အမျိုးသား ညီညွတ်ရေးအစိုးရ
- ကရင်နီပြည်နယ်အတွင်း ဖြစ်ပွားနေသည့် စစ်ရေးကာလတစ်လျှောက် မြေမြှုပ်မိုင်းများ နှင့် မပေါက်ကွဲသေးသည့် စစ်သုံးအကြွင်းကျန်ပစ္စည်းများ အန္တရာယ်ကြီးမားနေဆဲဖြစ်ကြောင်း လိုက်နာရမည့် သတိပေးချက်များကို ကရင်နီပြည် ကြားကာလ အုပ်ချုပ်ရေးကောင်စီ – IECက ထုတ်ပြန်သည်။
- အမျိုးသားညီညွတ်ရေးအစိုးရ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင မန္တလေးတိုင်း၊ မကွေးတိုင်း တို့မှာရှိတဲ့ မြို့နယ်ပြည်သူ့အုပ်ချုပ်ရေးအဖွဲ့များ တွေ့ဆုံဆွေးနွေးပွဲအစည်းအဝေး (၁၈/၂၀၂၄)ကို မေ ၁ ရက် မွန်းလွဲ ၁ နာရီမှာ ပြုလုပ်ခဲ့ကြသည်။
- စစ်ကောင်စီထံမှာ စစ်မှုမထမ်းလိုသည့် နိုင်ငံတစ်ဝန်းက လူတစ်သောင်းခွဲခန့် အမျိုးသား ညီညွတ်ရေးအစိုးရ (NUG) ကို ဆက်သွယ်လာကြောင်း NUG ကပြောသည်။
တော်လှန်ရေး လှုပ်ရှားမှုများ
- ချင်းပြည်နယ်၊ ကန်ပက်လက်မြို့နယ်၊ မဟာမိတ် တပ်ပေါင်းစုံ နဲ့ ရက် ၁၀၀ ကျော် တိုက်ခိုက်ခဲ့ရတဲ့ ကျင်ဒွေးမြို့သိမ်းတိုက်ပွဲကို YDF ယောကာကွယ်ရေး တပ်ဖွဲ့မှ နွေဦးသမိုင်းမှာ မေ့မရတဲ့၊ မှတ်တမ်း တခု အဖြစ် ဂုဏ်ယူနေတယ်လို့ YAW DEFENSE FORCE က ထုတ်ပြန်သည်။
- မြန်မာနိုင်ငံ အကျဥ်းထောင်များအတွင်း လုံလောက်သည့် ကျန်းမာရေးစောင့်ရှောက်မှုပေးရန် မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက်( PPNM)က ယနေ့ (မေလ ၂ရက်)တွင် တောင်းဆိုလိုက်သည်။
- မြန်မာနိုင်ငံတဝန်း ၂၀၂၄ ခုနှစ် ဇန်နဝါရီ ၁ရက်မှ ဧပြီလ ၃၀ ရက်အထိ ပထမ လေးလပတ်တာ ကာလအတွင်းတွင် စစ်ကောင်စီကြောင့် အသက် ၁၈ နှစ်မပြည့်သေးသူ အရပ်သားကလေးငယ် ၁၀၆ ဦးသေဆုံးခဲ့ရသည်ဟု နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)မှ ယမန်နေ့ (မေ ၁ ရက်)၎င်း၏နေ့စဉ်မှတ်တမ်းတွင် ဖော်ပြထားသည်။
- ပြင်သစ်နိုင်ငံတွင် နေထိုင်ခွင့် ဗီဇာသက်တမ်း တိုးမပေးရန်နှင့် တက်ရောက်နေသည့် ကျောင်းမှ လည်း လက်ခံခြင်းမပြုရန် တောင်းဆိုခံထားရသည့် ရွှေဗျိုင်းဖြူကုမ္ပဏီပိုင်ရှင်၏ သမီးဖြစ်သူ မသိမ့်၀င်းထက်ကို ၎င်းတက်ရောက်နေသည့် ကျောင်းဘက်က စုံစမ်းစစ်ဆေးမှုများ လုပ်ဆောင်နေ သည်ဟု ပြင်သစ်သတင်းဌာန Le Monde ကို ကိုးကားပြီး Justic for Myanmar က ထုတ်ပြန် သည်။
