာရင်းတွင် ပါဝင်သူများကို ကျေးရွာအုပ်စု အုပ်ချုပ်ရေးမှူးမှတဆင့် ဆင့်ခေါ်ခိုင်းရာ ယင်းအုပ်ချုပ်ရေးမှူးဖြစ်သူ ဦးဇော်လင်းမှာ ထွက်ပြေးတိမ်းရှောင်နေသဖြင့် အဆိုပါကျေးရွာရှိ ရေလည်ဘုန်းကြီးကျောင်းမှ ကျောင်းထိုင်ဘုန်းကြီးက စီစဥ်နေခြင်းဖြစ်ကြောင်း ရွာခံတဦးက မဇ္စျိမကိုပြောသည်။
“မြို့နယ်စစ်မှုထမ်းဆင့်ခေါ်ရေးအဖွဲ့က အထက်က စာကျတယ်ဆိုပြီး ကျေးရွာအုပ်ချုပ်ရေးမှုးကို လုပ်ခိုင်းတာ သူကမလုပ်ချင်တော့ ထွက်ပြေးသွားတယ်။ အဲ့ဒါကို မဘသကျောင်းထိုင်ဘုန်းကြီးက ဆင့်ခေါ်ပြီးအစည်းဝေးလုပ်ပေးတာ ငွေကောက်ဖို့ပြောတာရော စစ်မှုထမ်းကိစ္စအတွက် ကျေးရွာအစည်းဝေးလုပ်လို့မလာရင်လည်း မြို့နယ်ထွေအုပ်ရုံးနဲ့ ခေါ်ခိုင်းမယ်ဆိုပြီး အဲ့ဒီဘုန်းကြီးက ခြိမ်းခြောက်တယ်”ဟု ၎င်းက ပြောသည်။
ကျေးရွာအုပ်စုအုပ်ချုပ်ရေးမှူးသည် ရွာမှထွက်ခွာ တိမ်းရှောင်သွားသဖြင့် လတ်တလောတွင် ရေလည်ကျောင်းမှ ကျောင်းထိုင်ဘုန်းကြီးမှာ အရှင်နန္ဒသီရိဖြစ်ပြီး စစ်ကောင်စီလက်အောက်ခံ ကျေးရွာအခွဲ အုပ်ချုပ်ရေးမှူးဖြစ်သူ ဦးမြင့်ခင်နှင့် ရာအိမ်မှူး ဦးမောင်လွင်တို့နှင့်အတူ ပူးပေါင်းစီစဥ်ခြင်းဖြစ်ကြောင်း သိရသည်။
“အခု ရွာထဲစာရင်းပါတဲ့ကလေးတွေ ၁၄ ယောက်ပါတယ်။ အခုစစ်မှုထမ်းမယ့်သူတွေကို ထောက်ပံ့ကြေးပေးမယ့်ကိစ္စတွေပြောဖို့ အစည်းဝေးခေါ်ဖို့ လာခိုင်းတာ ကျေးရွာကမလာကြလို့ မြို့နယ်အဖွဲ့ကို ဒီကိစ္စတွေလုပ်ခိုင်းမယ်ဆိုပြီးပြောတာ”ဟု ဘူးရုံကျေးရွာခံတဦးကပြောသည်။
ယင်းဘူးရုံကျေးရွာမှာ သာစည်မြို့မှ ခြောက်မိုင်အကွာတွင်ရှိပြီး အိမ်ခြေ ၁၅၀ ဝန်းကျင်နေထိုင်ကြောင်း သိရသည်။
ထိုကဲ့သို့ ငွေညှစ်တောင်းရန်စီစဥ်နေခြင်းအပြင် စစ်မှုထမ်းရန်ဆင့်ခေါ်နေခြင်းကြောင့် ဒေသခံများမှာ စိုးရိမ်ထိတ်လန့်နေရကြောင်း သိရသည်။
စစ်ကောင်စီအနေဖြင့် စစ်မှုမထမ်း မနေရဥပဒေအရ အပတ်စဥ်များအတွက် ဆင့်ခေါ်ခြင်းကို လာမည့် ဧပြီလ သင်္ကြန်ကာလအပြီးမှသာ အကောင်အထည်ဖော်ဆောင်ဟု ကြေညာထားသော်လည်း လက်ရှိတွင် အတင်းအကျပ်ခေါ်ဆောင်၍ စစ်သင်တန်းပေးခြင်းများ လုပ်ဆောင်လျက်ရှိသည်။
စာတည်း – သန့်ဇော်(သန်လျင်)
