ဓါတ်ပုံ-AFP ( ပုံဟောင်း)
ဓါတု
(မဇ္ဈိမ)။ ။ ရခိုင်ပြည်နယ်-မကွေးတိုင်းနယ်စပ် ငဖဲမြို့နယ်၊ တုံးကြီးကျေးရွာရှိ တရုတ်-မြန်မာသဘာဝဓါတ်ငွေ့ပိုက်လိုင်းအား လုံခြုံရေးယူသည့် ဂိတ်စခန်းတခုမှ စစ်ကောင်စီတပ်ဖွဲ့မှာ ရိက္ခာပြတ်လပ်နေသဖြင့် ဂိတ်ရှေ့ဖြတ်သန်းသွားလာသည့် ကုန်ပစ္စည်းပို့ဆောင်သည့်ယာဥ်များထံမှ ရိက္ခာများတောင်းယူနေကြောင်း ဒေသခံသတင်းရင်းမြစ်ထံက သိရသည်။
မကွေးတိုင်း မင်းဘူးမြို့နှင့် ရခိုင်ပြည်နယ်၊ အမ်းမြို့သို့သွားလာသည့်လမ်းမအနီး အဆိုပါဂိတ်စခန်းမှ အရပ်ဝတ်ဖြင့် ကင်းပုန်းဝပ်လုံခြုံရေးယူသည့် စစ်ကောင်စီတပ်ဖွဲ့မှ ၎င်းတို့တွင်ရိက္ခာပြတ်လပ်နေသည်ဟုဆိုကာအရပ်သားကုန်တင်ယာဥ်များထံမှ တောင်းခံနေခြင်းဖြစ်ကြောင်း နီးစပ်သည့်ဒေသခံတဦးက မဇ္စျိမကိုပြောသည်။
“မင်းဘူးကနေ အမ်းကိုကုန်ပစ္စည်းပို့တဲ့ ကုန်တင်ကားပိုင်ရှင် ကိုယ်တိုင်ပြောတာ၊ မနေ့က ဖြတ်သွားတဲ့ကားတွေကို သေနတ်ကိုင်အရပ်ဝတ်နဲ့ ကင်းပုန်းတွေအဖွဲ့က စစ်ဆေးတော့ ကားပေါ်ငွေတောင်းတာမဟုတ်ဘူး၊ စားစရာပြတ်လပ်နေလို့ ယမ်ယမ်ခေါက်ဆွဲခြောက်ဘူး ရှစ်ဖာကိုယူသွားတယ်။ အစက ရုတ်တရက် အရပ်ဝတ်ဆိုတော့ PDF ထင်တာ နောက်မှ ကံမြင့်ကန်ဂိတ်က ပူးပေါင်းတဲ့တပ်ဖွဲ့ဖြစ်နေတာ ”ဟု ၎င်းကပြောသည်။
ယနေ့ မတ်လ ၃၀ ရက် နေ့လည် ၁၁နာရီတွင်မူ ယင်းငဖဲမြို့နယ်အနီးတဝိုက်တွင် တိုက်ပွဲဖြစ်နေသည်ဟုဆိုကာ အမ်းမြို့မှမင်းဘူးမြို့သို့ သွားမည့်ယာဥ်များကို စစ်ကောင်စီမှ လာရာလမ်းအတိုင်း လှည့်ပြန်ခိုင်းနေကြောင်း ခရီးသည်များထံက သိရသည်။
အဆိုပါဂိတ်စခန်းတွင် ယခင်က လုံခြုံရေးယူနေသော စစ်ကောင်စီတပ် အင်အား ၆၀ ခန့်ရှိပြီး ယမန်နေ့ မတ်လ ၂၉ ရက် ညနေ ၃ နာရီတွင် လက်နက်ကြီးကျည် ကျရောက်ပေါက်ကွဲမှုကြောင့် မီးလောင်ပျက်စီးသွားသော အမ်းမြို့နယ်ရှိ ကံမြင့်ကန်ပူးပေါင်းစစ်ဆေးရေးဂိတ်မှ ရဲအပါအဝင်စစ်ကောင်စီတပ်သား ၃၂ ဦးမှာ လာရောက်ပူးပေါင်းသဖြင့် စုစုပေါင်း အင်အား ၉၂ဦး ရှိပြီဖြစ်ကြောင်း တပ်နှင့်နီးစပ်သည့်သတင်းရင်းမြစ်ထံက သိရသည်။