- မန္တလေးတိုင်း၊ စဥ့်ကူးမြို့နယ်တွင် ဂိတ်ချငွေတောင်းခံနေသည့် စစ်ကောင်စီဝင်များ မိုင်းဆွဲတိုက်ခိုက်ခံရကြောင်း ဒေသခံများက ပြောသည်။
- ဒီပဲယင်းမြို့နယ်တွင် ပြည်သူများ စုပေါင်း၍ စစ်အာဏာရှင်စနစ်နှင့် အကြမ်းဖက်စစ်တပ်ကို အလိုမရှိဆန့်ကျင်ကြောင်း၊ ပြည်သူ့အစိုးရ NUG နှင့် ပြည်သူ့ကာကွယ်ရေးတပ်ဖွဲ့များကိုသာ ထောက်ခံကြောင်း ဆန္ဒထုတ်ဖော် သပိတ်ချီတက်ခဲ့ကြသည်။
- ရခိုင်ပြည်နယ် မြောက်ပိုင်းတွင် သတင်းတု၊ သတင်းမှားနှင့် အမုန်းစကားများ ပြန့်ပွားနေပြီး လူမျိုးရေး၊ ဘာသာရေး ပဋိပက္ခ အန္တရာယ်နှင့် တင်းမာမှုများ ပိုမိုတိုးပွားလာနေသည့် အရိပ် အယောင် များမြင်နေရ၍ ကုလသမဂ္ဂအနေဖြင့် စိုး ရိမ် မိကြောင်း ကုလသမဂ္ဂအတွင်းရေး မှူးချုပ်၏ ပြောခွင့်ရပုဂ္ဂိုလ် Stéphane Dujarric က ပြောဆိုလိုက်သည်။
- ရခိုင်ပြည်နယ်မှာ စစ်တပ်နှင့်အာရက္ခတပ်တော်(AA)တို့အကြား တိုက်ပွဲများကြောင့် လူဦးရေ ၁၆၆၀၀၀ခန့် နေရပ်စွန့်ခွာထွက်ပြေးနေရကြောင်း UNOCHA Myanmar ၏ထုတ်ပြန်ချက်အရ သိရသည်။
တိုင်းရင်းသားလက်နက်ကိုင်များ
- ကချင်ပြည်နယ်၊ ဖားကန့်မြို့ ဆိပ်မူကျေးရွာတွင် စစ်ကောင်စီ တပ်နှင့် ကချင်လွတ်လပ်ရေး တပ်မတော်(KIA)ပူးပေါင်းတပ်တို့ ယမန်နေ့( မေလ ၁ရက်)ည ၆ နာရီနောက်ပိုင်း အပြန်အလှန် တိုက်ပွဲဖြစ်ပွားခဲ့ပြီး စစ်ကောင်စီတပ်ပစ်ခတ်လိုက်သော လက်နက်ကြီးကျည်ကြောင့် ဒေသခံ ပြည်သူနှစ်ဦး ထိခိုက်ဒဏ်ရာရရှိခဲ့ကြောင်း သိရသည်။
- ချင်းလက်နက်ကိုင်တပ်ဖွဲ့များ အကြား စစ်ရေးပဋိပက္ခ မဖြစ်စေရေး ကြိုးပမ်းနေကြောင်း ချင်းအမျိုးသားတပ်ဦး(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောကြားသည်။
- စစ်တပ် ထုတ်ကုန် မြန်မာဘီယာကို သောက်သုံးခဲ့ကြသော TNLA ရဲဘော်များကို ကြိမ်ဒဏ်၊ အလုပ်ကြမ်းနှင့် လူမှုရေးပြစ်ဒဏ်များချမှတ် အပြစ်ပေးလိုက်ကြောင်း TNLA က သတင်းထုတ်ပြန်သည်။
စစ်ကောင်စီ
- ပူပြင်းခြောက်သွေ့သော အစွန်းရောက် အယ်နီညို ဖြစ်စဉ်ကြောင့် အပူချိန်မြင့်မားနေသည့် ကာလတွင် စစ်ကောင်စီရုံးစိုက်ရာ နေပြည်တော်အပါအဝင် နိုင်ငံအတွင်း အချိန်ကြာမြင့်စွာ လျှပ်စစ်မီးပြတ်တောက်မှုများ ပိုများလာကြောင်း သိရသည်။
