AFP
ထိုင်းနိုင်ငံတောင်ပိုင်းတွင် ရေကြီးရေလျှံမှုများကြောင့် လူခြောက်ဦးထက်မနည်း သေဆုံးပြီး အိမ်ထောင်စုသောင်းချီ ရေဘေးဒဏ်ခံရကြောင်း အာဏာပိုင်များက ဒီဇင်ဘာ ၂၇ ရက်တွင် ပြောသည်။
ဒီဇင်ဘာ ၂၂ ရက်က စတင်ပေါ်ပေါက်သည့် ရေကြီးမှုများက စထွန်း၊ ဆောင်ခလာ၊ ပတ္တာနီ၊ ယာလာနှင့် နရသီဝတ် ပြည်နယ်များ၌ လူနေအိမ် ၇၀,၀၀၀ ကျော်ကို ထိခိုက်စေကြောင်း ဒေသတာဝန်ရှိသူများက ပြောသည်။
နရသီဝတ်တွင် အသက် ၈၉ နှစ်ရှိ သက်ကြီးအမျိုးသမီးတဦးနှင့် လမ်းလျှောက်ခါစ ကလေးတဦး အပါအဝင် လူခြောက်ဦး သေဆုံးကြောင်း ပြည်နယ်ဒုတိယအုပ်ချုပ်ရေးမှူး ပရီချာ နူအယ်နွိုင်က အေအက်ဖ်ပီကို ပြောသည်။
နေရာတချို့တွင် အမြင့်သုံးမီတာခန့်အထိ ရောက်စေခဲ့သည့် ရေလွှမ်းမိုးမှုတို့ကို ဖြစ်စေသော ရက်ဆက်ကြာ မိုးသည်းထန်စွာ ရွာသွန်းပြီးနောက် နောက်ထပ် လူတဦး ပျောက်ဆုံးနေဆဲဖြစ်ကြောင်း ၎င်းက ပြောသည်။
ရေကြီးမှုကြောင့် ရေလွှမ်းခံထားရသည့် လမ်းများနှင့် ဒေသခံများ အိမ်ခေါင်းမိုးများပေါ် တက်ကာ ခိုလှုံနေရသည့် ရုပ်သံတခုကို ပြည်တွင်းမီဒီယာက ဖော်ပြသည်။
ရေဘေးသင့်ပြည်သူများကို သောက်ရေဘူးများနှင့် မုန့်များ ဝေငှရန်နှင့် ထိခိုက်ပျက်စီးမှု သို့မဟုတ် သေကျေဒဏ်ရာရမှုတို့အတွက် အဆောက်အအုံများကို စစ်ဆေးရန် ကယ်ဆယ်ရေးအသင်းများက ညပိုင်းအထိ အလုပ်လုပ်ခဲ့ကြသည်။
ဒီဇင်ဘာ ၂၇ ရက် မနက်ပိုင်းတွင် ရေလယ်ဗယ် ကျဆင်းသွားကြောင်း ထိုင်းနိုင်ငံ၏ သဘာဝဘေးအန္တရာယ် ကာကွယ်ရေးနှင့် လျော့ပါးစေရေးဌာနက ပြောသည်။
လမ်းပိုင်းကျွံဝင်မှုကြောင့် ရက်များကြာ ပိတ်ထားရပြီးနောက် မလေးရှားနှင့် နယ်စပ် နရသီဝတ်ပြည်နယ်၌ မီးရထားပြေးဆွဲမှုတချို့ ပြန်လည်စတင်ပြီဖြစ်ကြောင်း ပရီချာက ပြောသည်။
ထိုင်းနိုင်ငံ၌ မိုးရာသီတွင် ပုံမှန်အားဖြင့် လများနှင့်ကြာ နေ့စဉ် မိုးသည်းထန်စွာရွာသွန်းမှုတို့ကို ဖြစ်ပေါ်စေသည် ဆိုသော်လည်း လူကြောင့်ဖြစ်စေသည့် ရာသီဥတု ပြောင်းလဲမှုက မိုးရေချိန်တို့ကို ပို၍ အလွန်အကျွံဖြစ်စေသည်ဟု သိပ္ပံပညာရှင်တို့က ပြောသည်။
၂၀၁၁ ခုနှစ်ကလည်း ယင်းနိုင်ငံတဝန်း ပျံ့နှံ့ဖြစ်ပေါ်သော ရေကြီးမှုတို့ကြောင့် လူရာချီ သေဆုံးပြီး နေအိမ်သန်းချီ ထိခိုက်ပျက်စီးခဲ့သည်။
