တရုတ်၏ အကျပ်ကိုင်ခြင်းခံနေရသည့် နိုင်ငံများအား ရန်ပုံငွေထောက်ပံ့မည့် ဥပဒေကြမ်းကို အမေရိကန်ကွန်ဂရက်လွှတ်တော်သို့ တင်သွင်း

Photo:Getty Images

SCMP:-

အမေရိကန်ပါတီကြီးနှစ်ခုစလုံး၏ ထောက်ခံမှုဖြင့် ကွန်ဂရက်လွှတ်တော်သို့ မေ ၁၀ ရက်တွင် တင်သွင်းခဲ့သည့် ဥပဒေကြမ်းတရပ်သည် ထိုင်ဝမ်နှင့် ဆက်ဆံရေးတိုးမြှင့်ရန် ကြိုးပမ်းမှုကြောင့် တရုတ်၏ ဖိအားပေးခြင်း သို့မဟုတ် အကျပ်ကိုင်ခြင်းခံနေရသည့် နိုင်ငံများကို အမေရိကန်က ထောက်ပံ့ကူညီရန် ညွှန်ကြားသွားမည်ဖြစ်သည်။ 

 အီလီနွိုက်စ်ပြည်နယ်မှ ဒီမိုကရက် လွှတ်တော်အမတ်ဖြစ်ပြီး တရုတ်နိုင်ငံဆိုင်ရာ အောက်လွှတ်တော် စိစစ်ရေးကော်မတီ အကြီးတန်းအဖွဲ့ဝင် ရာဂျာခရစ္စရှနမ်မိုရသီ တင်သွင်းသည့် ယင်းဥပဒေကြမ်းအရ ထိုင်ဝမ်မိတ်ဖက်ရေးရာ ရန်ပုံငွေအဖြစ် သုံးနှစ်အတွင်း အမေရိကန်ဒေါ်လာ သန်း ၁၂၀ ကျော်အသုံးပြုရန် ခွင့်ပြုပေးသွားမည်ဖြစ်သည်။ 

အဆိုပါဥပဒေကြမ်းအရ အမေရိကန်အနေဖြင့် နိုင်ငံများအား ထိုင်ဝမ်နှင့် ဆက်ဆံရေးတိုးမြှင့်ရန် အားပေးပြီး တရုတ်၏ ခြိမ်းခြောက်အကျပ်ကိုင်မှုများကို စီးပွားရေးအရဖြစ်စေ၊ နိုင်ငံရေးအရဖြစ်စေ ထိထိရောက်ရောက် တုံ့ပြန်နိုင်စွမ်းမရှိသည့် နိုင်ငံများကို ကူညီရန် လုပ်ဆောင်သွားမည် ဖြစ်သည်။ 

ကမ္ဘာမှာ မိမိတို့နဲ့ အရင်းနှီးဆုံးထဲမှာပါဝင်တဲ့ ထိုင်ဝမ်ကို သံတမန်ရေးအရ အထီးကျန်ဖြစ်စေဖို့ တရုတ်ကွန်မြူနစ်ပါတီက နှစ်ပေါင်းများစွာ ဆောင်ရွက်နေခဲ့တာဖြစ်ပါတယ်ဟု ခရစ္စရှနမ်မိုရသီက မေ ၁၀ ရက်တွင် ပြောကြားခဲ့သည်။ 

နိုင်ငံတကာအသိုင်းအဝိုင်းတွင် ထိုင်ဝမ်၏ ပါဝင်ခွင့်ကို နှောင့်ယှက်ရန် ကြိုးပမ်းနေသည့် တရုတ်၏ သံတမန်ရေးဖိအားပေးမှုနယ်ပယ်တွင် အမေရိကန်အနေဖြင့် ထိုင်ဝမ်နှင့်အတူရပ်တည်ရန် အချိန်တန်ပြီဖြစ်ကြောင်း ၎င်းက ထပ်မံပြောကြားခဲ့သည်။ 

ယင်းရန်ပုံငွေအသစ်သည် ပိုမိုကျယ်ပြန့်သော တရုတ်လွှမ်းမိုးမှုကိုတန်ပြန်ရေးရန်ပုံငွေ၏ တစိတ်တပိုင်း ဖြစ်ပြီး သတ်မှတ်ချက်နှင့်ကိုက်ညီသော နိုင်ငံများအနေဖြင့် တနှစ်လျှင် အမေရိကန်ဒေါ်လာငါးသန်း ရရှိမည်ဖြစ်သည်။ 

