ရှီကျင့်ဖျင်၏ “တရုတ်အိပ်မက်” စတင်ပြိုလဲနေပြီလား

Devdiscourse

တရုတ်သမ္မတ ရှီကျင့်ဖျင်သည် ယခင်က လုပ်တိုင်းဖြစ်၊ ကြံတိုင်းအောင် ဖြစ်ခဲ့သည်။ တရုတ်နိုင်ငံ၏ အကျိုးအတွက် သူ လက်နှင့်ထိသမျှ အရာအားလုံးက ရွှေဖြစ်ခဲ့သည်ဟု ထင်ရသည်။ သို့သော် မော်စီတုန်းနောက်ပိုင်း တရုတ်နိုင်ငံ၏ ဩဇာအာဏာအရှိဆုံး ခေါင်းဆောင် ဖြစ်လာပြီးနောက် ကြည့်ရသည်က တရုတ်၏ ထာဝရခေါင်းဆောင်ကြီး လက်နှင့်ထိသမျှ အတော်များများက လက်ရှိတွင် ပြိုလဲပျက်စီးနေပုံပေါ်သည်။

ပင်လယ်ပိုင်း အိမ်နီးချင်းနိုင်ငံများနှင့် ဆက်ဆံရေးများတွင် ဝရုန်းသုန်းကားနိုင်နေခြင်း၊ စီးပွားရေးတွင် စွမ်းဆောင်ရည်ကျဆင်းမှုတို့ ဖြစ်ပေါ်နေခြင်း၊ အမေရိကန်နှင့် အပြင်းအထန် ပြိုင်ဆိုင်ရခြင်း၊ တရုတ်နိုင်ငံသားများအကြား အားမလိုအားမရဖြစ်မှု၊ ဟိတ်ဟန်ထုတ်ထားသလောက် တိုက်ပွဲဝင်ရန် အသင့်ရှိမနေသည့် စစ်တပ်တခု၊ ဆယ်စုနှစ်ချီကြာ အဂတိလိုက်စားမှု တိုက်ဖျက်ရေး လုပ်ဆောင်မှုများ ရှိခဲ့သော်လည်း တရုတ် ကွန်မြူနစ်ပါတီ (CCP) ၏ ရာထူးကြီးအဆင့်များအထိ ပျံ့နှံ့နေသည့် အကျင့်ပျက်ခြစားမှုများ၊ ဒီမိုဂရက်ဖစ်ဆိုင်ရာ စိန်ခေါ်မှုများ၊ လက်အောက်ခံအဖြစ် သွတ်သွင်းခံမည်မဟုတ်ဟု ငြင်းဆိုနေသည့် လွတ်လပ်သော ထိုင်ဝမ်၊ တရုတ်၏ ကိုယ့်ကိုယ်ကို ဗဟိုပြုသည့် မူဝါဒများအပေါ် ကမ္ဘာတဝန်းမှ သဘောမကျသည့် တုံ့ပြန်မှုများ တို့တွင် တရုတ်သမ္မတ ရှီ၏ လုပ်တိုင်းမဖြစ်၊ ကြံတိုင်းအောင်ခြင်း မရှိသည့် အနေအထားကို တွေ့မြင်နိုင်သည်။ အကျင့်ပျက်ခြစားမှုက တရုတ်၏ ပြည်သူ့လွတ်မြောက်ရေးစစ်တပ် (PLA) ၏ အသင့်ရှိမှုအပေါ် အကြီးအကျယ် အဟန့်အတားဖြစ်စေလျက် ရှိသည် ဆိုပြီး အမေရိကန် ထောက်လှမ်းရေးအသိုင်းအဝိုင်း၏ တုန်လှုပ်အံ့ဩစေသည့် စွပ်စွဲမှုများ ပါဝင်သော သတင်းတပုဒ်ကို Bloomberg က ဇန်နဝါရီ ၇ ရက်တွင် ဖော်ပြခဲ့သည်။ ဥပမာအားဖြင့် ဒုံးကျည်များတွင် လောင်စာထက် ရေဖြင့် ဖြည့်ထားကြောင်းနှင့် တရုတ်၏ ပဲ့ထိန်းဒုံးကျည်ပစ်ကွင်းသစ်များရှိ ဒုံးလက်နက်ပစ်ရန် အသင့်ထောင်လျက် ထားရှိရာ သိုလှောင်ကျင်းများသည် ကောင်းစွာ အသုံးပြုလုပ်ဆောင်နိုင်ခြင်း မရှိသည့် အပေါက်များ ရှိနေသည့်အတွက် ဒုံးကျည်ပစ်လွှတ်နိုင်စွမ်းအပေါ် ထိခိုက်စေလျက် ရှိသည် ဆိုပြီး သတင်းရင်းမြစ်များက ပြောသည်။