ယင်း ကံမြင့်ကန်စစ်ဆေးရေးဂိတ်တွင် တာဝန်ကျနေသည့် အမ်းမြို့အမှတ် (၃၇၃) ခြေမြန်တပ်ရင်းမှ ဗိုလ်ကြီး ရဲရင့်ကဦးဆောင်၍ ရဲဘက်တွင် ဒုရဲအုပ်မျိုးဝင်းဦးက ကြီးကြပ်တာဝန်ယူထားခြင်း ဖြစ်သည်။
ရက္ခိုင့်တပ်တော်(AA)နှင့်ထိတွေ့တိုက်ပွဲဖြစ်ပွားနေစဥ် စစ်ကောင်စီ၏အမ်းမြို့အခြေစိုက် အမြောက်တပ်မှ လက်နက်ကြီးပစ်ကူဖြင့် လှမ်းပစ်ရာ ကံမြင့်ကန်ပူးပေါင်းစစ်ဆေးရေးဂိတ်ကို ကျရောက်ပေါက်ကွဲခြင်းဖြစ်ကြောင်း ယင်းဂိတ်တွင်တာဝန်ကျသည့်သူနှင့် နီးစပ်သူတဦး၏အဆိုအရ သိရသည်။
“မနေ့က ကံမြင်ကန်က အမ်းမြို့ရခိုင်အစပ် မကွေးတိုင်းထဲကို ကားမှတ်တိုင်နဲ့ဆို တမှတ်တိုင်လောက်ပဲရှိတယ်၊ ဂိတ်မီးလောင်တော့ မကွေးဘက်က စစ်ကောင်စီစခန်းဘက်ဝင်ပြေးပြီး အင်အားသွားပူးပေါင်းတာ”ဟု ၎င်းကဆိုသည်။
ယမန်နေ့က အဆိုပါဂိတ်တွင် မီးခိုးများလှိုက်တက်နေသည်ကို မြင်တွေ့ရကြောင်း ကားဖြင့်ဖြတ်သန်းခဲ့သည့် မျက်မြင်ဒေသခံတဦးက ဆိုသည်။
လက်ရှိအခြေအနေအရ ယနေ့မတ်လ ၃၀ ရက်အထိ ငဖဲမြို့နယ်တွင် တိုက်ပွဲများဖြစ်ပွားနေဆဲဟုဒေသခံများက ဆိုသည်။
အဆိုပါ ရခိုင်ပြည်နယ်နှင့်မကွေးတိုင်း၏ ထိစပ်နယ်နိမိတ် အရှေ့မြောက်ဘက် မီတာ ၁,၅၀၀ ခန့်အကွာတွင် ပြီးခဲ့သည့် မတ်လ ၂၆ ရက်နံနက်ပိုင်း၌ စစ်ကောင်စီတပ်ဖွဲ့နှင့် ထိတွေ့တိုက်ပွဲစတင်ခဲ့ကြောင်း ရက္ခိုင့်တပ်တော်(AA)မှ သတင်းထုတ်ပြန်ထားသည်။
ယင်း ငဖဲမြို့နယ်တိုက်ပွဲများတွင် လက်နက်ခဲယမ်းများသိမ်းဆည်းရမိသည့်အပြင် စစ်ကောင်စီတပ်သားစုစုပေါင်း ၁၀ ဦးသေဆုံး၍ ၁၈ ဦးဒဏ်ရာရရှိကြောင်း ယမန်နေ့မတ်လ ၂၉ ရက်က ထုတ်ပြန်ချက်တွင် ဖော်ပြထားသည်။
လတ်တလောအနေအထားအရ ရက္ခိုင့်တပ်တော်(AA)နှင့်စစ်ကောင်စီတပ်တို့၏ နှစ်ဘက်ထိတွေ့တိုက်ပွဲမှာ ရခိုင်ပြည်နယ်ရှိ ဘူးသီးတောင်၊ မောင်တောနှင့် အမ်းမြို့နယ် အနောက်ပိုင်းတိုင်းစစ်ဌာနချုပ်အနီး လုံးကျေးရွာတို့တွင် တိုက်ပွဲများပြင်းထန်နေပြီး မကွေးတိုင်း ငဖဲမြို့နယ်အထိ AA ၏ ထိုးစစ်အရှိန်မှာ စိမ့်ဝင်ထိုးဖောက်လျက်ရှိသည်။
စာတည်း – သန့်ဇော်(သန်လျင်)