ရန်ပုံငွေများကို တရုတ်၏ ကျန်းမာရေးဆိုင်ရာ ပိုးလမ်းမလုပ်ငန်းများနှင့်အပြိုင် ကျန်းမာရေးအစီအမံများကို ထောက်ပံ့ရန်၊ အရပ်ဖက်အဖွဲ့အစည်းများ အားကောင်းလာစေရန်နှင့် တရုတ်၏ သတင်းအချက်အလက်ဖြန့်ဝေမှုများကို တန်ပြန်ရေး မီဒီယာများ ဖွံ့ဖြိုးလာစေရန်၊ ထုတ်လုပ်ရောင်းချရေး လုပ်ငန်းစဉ်များ တရုတ်မှ သွေဖည်သွားစေရန်နှင့် နိုင်ငံတကာ အဖွဲ့အစည်းများတွင် ထိုင်ဝမ် ပါဝင်လာစေရေး အားပေးမြှင့်တင်ရန် အသုံးပြုသွားမည်ဖြစ်သည်။ 

ယင်းရန်ပုံငွေများကို တရုတ်၏ ဖွံ့ဖြိုးရေးအကူအညီများ၊ သတင်းအချက်အလက်များ၊ ဆက်သွယ်ရေး နည်းပညာ အခြေခံအဆောက်အအုံများနှင့်အပြိုင်  အစီအမံများ ချမှတ်ဆောင်ရွက်ရာတွင်လည်း အသုံးပြုနိုင်မည်ဖြစ်သည်။ 

လစ်သူယေးနီးယားနိုင်ငံကဲ့သို့ ထိုင်ဝမ်နှင့် အလွတ်သဘောဆက်ဆံရေး မြှင့်တင်ရန် ဆောင်ရွက်လျက်ရှိသည့် နိုင်ငံများကိုလည်း ယင်းဥပဒေမူကြမ်းတွင် ထည့်သွင်းဖော်ပြထားသည်။ ထိုင်ဝမ်သည် ၂၀၂၁ ခုနှစ်တွင် လစ်သူယေးနီးယားနိုင်ငံ၌ ကိုယ်စားလှယ်ရုံးဖွင့်လှစ်ခဲ့ရာ ‘တိုင်ပေ’ အစား ‘ထိုင်ဝမ်’ ဟူသောအမည်ကို အသုံးပြုခဲ့ပြီးနောက် တရုတ်ဈေးကွက်အတွင်း လစ်သူယေးနီးယားပို့ကုန်များကို တင်းတင်းကျပ်ကျပ် ကန့်သတ်လာခဲ့သည်။ ဥရောပနှင့် အမေရိကန်ရှိ ထိုင်ဝမ်ရုံးများသည် တိုင်ပေ အမည်ကိုသာ အသုံးပြုကြသည်။ တရုတ်ကမူ ထိုင်ဝမ်အား  ၎င်း၏ပြည်နယ်တခုအဖြစ်သာ သတ်မှတ်ထားပြီး ပြည်မကြီးနှင့် ပြန်လည်ပေါင်းစည်းရန်၊ လိုအပ်လျှင် အင်အားသုံးရန် စောင့်ဆိုင်းလျက်ရှိသည်။ 

အမေရိကန်အပါအဝင် နိုင်ငံအများစုသည် ထိုင်ဝမ်ကို လွတ်လပ်သော နိုင်ငံတခုအဖြစ် အသိအမှတ်ပြုထားခြင်း  မရှိသော်လည်း ထိုင်ဝမ်အား အင်အားသုံး၍ ရယူရန် ကြိုးပမ်းမှုမှန်သမျှကို လက်မခံဘဲ ထိုင်ဝမ်ကို လက်နက်များ ထောက်ပံ့ရန် ဆုံးဖြတ်ထားသည်။ 

ပြီးခဲ့သည့်လကပင် အမေရိကန်သမ္မတ ဂျိုးဘိုင်ဒင်သည် ထိုင်ဝမ်ကို ကာကွယ်ရေး အကူအညီများ တိုးမြှင့်ပေးအပ်မည့်အချက်ပါဝင်သော နိုင်ငံတော်လုံခြုံရေးအစီအမံများဆိုင်ရာဥပဒေကို အတည်ပြုလက်မှတ်ရေးထိုးခဲ့သည်။ 

ခရစ္စရှနမ်မိုရသီ၏ ဥပဒေကြမ်းသည် အောက်လွှတ်တော်နှင့် အထက်လွှတ်တော် နှစ်ရပ်စလုံးက အတည်ပြုမှသာ ပြဋ္ဌာန်းဥပဒေ ဖြစ်လာမည်ဖြစ်သည်။ ယခုအခါ ထိုင်ဝမ်နှင့်တရားဝင်ဆက်ဆံရေးထူထောင်ထားသည့် နိုင်ငံ ၁၂ နိုင်ငံသာ ကျန်ရှိတော့သည်။ 

မကြာသေးမီနှစ်များအတွင်း အမေရိကန်သည် နိုင်ငံတကာအဖွဲ့အစည်းများတွင် ထိုင်ဝမ်၏ ပါဝင်မှုကို အားပေးရန် တိုးမြှင့် ကြိုးပမ်းလာခဲ့သောကြောင့် တရုတ်၏ ဆန့်ကျင်ကန့်ကွက်မှုများနှင့် ကြုံတွေ့နေရသည်။