သတင်းအစီရင်မှုက နောက်ထပ် အသေးစိတ်များနှင့်ပတ်သက်ပြီး သာမန်ကာလျှံကာသာ ရှိသည်။ သို့သော် အထူးသဖြင့် တရုတ်၏ ပဲ့ထိန်းဒုံးအများစုက အခဲလောင်စာသုံး ဒုံးများဖြစ်သည်ကို ထည့်သွင်းစဉ်းစားပါက ဒုံးကျည်များကို ရေဖြင့် မည်သို့မည်ပုံ ဖြည့်နိုင်သလဲ ဆိုသည်နှင့်ပတ်သက်ပြီး ထင်ကြေးပေးမှန်းဆမှုများ ရှိသည်။ ဖြစ်နိုင်ဖွယ်ရာတခုက တိုက်ချင်းပစ် ပဲ့ထိန်းဒုံးများ လောင်စာအားလုံးအသုံးပြုပြီးသွားပြီးနောက် ထိပ်ဖူးများ ချိန်ရွယ် ပစ်လွှတ်သည့် post-boost vehicle များသည် အရည် hypergolic လောင်စာတွန်းကန်ပစ္စည်းများဖြင့် ဖြည့်ရလေ့ ရှိခြင်းဖြစ်သည်။ အဆိုပါ post-boost vehicle များသည် ၎င်းတို့ ယိုပေါက်လုံကြောင်း ပြသရန် တုန်ခါမှု စမ်းသပ်ချက်များကို ဖြတ်ကျော်ကြရပြီး ဖြစ်နိုင်ခြေအားဖြင့် ယင်းကို nontoxic surrogate ပစ္စည်းများ အသုံးပြုရင်း လုပ်ဆောင်သည်။ ဖြစ်နိုင်ဖွယ်ရှိသည်က တချို့သော post-boost vehicle များသည် ယင်းတို့၏ လက်ခံနိုင်မှု စမ်းသပ်မှုများ အောင်မြင်သော်လည်း ယင်းတို့ကို မည်သည့်အခါကမှ အရည်စင်အောင် မထားဘဲ PLA ၏ ဒုံးကျည်တပ်ဖွဲ့ (PLARF) က ဖြန့်ကျက်ချိန်တွင် တွန်းကန်ပစ္စည်းများဖြင့် ပြန်ဖြည့်ထားခြင်းပင် ဖြစ်သည်။ ဒုံးကျည်များကို အသေးစိတ် စစ်ဆေးမှုများ မလုပ်ဆောင်မချင်း ယင်းကဲ့သို့ အမှားတခုကို ရှာတွေ့ရန် အချိန် ၆ နှစ် ၊ ၇ နှစ်အထိ ကြာကောင်းကြာနိုင်သည်။ “ဒါက အခြေအနေနှစ်ခု ပေါင်းဆုံမှသာပဲ ဖြစ်နိုင်ရုံ ရှိပါတယ်။ တခုက ရှီရဲ့ အရှိန်မြန်ဆန်တဲ့ စစ်တပ် ခေတ်မီအောင်လုပ်ဆောင်မှု စံသတ်မှတ်ချက်တွေကို ပြည့်မီဖို့ ဖိအား ဖြစ်ပြီး နောက်တခုကတော့ အကျင့်ပျက်ခြစားမှုဖြစ်တယ်။ ခုချိန်ထိကတော့ အဲဒီလိုမျိုး ကမ်းကုန်လောက်တဲ့ အမှားမျိုးတွေ ၂၀၂၄ မှာ PLA မှာ တွေ့နိုင်တယ် ဆိုတာက မတွေးတတ်နိုင်အောင်ပဲ ဖြစ်တယ်” ဟု အာရှ လူ့အဖွဲ့အစည်း မူဝါဒ အင်စတီကျူ့မှ နိုင်ငံခြားရေးမူဝါဒနှင့် အမျိုးသားလုံခြုံရေးဆိုင်ရာ အကြီးတန်းအသင်းဝင် လိုင်လီ မောရစ်က Bloomberg သတင်းတွင် ဖော်ပြသည့် ပြောဆိုချက်များကို ရည်ညွှန်းပြောကြားသည်။

