မင်းစုံတောင်ဘေးမဲ့တော
008
(မဇ္ဈိမ)။ ။မန္တလေးတိုင်း၊နွားထိုးကြီးမြို့နယ်၊မင်းစုံတောင်သဘာဝဘေးမဲ့တောတွင် စစ်ကောင်စီတပ်ဖွဲ့နှင့်ပူးပေါင်းပြီး သစ်ခိုးထုတ်နေသည့်အဖွဲ့ကို ဖမ်းဆီးခဲ့ပြီး သစ်သယ်သည့် ထော်လာဂျီယာဥ်ကို မီးရှို့ ဖျက်ဆီးခဲ့ကြောင်း နွားထိုးကြီးမြို့နယ်ပြည်သူ့ကာကွယ်ရေးတပ်ဖွဲ့ကပြောသည်။
မင်းစုံတောင်သဘာဝဘေးမဲ့တောအတွင်း သစ်ခိုးထုတ်နေသည့်အဖွဲ့ကို ပြည်သူ့ကာကွယ်ရေးတပ်ဖွဲ့ဝင်များက ဒီဇင်ဘာ ၂၅ရက် ညနေ ၄နာရီ၃၀မိနစ်ခန့်တွင် ရှောင်တခင် ဝင်ရောက်စစ်ဆေးပြီး ဖမ်းဆီးခဲ့ခြင်းဖြစ်သည်။
“ချစ်ညီကိုနာမည်တပ်ထားတဲ့ ပုဇင်းခေါင်းထော်လာဂျီတစီးနဲ့သစ်ခိုးထုတ်နေတဲ့လေးဦးဖမ်းဆီးရမိတယ်။သူတို့ကို စစ်ဆေးပြီး နောက်နောင်မလုပ်ဖို့ သတိပေး ပြန်လွှတ်ပေးလိုက်တယ်” ဟု နွားထိုးကြီးမြို့နယ် ပြည်သူ့ကာကွယ်ရေးတပ်ဖွဲ့ဝင်တဦးကပြောသည်။
မင်းစုံတောင်သဘာဝဘေးမဲ့တောမှသစ်များ ခိုးထုတ်ခြင်းမပြုရန် အကြိမ်ကြိမ်သတိပေးခဲ့သော်လည်း သစ်မှောင်ခိုသယ်သူအချို့က လိုက်နာမှုမရှိဘဲ စစ်ကောင်စီနှင့်ပူးပေါင်း၍ သစ်ခိုးထုတ်ယူနေကြသည်ဟု ပြည်သူ့ကာကွယ်ရေးတပ်ဖွဲ့ဝင်များက ပြောသည်။
“ခိုးထုတ်နေတဲ့သူတွေက ကျွန်တော်တို့နယ်သားတွေမဟုတ်ဘူး။တောင်သာဘက်က လာထုတ်တာများတယ်။ကျွန်တော်တို့လည်း အရင်ကတားသေးတယ်။မရဘူး။သူတို့က စစ်တပ်ကို ငွေပေးပြီးခုတ်တာလို့ပြောတယ်။နေ့ ည လာခိုးသယ်နေကြတာပဲ။အခုတော့ PDF ကဝင်ဖမ်းလိုက်တယ်”ဟု ဒေသခံတဦးကပြောသည်။
သစ်ခိုးထုတ်သူများသည် နွားထိုးကြီးမြို့နယ်၊ထွေအုပ်ရုံးတွင် အထိုင်ချထားသည့် စစ်ကောင်စီတပ်ဖွဲ့ကို ထော်လာဂျီယာဉ်တစီး သုံးသိန်းကျပ်၊ခြောက်ဘီးကုန်တင်ယာဥ်တစီး ငါးသိန်းကျပ်ပေးရကြောင်း သိရသည်။
“တလ တခါပေးရတယ်။လွှစက်တို့ ဖြတ်စက်တို့အတွက်လည်း ငါးသောင်း တသိန်း အစားစားပေးရတယ်”ဟု ဒေသခံကတဦးကဆိုသည်။
ပြည်သူ့ကာကွယ်ရေးတပ်ဖွဲ့များ ရှောင်တခင်စစ်ဆေးဖမ်းဆီးမှုပြုလုပ်ပြီးနောက် ယနေ့ ဒီဇင်ဘာ ၂၇ရက်နံနက်တွင် သစ်ခိုးထုတ်သူများ လာရောက်သည်ကို မတွေ့ရကြောင်း ဒေသခံများက ပြောသည်။
“အရင်ဆို မနက်လင်းတာနဲ့ သစ်ခိုးမယ့်ကောင်တွေက တောင်ခြေရောက်နေကြပြီ။ အခုတော့ မတွေ့ရတော့ဘူး”ဟု ဒေသခံတဦးကဆိုသည်။
မင်းစုံတောင်သဘာဝဘေးမဲ့တောအတွင်းတွင် သစ်ခိုးထုတ်မှုများဆက်လက်လုပ်ကိုင်နေသည်ကို တွေ့ရှိပါက ပြင်းပြင်းထန်ထန်အရေးယူသွားမည်ဟု ပြည်သူ့ကာကွယ်ရေးတပ်ဖွဲ့များက သတိပေးထားသည်။
မင်းစုံတောင်သဘာဝဘေးမဲ့တောသည် ရှားပါးစာရင်းဝင်ဖြစ်သည့် မြန်မာ့မျိုးရင်းကြယ်လိပ်များအပြင် ငှက်မျိုးစိတ်ပေါင်း ၇၀ကျော်နှင့် ကုန်းနေရေနေသတ္တဝါများလည်းကျက်စားနေထိုင်သည်။အလယ်ပိုင်းဒေသခြောက်သွေ့ဇုန်ဂေဟစနစ်ကို ထိန်းသိမ်းနိုင်ရေးအတွက် ၂၀၀၁ ခုနှစ်မှစ၍ ဘေးမဲ့တောအဖြစ် သတ်မှတ်ခဲ့ကြောင်း သိရသည်။
စာတည်း – အေးချမ်း
