ပုံအညွှန်း- KNLA ပူးပေါင်းတပ်များ တိုက်ခိုက်သိမ်းပိုက်ထားသည့် ခမရ (၄၃၄) တပ်ရင်း (ဓါတ်ပုံ- MOD)
YT
(မဇ္ဈိမ)။ ။ ကရင်ပြည်နယ်၊ ဖာပွန်မြို့နယ်တဝိုက်တွင် ကျန်ရှိနေဆဲ စစ်ကောင်စီတပ်ရင်းများနှင့် ကရင်အမျိုးသားလွတ်မြောက်ရေးတပ်မတော် (KNLA)အကြား ဆက်လက်၍ တိုက်ပွဲများဖြစ်ပွားနေကြောင်း KNU တပ်မဟာ (၅)ပြောရေးဆိုခွင့်ရှိသူ ဒုတိယဗိုလ်မှူးကြီး စောကလယ်ဒို့က ပြောသည်။
စစ်ကောင်စီ၏ အရှေ့တောင်တိုင်းစစ်ဌာနချုပ်(ရတခ)လက်အောက်ခံ ခြေမြန်တပ်ရင်း ခမရ(၃၄၀)၊ (၃၄၁)နှင့် စစ်ဗျူဟာအခြေချ( စဗခ-၁)ဖာပွန်ဗျူဟာကုန်းတို့ကို KNLA ပူးပေါင်းတပ်က ဆက်လက်၍ တိုက်ခိုက်နေခြင်းပြီး စစ်ကောင်စီကလည်း လေကြောင်းကို အသုံးပြုကာ ခုခံတိုက်ခိုက်လျက်ရှိကြောင်း သိရသည်။
” စစ်ကောင်စီတပ်ဖွဲ့တွေရှိတာကတော့ ဖာပွန်ရဲ့အောက်ဘက် သုံးမိုင်လောက်အကွာမှာ စဗခ (၁) ဗျူဟာကုန်း (ဖာပွန်ဗျူဟာ) ဆိုတာရှိတယ်။ နောက်ပြီးတော့ ဘေးတဖက်တချက်မှာ ခမရ (၃၄၀) ရယ်၊ (၃၄၁) ရယ် စခန်းသုံးခုလုံးက ဆက်နေတယ်။ သုံးခုလုံးကတော့ (စစ်ကောင်စီတပ်သားတွေ) ရှိနေတုန်းပဲ။ ဒီလိုရှိနေတဲ့အပေါ်မှာ တိုက်ပွဲကတော့ ဆက်လက်ပြီးတော့ ဖြစ်နေတုန်းပဲ။ တရက်နှစ်ရက် တခါ ၊ အဲ့ဒီလို တိုက်ပွဲအမြဲတော့ ဖြစ်တယ်။ စစ်ကောင်စီဘက်က လေယာဉ်နဲ့ ပစ်ကူအနေနဲ့ နေ့တိုင်းလာပြီးပစ်
တယ်” ဟု ဒုတိယဗိုလ်မှူးကြီး စောကလယ်ဒို့က ပြောသည်။
ဖာပွန်မြို့နယ်တဝိုက်တွင် စစ်ကောင်စီ၏ ခြေလျင်တပ်ရင်း ခလရ (၁၉)၊ ခြေမြန်တပ်ရင်း ခမရ (၃၄၀)၊ ခမရ (၃၄၁)၊ ခမရ (၄၃၄) နှင့် စစ်ဗျူဟာအခြေချ (စဗခ) (၁) ဖာပွန်ဗျူဟာ၊ စစ်လက်နက်ပစ္စည်းတပ်( စစန -၆၄၂) စသည့် စစ်ကောင်စီအထိုင်ချ တပ်ရင်းများရှိကြောင်း သိရသည်။
အဆိုပါ အထိုင်ချ တပ်ရင်းများကို ပြီးခဲ့သည့် မတ်လ ၁၉ ရက်နေ့မှစ၍ KNLA၊ PDF ပူးပေါင်းတပ်ဖွဲ့များက ပိတ်ဆို့ တိုက်ခိုက်ရာမှ တိုက်ပွဲများ စတင်ခဲ့ပြီး တိုက်ပွဲကာလ တလကျော်အတွင်း စစ်ကောင်စီ၏ ခလရ (၁၉)၊ စစန (၆၄၂)နှင့် ခမရ (၄၃၄) တို့ကို KNLA ပူးပေါင်းတပ်က တိုက်ခိုက် သိမ်းပိုက်ထားသည်။
ထို့ပြင် KNU တပ်မဟာ (၅) နယ်မြေ၊ ဖာပွန်မြို့နယ်တဝိုက် အခြေချနေသည့် ဖာပွန်ဗျူဟာ၏ လက်အောက်ခံ ရှေ့တန်းစခန်းများ၏ ဆက်သွယ်ရေး၊ ရိက္ခာလမ်းကြောင်းများကိုလည်း KNLA ပူးပေါင်းတပ်များက ပိတ်ဆို့မှုများ ပြုလုပ်နေကြောင်း သိရသည်။
လက်ရှိတွင် ဖာပွန်မြို့နယ်မှ ဒေသခံပြည်သူများသည် တိုက်ပွဲများကြောင့် ကမမောင်းမြို့နှင့် နီးစပ်ရာ တောအစပ်များ၊ KNU ထိန်းချုပ်နယ်မြေများတွင် ပြောင်းရွှေ့ကာ စစ်ဘေးရှောင်နေကြရကြောင်း သိရသည်။
” မြို့ထဲမှာတော့ စစ်ဘေးရှောင်ပြည်သူတွေက ပြန်နေလို့မရသေးဘူး။ ဘာလို့လဲဆိုတော့ စစ်ကောင်စီရဲ့ ပစ်ကူလေယာဉ်တွေက နေ့တိုင်းလာပစ်နေတဲ့အပေါ်မှာ ပြည်သူတွေက ပြန်နေလို့ မရဲသေးဘူး။ ပြန်နေလို့ရအောင်ဆိုရင် စစ်ကောင်စီတပ်စခန်းတွေ အကုန်လုံးရှင်းမှပဲ ရမယ်။ ” ဟု ဒုတိယဗိုလ်မှူးကြီး စောကလယ်ဒို့က ဆက်လက်ပြောဆိုသည်။
ထို့ပြင် စစ်ဘေးရှောင်များအတွက် မကြာမီ မိုးရာသီရောက်တော့မည်ဖြစ်သဖြင့် အမိုးအကာများနှင့် စားနပ်ရိက္ခာ၊ ဆေးဝါးများ လိုအပ်နေကြောင်း KNU တပ်မဟာ (၅) ပြောခွင့်ရပုဂ္ဂိုလ်နှင့် စစ်ဘေးရှောင် အကူအညီပေးနေသူထံက သိရသည်။
စာတည်း – သန့်ဇော်(သန်လျင်)