“အကျင့်ပျက်ခြစားမှု သတင်းတွေနဲ့ လူတွေကို ဖယ်ရှားထုတ်ပယ်တာတွေက PLA ရဲ့ အသင့်ဖြစ်မှုအပေါ် ကြီးကြီးမားမား သက်ရောက်စေမှာ မဟုတ်ဘူးလို့ မိမိအနေနဲ့ အရင်က အကဲဖြတ်ခဲ့ပါတယ်။ ဘာကြောင့်လဲဆိုတော့ အကျင့်ပျက်ခြစားမှုက အမြဲတစေအားဖြင့် PLA မှာ စီးပွားရေးလုပ်ကိုင်တာရဲ့ တစိတ်တဒေသဖြစ်နေခဲ့လို့ပါ။ ဒါပေမယ့် ဒီသတင်းက အဲဒီအကဲဖြတ်မှုနဲ့ပတ်သက်လို့ မိမိအနေနဲ့မေးခွန်းထုတ်ရအောင် ဖြစ်စေခဲ့တယ်။ အကယ်၍သာ အဲဒီအတိုင်း မှန်တယ်ဆိုရင် ဒီလို အကျင့်ပျက်ခြစားမှုလယ်ဗယ်က အသင့်ဖြစ်မှုအပေါ် သက်ရောက်စေပြီး အဲဒါကနေတဆင့် ရှီရဲ့ စစ်တပ် အဆင့်မြှင့်တင်မှု ရည်မှန်းချက်တွေ၊ ထိုင်ဝမ် အရေးပေါ်အခြေအနေမျိုးနဲ့ အခြားဧရိယာတွေမှာ လည်ပတ်လုပ်ကိုင်နိုင်စွမ်းတွေအပေါ်မှာ ကြီးကြီးမားမား ဂယက်ရိုက်မှုတွေ ရှိစေပါတယ်” ဟု လိုင်လီက ဆက်ပြောသည်။ အမေရိကန်တာဝန်ရှိသူများ သို့မဟုတ် ပင်တဂွန်သည် ယင်းကဲ့သို့ မှတ်ချက်စကားများကို ယခင်ဘယ်တုန်းကမှ ပြောဆိုခဲ့ခြင်း မရှိပေ။ အမှန်တကယ်တမ်းတွင်လည်း ယင်းတို့ကို open-source ဒေတာများ အသုံးပြုပြီး အတည်ပြုစစ်ဆေးရန် မဖြစ်နိုင်ပေ။ သို့သော် သိသာရှင်းလင်းသည်က PLARF တွင် ကြီးကြီးမားမား မှားယွင်းနေပြီး ယင်း၏ အကြီးတန်းခေါင်းဆောင်များ ရှင်းထုတ်ခံရကာ ဒါဇင်နှင့်ချီ ဖမ်းဆီးခံထားရခြင်းပင် ဖြစ်သည်။ PLA က တဆက်တည်းပါလာသည့် အရည်အသွေးပြဿနာများနှင့်အတူ ဒုံးကျည်တပ်ဖွဲ့တွင် အလွန်အမင်း အလျင်အမြန် ရင်းနှီးမြှုပ်နှံခဲ့သလား သို့မဟုတ် အရေးပါသောပုဂ္ဂိုလ်များက လွတ်လွတ်လပ်လပ် စီးဆင်းနေသော ငွေစီးဆင်းမှုတွင် လက်ချောင်းထိုးစိုက်ခဲ့ကြသလား။

အဆိုပါ ပြောဆိုကြသည့် ဒုံးကျည်ကိစ္စများက မှန်သည်ဖြစ်စေ၊ မှားသည်ဖြစ်စေ၊ PLA အတွင်း အခြား မည်သည့် အံ့အားသင့်စရာများက ရှီကို စောင့်နေနိုင်သလဲ ဆိုသည်ကို သိချင်မိသည်။ ရှီသည် စစ်ပွဲအတွက် အသင့်ပြင်ရန် PLA ကို တိုက်တွန်းထားသလို ၎င်းနှင့် CCP အား သစ္စာခံယူရာတွင် အကျင့်သိက္ခာစောင့်စည်းပြီး အားမာန်အပြည့်ရှိရန် တိုက်တွန်းနေသည်။ သို့သော် အဆိုပါ တိုက်တွန်းမှုများက ကျွဲပါးစောင့်တီး သလို ဖြစ်နေသည်။ တရုတ်သည် “အလွန့်၊ အလွန် အန္တရာယ်ကြီးသော လမ်းတခုတွင် ရှိနေပြီး တရုတ်ပြည်သူ့သမ္မတနိုင်ငံ၏ လောလောဆယ် ရည်မှန်းချက်က ထိုင်ဝမ်ကို သိမ်းပိုက်ရန်အတွက် လည်ပတ်လုပ်ကိုင်နိုင်သော ဝန်းကျင်တခု အသင့်ပြင်ဆင်ရန်ဖြစ်သည်” ဟု အမေရိကန်စစ်တပ် ပစိဖိတ်ဒေသဆိုင်ရာ တပ်မှူး ဗိုလ်ချုပ်ကြီး ချားလ်စ် ဖလင်းန်က ယမန်နှစ် ဒီဇင်ဘာလက ဗာဂျီးနီးယားရှိ ပုံမှန်မဟုတ်သော စစ်ဆိုင်ရာ ဖိုရမ်၌ ပြောသည်။

