ရခိုင်ပြည်နယ်တွင်း ကျေးရွာများကို လေကြောင်းမှတိုက်ခိုက်နေသည့် စစ်ကောင်စီ ရဟတ်ယာဥ်(ဓာတ်ပုံ- ပုံဟောင်း)
ဓါတု
(မဇ္ဈိမ)။ ။ ရခိုင်ပြည်နယ်၊ အမ်းမြို့အခြေစိုက် စစ်ကောင်စီ အနောက်ပိုင်းတိုင်းစစ်ဌာနချုပ်(နပခ) အနီးဖြစ်ပွားသော တိုက်ပွဲသည် ယနေ့အထိ ပြင်းထန်နေပြီး စစ်ကောင်စီတပ်ဘက်မှ အကျအဆုံးများကြောင်း ဒေသခံများထံက သိရသည်။
ယမန်နေ့ မတ်လ ၂၄ ရက်ကတည်းက ယနေ့ မတ်လ ၂၅ ရက်အထိ စစ်ကောင်စီတပ်နှင့် ရက္ခိုင့်တပ်တော်တို့ တိုက်ပွဲဖြစ်ပွားနေခြင်းဖြစ်ကြောင်း သိရသည်။
” စစ်ကောင်စီက ၄၀ လောက် ကျသွားတယ်လို့ မျက်မြင်တွေပြောလို့သိရပါတယ်။မနေ့က တိုက်ပွဲ ဖြစ်တဲ့ ပြောင်သေရွာ နဲ့ အနီးအနားတဝိုက်ရွာတွေထဲကို ဒီနေ့ မနက် ၉ နာရီ လောက် ကတည်းက အခု အထိအခု ပစ်တဲ့ ရွာတွေက AA ကို ထောက်ခံ တယ် ဆိုပြီး ရဟတ်ယာဥ် နဲ့ အငြိုးအတေး ထားပစ်တာပါ”ဟု AA နှင့် နီးစပ်သူတဦးက မဇ္စျိမကိုပြောသည်။
တိုက်ပွဲသည် နမခ နှင့် တမိုင်ခန့်အကွာသို့ ရောက်ရှိနေပြီ ဖြစ်သည်ဟုလည်း ၎င်းနှင့် အခြား သတင်းရင်းမြစ် တဦးကလည်း ဆိုသည်။
ထိုအချက်အလက်နှင့် နှစ်ဖက်တပ်၏ သေဆုံး ဒဏ်ရာရသူများ စာရင်းကို မဇ္ဈိမက သီးခြား အတည်ပြုနိုင်ရန် ကြိုးစားနေဆဲဖြစ်သည်။
ယမန်နေ့ကနပခနှင့် သုံးမိုင်အကွာ ပြောင်သေကျေးရွာတွင် AA ၏ ထိုးစစ်ဆင် တိုက်ခိုက်မှုကြောင့် တိုက်ပွဲဖြစ်ပွားခြင်းဖြစ်ပြီး စစ်ကောင်စီက ပြောင်သေကျေးရွာ အနီးတဝိုက်ရှိ ကျေးရွာများကို လေကြောင်းမှ တိုက်ခိုက်နေခြင်းဖြစ်သည်။
ယင်းပြောင်သေရွာနှင့်အနီးတဝိုက်ရှိအမ်း မြို့မှ တပ်တောင်သွားသည့် ကားလမ်းတစ်လျှောက် ကျေးရွာများ ဖြစ်သော ဝရိန်ပိုင် ၊ ပန်းတုန်း ၊ လမော ၊ ဂယ်လောင်း ၊ ညောင်ချောင်း ၊ စခန်းမော် ၊ လုံးကျေးနှင့် ပြုတ်ကျွန်းကျေးရွာများကို ယနေ့ မတ်လ ၂၅ ရက် နံနက် ၉ နာရီမှစပြီးလက်ရှိအချိန်အထိ စစ်ကောင်စီတပ်က လေကြောင်းမှ ပစ်ခတ်နေကြောင်း ဒေသခံသတင်းရင်းမြစ်တဦးကပြောသည်။
ယနေ့ ညနေပိုင်း အချိန်ထိ လေကြောင်းတိုက်ခိုက်နေဆဲဖြစ်ပြီး လုံကျေးရွာမှ နေအိမ်သုံးလုံးမီးလောင်ပျက်စီးသွားကြောင်း သိရသည်။ ကျန်ထိခိုက်မှု အခြေအနေများကို မဇ္ဈိမက စုံစမ်းနေဆဲဖြစ်သည်။
ယင်းတိုက်ပွဲအခြေအနေနှင့်ပတ်သက်၍ AA က တရားဝင် ထုတ်ပြန်ကြေညာထားခြင်းမရှိသေးပေ။
ပြီးခဲ့သည့်ဖေဖော်ဝါရီလက ယခုတိုက်ပွဲဖြစ်ပွားသည့် ပြောင်သေကျေးရွာနေဒေသခံအရပ်သားများကို စစ်ကောင်စီတပ်ဖွဲ့က ပြောင်းရွေ့ခိုင်းထားခြင်းကြောင့် ရွာအတွင်းအရပ်သားများမရှိကြောင်းသိရသည်။
သို့သော် ယင်းကျေးရွာနှင့်ထိစပ်သောကျေးရွာများတွင်နေထိုင်သူများရှိနေ၍ အရပ်သားများတည်ရှိရာသို့စစ်ကောင်စီတပ်မှ ယမန်နေ့ ကစ၍နှစ်ရက်ဆက်တိုက်လေကြောင်းမှပစ်ခတ်နေခြင်းဖြစ်ကြောင်းဒေသခံများကဆိုသည်။
ရခိုင်ပြည်နယ်ရှိမြို့ကိုးမြို့သိမ်းပိုက်ထားနိုင်သည့် ရက္ခိုင့်တပ်တော်(AA)၏ထိုးစစ်အရှိန်သည် အမ်းမြို့နပခအနီးသို့တိုက်ပွဲဖော်ဆောင်နေပြီဖြစ်ရာ လက်ရှိတွင် အမ်းမြို့နယ်အပါအဝင် ဘူးသီးတောင်၊မောင်တောမြို့တို့တွင်စစ်ရေးတင်းမာနေသည်။
စာတည်း။ ။အောင်ကျော်ဖြိုး