- ထိုင်း- မြန်မာနယ်စပ် ချစ်ကြည်ရေးတံတား အမှတ် (၁) မှတဆင့် ထိုင်းနိုင်ငံအတွင်းသို့ ဝင်ရောက် လိုသူများကို UID နံပါတ် မပါပါက အမှတ် (၁) တံတား၊ မြန်မာဘက်အခြမ်းရှိ လဝကက ထွက်ခွာ ခွင့် မပြုတော့ကြောင်း ထိုင်းနိုင်ငံတွင်း ယီတံတားကူးကဒ်ဖြင့် ရောက်ရှိနေသူများနှင့် မြဝတီ ဒေသခံ များထံက သိရသည်။
- မြန်မာနိုင်ငံ သုံးစွဲနေသည့် လျှပ်စစ်ဓာတ်အားလိုအပ်ချက်၏ ၅၀ ရာခိုင်နှုန်းကို သာ လက်ရှိ အချိန်တွင် ထုတ်ပေးနိုင်တော့မည်ဟု စစ်ကောင်စီ၏ လျှပ်စစ်ဝန်ကြီးဌာနက ထုတ်ပြန်သည်။
- ချင်းပြည်နယ် မင်းတပ်မြို့နယ် တိုက်နယ်(၂) ဒေသသို့ စစ်ကောင်စီက ယမန်နေ့ ညနေနှင့် ညပိုင်း၌ လေကြောင်းတိုက်ခိုက်မှုထပ်မံ ပြုလုပ်ခဲ့ကြောင်း ဒေသခံက အသိပေးသည်။
- ချင်းပြည်နယ် မင်းတပ်မြို့နယ် တိုက်နယ်(၂) ဒေသသို့ စစ်ကောင်စီက ယမန်နေ့ ညနေနှင့် ညပိုင်း၌ လေကြောင်းတိုက်ခိုက်မှုထပ်မံ ပြုလုပ်ခဲ့ကြောင်း ဒေသခံက အသိပေးသည်။
- အမျိုးသားများ ပြည်ပသို့အလုပ်လုပ်ခွင့်ကို မေလ ၁ ရက်နေ့မှစတင်ပြီး တားမြစ်ပိတ်ပင် လိုက် သည်ဟု စစ်ကောင်စီခန့် အလုပ်သမားဝန်ကြီးဌာန အမြဲတမ်းအတွင်းဝန်၏ ပြောဆိုချက်ကို ကိုးကား ၍ Myanmar Now သတင်းတွင် ဖော်ပြထားသည်။
- ထိုင်း-မြန်မာနယ်စပ် မြဝတီ-မဲဆောက် ချစ်ကြည်ရေးတံတား ဖြတ်သန်းခွင့်ကို Unique Identification Number-UID ကုဒ်နံပါတ် ၁၀ လုံးပါ (ဒီဂျစ်တယ် မှတ်ပုံတင် စမတ်ကဒ်) အထောက်အထားပြသမှတ်တမ်းတင် စစ်ဆေးပြီးမှ နယ်စပ်ဖြတ်ကျော်ခွင့် လက်မှတ်ထုတ် ပေးသည့်စနစ်ကို ယမန်နေ့ မေလ ၁ ရက်နေ့တွင် စစ်ကောင်စီက စတင် ကျင့်သုံးနေပြီဟု သိရသည်။
- ကော့သောင်းမြို့မှ ထိုင်းနိုင်ငံ ရနောင်းမြို့သို့ သွားရာတွင် စစ်ကောင်စီထုတ်ပေးသည့် စမတ်ကတ်ဟုခေါ်သည့် UID ကတ်ရှိမှ သာ နယ်စပ်ဖြတ်သန်းခွင့်ရတော့ကြောင်း ကော့သောင်း မြို့ခံအချို့ထံမှ သိရသည်။
မေ ၂ ရက် သုံးသပ်ချက်
- စစ်ရှုံး၍ အင်အားပြုန်းတီးနေသည့် စစ်ကောင်စီသည် အမျိုးသားများကို ပြည်ပအလုပ်လုပ် ခွင့်ပိတ်လိုက်သကဲ့သို့ နယ်စပ်ထွက်ပေါက်များတွင်လည်း စမတ်ကတ်ပါမှ ထွက်ခွင့်ပေးမည်ဟု တင်းကျပ်ခြင်းကြောင့် နောက်တကျော့ တပ်သားသစ် စုဆောင်းရန်အတွက် ပြင်ဆင်လာခြင်းဖြစ်ပြီး လူငယ်များကို တိမ်းရှောင်၍ မရအောင် ချောင်ပိတ်လိုက်ခြင်းဖြစ်သည်။