ထိုင်ဝမ်ကို တိုက်ခိုက်မည်လား ဆိုသည်ကို စူးစမ်းတွက်ချက်ရာတွင် ရှီသည် အချက်လေးချက်ကို ချင့်တွက်နေသည်ဟု ဗိုလ်ချုပ်ကြီး ဖလင်းန်က ယူဆသည်။ ပထမအချက်က တရုတ်အနေဖြင့် နိုင်ငံတကာ အရေးယူပိတ်ဆို့မှုများကို တောင့်ခံနိုင်သလား ဆိုသည်ပင် ဖြစ်သည်။ နောက်တချက်က တရုတ်သည် ဒေသတွင်း၌ အမေရိကန် ရရှိထားသည့် မဟာမိတ်များ၊ မိတ်ဖက်များနှင့် ကွန်ရက်ကို တပိုင်းတစစီ ဖြစ်စေရန်၊ ကွဲအက်စေရန်နှင့် ပျက်ပြားစေရန် နှစ်ဆတိုးလုပ်ဆောင်နေခြင်း ဖြစ်သည်။ တတိယအချက်က ထိုင်ဝမ်ကို ခက်ခဲရှုပ်ထွေးသည့် ကျူးကျော်မှုကို ခက်ခက်ခဲခဲ ဖြစ်မြောက်စေနိုင်စွမ်း ရှိရေးနှင့်ပတ်သက်ပြီး PLA ခေါင်းဆောင်ပိုင်း၏ ကျွမ်းကျင်မှုကို ရှီက ချင့်တွက်နေခြင်းဖြစ်သည်။ ရှီ ချင့်တွက်နေသည့် စတုတ္ထအချက်က “၎င်းအနေဖြင့် သတင်းအချက်အလက်စစ်ပွဲကို အနိုင်ရရမည်။ အမေရိကန်နှင့် အနောက်အုပ်စုသည် ဩဇာပါဝါ ကျဆင်း၊ တုံ့ဆိုင်းနေပြီး တရုတ်က ယုံကြည်အားထားရသည့် ခေါင်းထောင်နေသော အင်အားကြီးနိုင်ငံတခုအဖြစ် ရှုမြင်ခံရစေရေး သေချာအောင်လုပ်ရန်ဖြစ်သည်”။

သို့သော် ရှီသည် အဆိုပါ မျက်နှာစာအားလုံးတွင် စိန်ခေါ်မှုများနှင့် ရင်ဆိုင်နေရသည်။ ဥပမာအားဖြင့် အဆင့်မြင့်လယ်ဗယ် ဝန်ကြီးများ (အထူးသဖြင့် ကာကွယ်ရေးနှင့် နိုင်ငံခြားရေး) သည် ပျောက်ကွယ်သွားပြီး ၎င်းတို့၏ ကံကြမ္မာကို မသိရှိရပေ။ အဆိုပါ သစ္စာရှိ တပည့်များကို ရှီက လက်ရွေးစင် ရွေးထားခြင်း ဖြစ်သည်ဆိုသော်လည်း ယခုအခါ ၎င်း၏ ရွေးချယ်မှုများက အရှက်တကွဲဖြစ်လောက်အောင် မှားယွင်းခဲ့ကြောင်း ပြသနေသည်။ ဝန်ကြီးချုပ်ဟောင်း လီခါ့ချန် ရုတ်တရက် ကွယ်လွန်မှုနှင့်ပတ်သက်ပြီးလည်း တရုတ်ပြည်သူ အများအပြား၏ စိတ်ထဲတွင် မေးခွန်းတို့ ရှိနေသည်။ တရုတ်တွင် ရေကူးကန်တခု၌ နှလုံးဖောက်ခြင်းဖြစ်စဉ်က ဗလာဒီမာ ပူတင်၏ ရုရှား၌ အစိုးရနှင့် သဘောကွဲသူတဦး အဆောက်အအုံတခုမှ ပြုတ်ကျခြင်းဖြစ်ရပ်နှင့် တူညီသည့် ဂယက်အနက်များ ရှိသည်။

ရှီသည် လက်ရှိတွင် CCP ၏ ရာထူးအဆင့်များထဲမှ ပြိုင်ဘက်များကို ဖယ်ရှားထုတ်ပယ်နေခြင်း မဟုတ်ဘဲ ၎င်းသည် ၎င်း၏ နောက်လိုက်တပည့်ရင်းများထဲမှ အဆင့်အမြင့်ဆုံးလယ်ဗယ်များကို ပစ်မှတ်ထားနေသည်။ ယင်းက အဆိုအရတော့ ၎င်း၏ အနီးကပ် အတွင်းစည်းထဲမှ အားမကိုးရဘဲ လောဘကြီးကြောင်း ပြသသည့် သစ္စာရှိ နောက်လိုက်များဖြစ်သည်။ အမှန်အားဖြင့် ရှီ၏ စိတ်ပိုင်းဆိုင်ရာ ထိုးထွင်းဉာဏ်ကို သိချင်မိသည်။ ယခု သစ္စာဖောက်မှုများအရ ရှီ၏ စိတ်သဘောအပေါ် မည်သည့်သက်ရောက်မှုတို့ ရှိသလဲ။ ရှီသည် ပို၍ပို၍ တပါးသူအပေါ် ယုံမှားသံသယလွန်ကဲသူ ဖြစ်လာနေသလား။ ပိုပို၍ သီးသန့်ကိုယ်ထီးဖြစ်ခြင်းက လက်နက်ကိုင်ပဋိပက္ခတခု ဆိုက်ရောက်အောင် တွန်းပို့ရန် ဆုံးဖြတ်ခြင်းကဲ့သို့ တွက်ကိန်းမှားခြင်းတို့ ဖြစ်နိုင်စရာအလားအလာတို့ကို မြင့်တက်စေမည် ဖြစ်သည်။ ရှီသည် ကွန်မြူနစ် လူငယ်အဖွဲ့ချုပ်နှင့် ရှန်ဟိုင်း အုပ်စုအဖွဲ့မှ ပြိုင်ဘက်များကို ဖယ်ရှားရန် အပြင်းအထန် လုပ်ဆောင်ခဲ့သည်။ သို့သော် လက်ရှိတွင် ရန်သူများက သူ၏ အုပ်စုအတွင်းမှာပင် ရှိနေသည်ကို ရှီ တွေ့ရှိနေပြီဖြစ်သည်။ “ခုချိန်မှာ ကြည့်ရသလောက်ကတော့ ရှီဟာ သူ့ရဲ့ ကိုယ်ပိုင် ရုပ်လုံးမပေါ်သေးတဲ့ ရှီကျင့်ဖျင် အုပ်စုရဲ့ အဖွဲ့ဝင်တွေအဖြစ် အရင်က ယူဆတဲ့ တာဝန်ရှိသူများကို ဖယ်ရှားထုတ်ပယ်ရန် စိတ်ပိုင်းဖြတ်ထားတယ်လို့ ထင်ရပါတယ်။ အဲဒီအတိုင်းသာဆိုရင် မကြာတော့တဲ့ ရှေ့ကာလမှာ ပါတီ၊ အစိုးရနဲ့ စစ်တပ်ထဲမှာ နှံ့စပ်တဲ့ လှန်လှောမှုတွေ စီမံလာပါလိမ့်မယ်။ အဲဒါက အစိုးရရဲ့ ထိပ်ပိုင်းပုဂ္ဂိုလ်တွေနဲ့ PLA တာဝန်ရှိသူတွေရဲ့ လုပ်ငန်းတာဝန်တွေ ထိထိရောက်ရောက် လုပ်နိုင်စွမ်းအပေါ်မှာ ကြီးကြီးမားမား အဟန့်အတားဖြစ်စေမှာဖြစ်ပြီး နိုင်ငံရဲ့ ဦးတည်ရာလမ်းကြောင်းအပေါ်မှာ အပျက်သဘောဆောင်တဲ့ သက်ရောက်မှုဖြစ်စေပါလိမ့်မယ်” ဟု အမေရိကန်ရှိ The Jamestown ဖောင်ဒေးရှင်း နိုင်ငံရေး၊ စီးပွားရေး၊လူမှုရေး အကြံပေးအဖွဲ့မှ ဒေါက်တာ ဝီလီ ဝို-လက်ပ် လမ်က မှတ်ချက်ပြုသည်။

