YT
မဇ္ဈိမ။ ။ ပဲခူးတိုင်း အနောက်ခြမ်း၊ သာယာဝတီခရိုင်၊ လက်ပံတန်းမြို့နယ်၊ ရေငံကျေးရွာအုပ်စုတွင် စစ်ကောင်စီလက်အောက်ခံ ရဲ၏ ဖခင်၊ စစ်ဗိုလ်၏ မိဘများနှင့် ပညာရေးဝန်ထမ်းနှင့် ၎င်း၏ အစ်မဖြစ်သူ စုစုပေါင်း လူ ငါးဦး သေနတ်ဖြင့် ပစ်ခတ်ခံရပြီး သေဆုံးသွားကြောင်း ဒေသခံထံက သိရသည်။
အဆိုပါ လူငါးဦးသည် စစ်ကောင်စီ၏ သတင်းပေး ဒလန်များဖြစ်၍ မတ်လ ၁၄ ရက်နေ့၊ ည ၈ နာရီ ၃၀ မိနစ်အချိန်တွင် ဝင်ရောက်ပစ်ခတ် ရှင်းလင်းခဲ့ခြင်းဖြစ်ကြောင်း ရွှေတန်းမြေပြည်သူ့ကာကွယ်ရေးတပ်ဖွဲ့က ယနေ့ မတ်လ ၁၅ ရက်နေ့တွင် ထုတ်ပြန်ဖော်ပြထားသည်။
” သေတာ အားလုံးပေါင်း ငါးယောက်။ သေနတ်နဲ့ အပစ်ခံရတာချည်းပဲ။ မကျီးကွင်းကျောင်းက ဆရာမတယောက်ပါတယ်။ PDF တွေ လာလုပ်သွားတယ်လို့ ကြားတာပဲ သေချာမသိဘူး” ဟု လက်ပံတန်း သတင်းရင်းမြစ်က မဇ္ဈိမကိုပြောသည်။
ပစ်ခတ်ခံရသူများသည် သရက်တောရွာနေ ရဲတပ်သား၏ ဖခင်ဖြစ်သူ အသက် ၅၀ အရွယ် ကိုအောင်ထွန်းဝင်း၊ စစ်ကောင်စီလက်အောက်ရှိ စစ်ဗိုလ်တဦး၏ မိဘများဖြစ်သည့် အသက် ၆၁ နှစ်အရွယ် ဦးစိန်ဦးနှင့် အသက် ၅၆ နှစ်အရွယ် ဒေါ်လှလှရီ၊ ရေငံရွာနေ အလယ်တန်းပြ ကျောင်းဆရာမ အသက် ၄၉ နှစ်အရွယ် ဒေါ်သွယ်သွယ်ထွန်းနှင့် အစ်မဖြစ်သူ အသက် ၅၇ နှစ်အရွယ် ဒေါ်ဝင်းမင်းသန်းတို့ ဖြစ်သည်။
ဦးအောင်ထွန်းဝင်း၊ ဦးစိန်ဦးနှင့် ဒေါ်လှလှရီတို့သည် ၎င်းတို့ သားများ၏ အရှိန်အဝါဖြင့် စစ်ကောင်စီထံ သတင်းပေး၍ ပြည်သူများကို ဖမ်းဆီးခိုင်းခြင်း ပြုလုပ်နေသူများ ဖြစ်ကြောင်း၊ ကျောင်းဆရာမ မသွယ်သွယ်ထွန်းနှင့် အစ်မဖြစ်သူည်လည်း ပြည်သူများကို PDF များနှင့် ဆက်နွှယ်သည်ဟုဆိုကာ စစ်ကောင်စီထံ သတင်းပေး ဖမ်းဆီးခိုင်းမှုတို့ကြောင့် ပစ်ခတ်ခဲ့ခြင်းဖြစ်သည်ဟု ရွှေတန်းမြေပြည်သူ့ကာကွယ်ရေးတပ်ဖွဲ့က ဖော်ပြသည်။
ဦးအောင်ထွန်းဝင်း၊ ဦးစိန်ဦးနှင့် ဒေါ်လှလှရီတို့၏ စစ်ကောင်စီထံ သတင်းပေး၊ လမ်းပြမှုကြောင့် မတ်လ ၁၄ ရက်နေ့တွင် တော်လှန်ရေးရဲဘော်များ တည်ရှိရာနေရာကို ရဲများ ရောက်လာသဖြင့် ရဲဘော်များ ရှောင်တိမ်းခဲ့ရကြောင်း၊ အလားတူ ဒေါ်သွယ်သွယ်ထွန်းနှင့် အစ်မဖြစ်သူ၏ စစ်ကောင်စီထံ တိုင်တန်း ဖမ်းဆီးခိုင်းမှုကြောင့် မတ်လ ပထမအပတ်တွင် ကျောင်းဆရာတဦးနှင့် ပြည်သူနှစ်ဦး ဖမ်းဆီးနှိပ်စက်ခံနေရဆဲဖြစ်ကြောင်း ထုတ်ပြန်ချက်တွင် ဖော်ပြထားသည်။
လက်ပံတန်းမြို့မှ လူငါးဦး ပစ်ခတ်ခံရပြီး သေဆုံးသွားခြင်းဖြစ်စဉ်အသေးစိတ်နှင့် ပတ်သက်၍ မဇ္ဈိမမှ ရွှေတန်းမြေပြည်သူ့ကာကွယ်ရေးတပ်ဖွဲ့ တာဝန်ရှိသူထံ ဆက်သွယ်မေးမြန်းနေဆဲဖြစ်သည်။
စာတည်း။ ။အောင်ကျော်ဖြိုး
