YT
မဇ္ဈိမ။ ။ မွန်ပြည်နယ်၊ ကျိုက်မရောမြို့နယ်၊ ကော့သတ်ရွာနှင့် သံကလောင်ရွာတွင် စစ်ကောင်စီတပ်နှင့် ထိတွေ့တိုက်ပွဲဖြစ်ပွားခဲ့ပြီး နှစ်ဖက် ထိခိုက်၊ ကျဆုံးမှု ရှိခဲ့ကြောင်း မွန်ပြည်သစ်ပါတီ (စစ်အာဏာရှင်တိုက်ဖျက်ရေး) NMSP- AD ပြောခွင့်ရ နိုင်ဗညားမွန်က မဇ္ဈိမကိုပြောသည်။
ယမန်နေ့ (ဧပြီလ ၁၉ ရက်) နံနက် ၇ နာရီအချိန်မှစ၍ နေ့လယ်ပိုင်းအထိ ကော့သတ်ရွာနှင့် သံကလောင်ရွာတွင် NMSP- AD ပူးပေါင်းတပ်ဖွဲ့နှင့် စစ်ကောင်စီတပ်အကြား တိုက်ပွဲဖြစ်ပွားခဲ့ခြင်း ဖြစ်သည်။
” မနေ့ကတော့ တိုက်ပွဲဖြစ်တယ်၊ တိုက်ပွဲဖြစ်တဲ့ခါကျတော့ နှစ်ဖက်ထိခိုက်၊ ကျဆုံး၊ဒဏ်ရာရတာတွေရှိတယ်။ တိုက်ပွဲကတော့ ကော့သတ်မှာ ဖြစ်တယ်၊ တခြားနေရာမှာလည်း ဖြစ်တယ်။” ဟု NMSP- AD ပြောခွင့်ရ နိုင်ဗညားမွန်က မဇ္ဈိမကိုပြောသည်။
တိုက်ပွဲအတွင်း စစ်ကောင်စီတပ်ဘက်၌သာမက NMSP-AD ပူးပေါင်းတပ်ဖွဲ့ဘက်တွင်ပါ ထိခိုက်၊ ကျဆုံးမှုရှိကြောင်း NMSP- AD ကပြောသော်လည်း အရေအတွက် အတိအကျကို ပြောဆိုခြင်း မရှိခဲ့ပေ။
စစ်ကောင်စီ ဝါဒဖြန့် တယ်လီဂရမ်ချန်နယ်များတွင်မူ ကော့သတ်ရွာတိုက်ပွဲအတွင်း တော်လှန်ရေးပူးပေါင်းတပ်ဖွဲ့၏ အလောင်းငါးလောင်းနှင့် သေနတ် ခုနစ်လက် သိမ်းဆည်းရမိခဲ့ကြောင်း ဖော်ပြနေကြသည်။
အဆိုပါ တိုက်ပွဲအတွင်း စစ်ကောင်စီတပ်က လူနေကျေးရွာအတွင်းသို့ လက်နက်ကြီး ရမ်းသန်းပစ်ခတ်မှုများလည်း ပြုလုပ်ခဲ့ပြီး လူထိခိုက်မှု မရှိကြောင်း ဒေသခံထံက သိရသည်။
ကော့သတ်ရွာနှင့် သံကလောင်ရွာသည် စစ်ကောင်စီ၏ လေကြောင်းတိုက်ခိုက်မှုနှင့် စစ်သင်္ဘောမှ ပစ်ခတ်မှုတို့ကြောင့် နေအိမ် ၄၀၀ နီးပါး မီးလောင် ဆုံးရှုံးခဲ့ရသည့် ဓမ္မသရွာသို့ သွားနိုငသည့် လမ်းကြောင်းပေါ်တွင် တည်ရှိသည့် ရွာများဖြစ်သည်။
စာတည်း – သန့်ဇော်(သန်လျင်)