“သမ္မတဟောင်း လျူရှောင်ချီရဲ့သား ဗိုလ်ချုပ်ကြီး လျူယွမ်လိုမျိုး မကျေမချမ်းဖြစ်နေတဲ့သူတွေက ရှီရဲ့ “ရာသက်ပန် အုပ်ချုပ်သူ” ဆိုတဲ့ အနေအထားကို ခြိမ်းခြောက်လိမ့်မယ် ဆိုတာက ဖြစ်နိုင်ခြေ မရှိဘူးဆိုပေမယ့် ထိပ်ပိုင်းခေါင်းဆောင်တွေအကြား “အတွေးအခေါ် တူညီမှု” နဲ့ ရှီ အထူးတန်ဖိုးထားတဲ့ သံသယကင်းစွာ သစ္စာစောင့်သိမှုတို့ကတော့ ထိခိုက်ကောင်း ထိခိုက်နိုင်ပါတယ်။ အဲဒီလိုသာ ဆိုရင် လာမယ့်နှစ်မှာ တရုတ်ရဲ့ စီးပွားရေး ဒါမှမဟုတ် အမေရိကန်အပြင် ဥရောပနဲ့ အာရှမှာရှိတဲ့ အမေရိကန်ရဲ့ မဟာမိတ်တွေလိုမျိုး အဓိကပြိုင်ဘက်တွေနဲ့ ဆက်ဆံရေးအတွက် သိသာထင်ရှားတဲ့ တိုးတက်မှုတွေ မြင်ရဖို့ ခက်တယ်” ဟု ဒေါက်တာ လပ်က ဆက်ပြောသည်။ ကံမကောင်းသည်က အခြားနိုင်ငံများကို တရားမဝင်၊ ဗြောင်ကျကျ ဂရုမစိုက်မှုမှတဆင့် တရုတ်၏ မာန်မာနမောက်မာမှုက မိတ်ဆွေများကို ရန်သူများအဖြစ်သို့ ပြောင်းလဲထားစေခဲ့သည်။ ဥပမာအားဖြင့် ရှီသည် ၂၀၂၃ ခုနှစ် အစောပိုင်း ဖိလစ်ပိုင်သမ္မတ မားကို့စ်နှင့် တွေ့ဆုံပြီး ၎င်းတို့၏ အမြင်မတူမှုများကို ငြိမ်းချမ်းသော နည်းလမ်းများမှတဆင့် ပြေလည်အောင် ဖြေရှင်းရန် ကတိပြုခဲ့သည်။

သို့သော် နောက်တွင် ဘာဆက်ဖြစ်သည်နည်း။ ၎င်းတို့၏ အထူးသီးသန့်စီးပွားရေးဇုန်အတွင်းရှိ ဖိလစ်ပိုင် ငါးဖမ်းသမားများကို ၂၀၂၃ ၊ဇန်နဝါရီလက တရုတ်ကမ်းခြေစောင့်တပ်ဖွဲ့ (CCG) က မောင်းထုတ်ခဲ့သလို နောက်လတွင် CCG က ဖိလစ်ပိုင်ကမ်းခြေစောင့်သင်္ဘောတစင်းကို လေဆာဖြင့် ချိန်ရွယ်ထိုးခဲ့ကာ လက်ရှိတွင် တရုတ်သည် Second Thomas သောင်ခုံသို့ ထောက်ပို့မစ်ရှင်သွားသည့် ဖိလစ်ပိုင်သင်္ဘောများကို ပုံမှန်လိုလို အကြမ်းပတမ်း နှောင့်ယှက်နေသည်။ “အခုလိုမျိုးဖြစ်လာတော့လည်း ဖိလစ်ပိုင်အစိုးရအနေနဲ့ အနောက်ဖိလစ်ပိုင်ပင်လယ်မှာ တရုတ်ရဲ့ ရန်လိုမှုနဲ့ တရားမဝင်တဲ့ လုပ်ဆောင်ချက်တွေကို ဖော်ထုတ်ဖို့ပဲ ရွေးချယ်ရပါတယ်။ အနောက်ဖိလစ်ပိုင်ပင်လယ်မှာ တင်းမာမှုတွေ မြင့်တက်လာတာက အမေရိကန်ကြောင့် မဟုတ်ဘဲ တရုတ်ကြောင့် ဖြစ်တယ်ဆိုတာက ရှင်းရှင်းလင်းလင်းရှိဖို့ အရေးကြီးပါတယ်” ဟု ဖိလစ်ပိုင်ကမ်းခြေစောင့်တပ်၏ လူသားရင်းမြစ် စီမံခန့်ခွဲမှုဆိုင်ရာ တပ်ဖွဲ့အကြီးအကဲ ဗိုလ်မှူးချုပ် ဂျေး တာရီလာက ပြောသည်။

အမေရိကန်သည် ဖိလစ်ပိုင်၏ မဟာမိတ် ဖြစ်သည်ဆိုသော်လည်း ယင်းက တင်းမာမှုများ၏ ဇာစ်မြစ်အကြောင်းရင်း မဟုတ်ပေ။ တရုတ်အစိုးရအနေဖြင့် မရေရာရှုပ်ထွေးမှုတို့ကို ရှောင်သင့်ပြီး အကယ်၍ ၎င်းတို့အနေဖြင့် ၎င်းတို့၏ ပြောစကားများတွင် ရိုးသားမှု ရှိသည်၊ တောင်တရုတ်ပင်လယ်တွင်းရှိ အခြားနိုင်ငံများကို အနိုင်မကျင့်ရန် လုပ်ဆောင်ခဲ့သည်ဆိုပါက တင်းမာမှုများ ယခုလောက်အထိ မြင့်တက်လိမ့်မည် မဟုတ်ဆိုသည်ကို သိရှိလက်ခံရန် သင်ယူသင့်သည်။ ထိုသို့မဟုတ်ပါက တကယ်တွင် တင်းမာမှုများကို လျော့ကျစေရေးနှင့်ပတ်သက်ပြီး တရုတ် ဆိုလိုသည့်အရာက ကျိုးနွံနာခံခြင်း သို့မဟုတ် ၎င်းတို့၏ အနိုင်ကျင့်၊ ရန်လိုသည့် လုပ်ရပ်များကို မတုံ့ပြန်ခြင်းပင် ဖြစ်သည်။ ရှီ၏ တနှစ်တာ နှစ်သစ်ကူးအကြို မိန့်ခွန်းတွင် ၎င်းက အကဲစမ်းသော အချိန်ကာလများကို သွယ်ဝိုက်ပြောဆိုသည်။ “ရှေ့မှာ ကြုံရမယ့်လမ်းမှာ စမ်းသပ်မှုတွေ၊ အခက်အခဲတွေက ပုံမှန်ဖြစ်ပါလိမ့်မယ်။ လုပ်ငန်းတချို့ ဖိအားတွေနဲ့ ရင်ဆိုင်နေရသလို၊ လူထုထဲက တချို့လည်း အလုပ်အကိုင်ရှာတွေ့ဖို့၊ အခြေခံလိုအပ်ချက်တွေ ဖြည့်ဆည်းဖို့အတွက် အခက်အခဲတွေနဲ့ တွေ့ကြုံနေရသလို နေရာတချို့ဟာလည်း ရေကြီးမှုတွေ၊ တိုင်ဖွန်းတွေ၊ ငလျင်တွေ ဒါမှမဟုတ် အခြားသော သဘာဝဘေးအန္တရာယ်တွေဒဏ် ခံထားရတယ်”
အဆိုပါ မိန့်ခွန်းများတွင် အနုတ်သဘောဆောင်သည့် သဘောထားများနှင့် လူမှုရေးကိစ္စများကို တိုက်ရိုက် အစဖော်ခြင်းက မကြုံစဖူး မဟုတ်ဘူးဆိုရင်တောင်မှ အလွန် ကြုံတောင့်ကြုံခဲဖြစ်သည်။ ထို့ပြင် ယင်းသည် ရှီအနေဖြင့် CCP အတွင်းမှ ဖိအားများကို ရင်ဆိုင်နေရသည် ဆိုပြီး ဝန်ခံမှုတခု ဖြစ်ကောင်းဖြစ်နိုင်သည်။ ပင်ကိုအားဖြင့် ရှီ သို့မဟုတ် ပါတီအတွက် အပြစ်မကင်းမှု သဘောတရားတခု မရှိပေ။ မိန့်ခွန်းအပိတ်တွင် ရှီက ပြည်သူများ၏ ဘဝများ၊ အထူးသဖြင့် ကလေးများ၏ ပညာရေး၊ လူငယ်များအတွက် ပိုများသည့် အခွင့်အလမ်းများနှင့် သက်ကြီးရွယ်အို ပြုစုစောင့်ရှောက်ရေးတို့ကို တိုးတက်စေရေးအတွက် ၎င်း၏ ရည်မှန်းချက်ကို အလေးပေးပြောဆိုသွားသည်။ ၂၀၂၂ နှစ်ကုန်ပိုင်းက ရှီက COVID-19 နှင့်ပတ်သက်ပြီး ထုတ်ဖော်ခဲ့ချိန်က သက်ကြီးများအတွက် အချိုးအစားမမျှတသော သေဆုံးမှုနှုန်းများ တွေ့ကြုံခဲ့သည်။ လူငယ်တို့အကြား အလုပ်လက်မဲ့မှုနှုန်းကလည်း စိုးရိမ်စရာကောင်းအောင် မြင့်တက်နေသည်။ တရုတ်သည် ကမ္ဘာတွင် ပညာတတ်မှုအနည်းဆုံး အလယ်အလတ် ဝင်ငွေနိုင်ငံဖြစ်သည်။

သို့သော် “အဆိုပါ ကိစ္စများကို အတူတကွ ကိုင်တွယ်ဖြေရှင်းရန် အားလုံး အပြင်းအထန် လုပ်ဆောင်ကြရမည်” ဆိုခြင်းအတွက် ရှီက တာဝန်လွှဲဖည်ခဲ့သည်။ ၂၀၂၃ ဒီဇင်ဘာ ၂၁-၂၂ ရက် ပေါလစ်ဗျူရို အစည်းအဝေးတခု၌ ထုတ်ပြန်ခြင်းမရှိသည့် မိန့်ခွန်းတရပ်တွင် သိရသရွေ့ ရှီသည် အကြိမ် ၂၀ မြောက် ဗဟိုကော်မတီ တတိယမြောက် ညီလာခံကို ထပ်တလဲလဲ နောက်ဆုတ်ခဲ့ရသည်ဟု ဝန်ခံခဲ့ပုံရသည်။ သို့မဟုတ်ပါက ထိုညီလာခံသည် ယမန်နှစ် အောက်တိုဘာလက ကျင်းပခဲ့ရလိမ့်မည်ဖြစ်သည်။

နောက်ဆုတ်ရခြင်း၏ အကြောင်းရင်းက ရှီအနေဖြင့် နိုင်ငံ၏ ပြဿနာများအတွက် အလားအလာရှိ‌သော ဖြေရှင်းချက်တစုံတရာ ပေးနိုင်ခြင်း မရှိခြင်းကြောင့်ဟု ဒေါက်တာ ဝီလီ ဝို-လက်ပ် ကိုးကားသည့် သတင်းရင်းမြစ်များအရ သိရသည်။ သတင်းရင်းမြစ်များ၏ အဆိုအရ ရှီသည် ၎င်းအား အကြံကောင်းပေးရန် ပျက်ကွက်ခြင်းနှင့် အမိန့်မနာခံမှု လက္ခဏာများ ပြသခြင်းအတွက် ပေါလစ်ဗျူရို အဖွဲ့ဝင်များနှင့် အကြီးတန်း ကေဒါ ၂၃ ဦးကို ပြစ်တင်ခဲ့သည်ဟု သိရသည်။ ၎င်း၏ ဖြေရှင်းချက်ကရော ဘာလဲ။ အတွေးအမြစ်စနစ် အယူဝါဒ သွတ်သွင်းခြင်းကို တိုးမြင့်လုပ်ဆောင်ခြင်းဖြစ်သည်။ စိတ်နှလုံးများကို မာကျောစေရန်နှင့် စိတ်ဓာတ်အားမန် ခိုင်မာစေရန် ယမန်နှစ် အောက်တိုဘာလက အမျိုးသား ကေဒါ ပညာပေးမှုနှင့် လေ့ကျင့်သင်ကြားမှု အစီအစဉ် (၂၀၂၃-၂၇) မှတဆင့် အရှိန်မြင့်ထားသည့် ကမ်ပိန်းတခုကို စတင်လုပ်ဆောင်ခဲ့သည်။ ကေဒါများသည် အွန်လိုင်းမှ self-study လုပ်ရမည် ဖြစ်သလို လူကိုယ်တိုင် စုပေါင်းလေ့ကျင့်မှုကိုလည်း လုပ်ရမည်ဖြစ်ပြီး ယင်းက ရာထူးအဆင့်ဆင့်တွင် အထက်ပိုရောက်လေ ပိုမိုပြင်းထန်လေဖြစ်သည်။ ရာထူးနိမ့်သော အရာရှိများပင်လျင် တနှစ်လျင် နာရီ ၁၄၀ စာ အတန်းများ တက်ရမည်ဖြစ်သည်။ ယင်းက ခေါင်းဆောင်မှု အခန်းကဏ္ဍများအတွက် ပိုမိုထိရောက်သော စီမံခန့်ခွဲမှု အရည်အချင်းများ ရရှိစေခြင်းသက်သက်မဟုတ်ဘဲ အရှိအတိုင်းဖြစ်သော အတွေးအမြစ်စနစ် အယူဝါဒသွတ်သွင်းခြင်းလည်း ဖြစ်သည်။ တကယ်တမ်းတွင် ပါတီဝင်များသည် အဆိုပါ ပြင်းထန်သော သတ်မှတ်ချက်များကို တင်ပြရမည် ဖြစ်ပြီး အကြောင်းမှာ ရာထူး အဆင့်တိုးတက်လှမ်းမှုများက ယင်းအပေါ် မူတည်၍ ဖြစ်သည်။ အမှန်တွင် နယ်ပယ်တခုတွင် ကျွမ်းကျင်ပညာရှင်တဦးဖြစ်ခြင်းထက် “အနီ” ဖြစ်ရန်က ပိုအရေးကြီးနေပြီး ယင်းက တရုတ်၏ အနာဂတ် စီမံအုပ်ချုပ်မှုအတွက် ကောင်းသည့် နိမိတ်လက္ခဏာ မဟုတ်ပေ။

စည်းကမ်းတင်းကျပ်စွာ အယူဝါဒသွတ်သွင်းခြင်းက CCP ၏ ဖြေရှင်းနည်းလမ်း ဖြစ်သည်။ ယင်းအတွက် အတွေးအမြင်စနစ်ဆိုင်ရာ လျော့ရဲမှုက သူ့နိုင်ငံ၏ ပြဿနာများအတွက် အရင်းခံအကြောင်းဟု ရှီက ထင်မြင်သည်။ ဆိုဗီယက်ပြည်ထောင်စုတွင် ဖြစ်ခဲ့သကဲ့သို့ လူများ ကွန်မြူနစ်ဝါဒအပေါ် ယုံကြည်မှု ပျောက်ဆုံးသည့် “သမိုင်းဆိုင်ရာ နတ္ထိကဝါဒ” ကို ရှီက စိုးရိမ်သည်။ ယုတ်စွအဆုံး ပုဂ္ဂလိက စီးပွားရေးသမားများပင်လျင် ခေတ်သစ်တခုအတွက် တရုတ်၏ ထူးခြားသော လက္ခဏာများနှင့်အတူ ဆိုရှယ်လစ်ဇင်ဆိုင်ရာ ရှီကျင့်ဖျင် အတွေးအမြင်၏ အခြေခံသဘောတရားများကို သင်ယူရင်း မရေတွက်နိုင်သော နာရီများကို အချိန်ကုန်ဆုံးနေရသည်။ ဧကရာဇ်ဖြစ်သူက ဂုဏ်ရောင်ထွန်းပြောင်မှု ပျောက်ဆုံးနေချိန်တွင် ယင်းတို့က ပုဂ္ဂိုလ်ရေး ဆည်းကပ် ကိုးကွယ်မှုတခု၏ အတွေးအမြစ်စနစ်ဆိုင်ရာ အဆောင်အယောင် အဆင်တန်ဆာများဖြစ်သည်။ တရုတ်သည် ပုံမှန်အတိုင်း စီးပွားရေးအတွက် တံခါးဖွင့်ထားကြောင်း အနောက်အုပ်စုကို အာမခံရန် ရှီက ကြိုးပမ်းသည်။ သို့သော် ယင်းသို့မဟုတ်ပေ။ ရှီသည် နိုင်ငံကို ဖိနှိပ်‌သော၊ ယုံမှား သံသယလွန်ကဲသော နိုင်ငံတခုအဖြစ် ရောက်ရှိထားစေပြီး မွန်းကျပ်သည့် အကြောက်တရားတခုအပြင် တရုတ်ကို ပြည်ပဩဇာလွှမ်းမိုးမှုမှ ကာကွယ်သည့်၊ အပေါက်ကာသည့် မဟာတံတိုင်းသစ်တခုကို ဖြစ်ပေါ်စေသည်။

တရုတ်၏ ကြွယ်ဝပြီး နိုင်ငံစုံအခြေစိုက် ကော်ပိုရေးရှင်းများထံမှ ဧရာမ ရင်းနှီးငွေ ယိုစီးမှုတို့ ရှိခဲ့ပြီး ယမန်နှစ်တနှစ်တည်းတွင် အမေရိကန်ဒေါ်လာ ၅၀ ဘီလီယံ ရှိခဲ့သည်။ ဒေါ်လာ ၃၃၅ ဘီလီယံအထိ အကြွေးတင်နေသော Evergrande ကဲ့သို့ လုပ်ငန်းကြီးများကြောင့်လည်း ဘဏ်များအပေါ် အဟန့်အတားဖြစ်စေသည်။ သိစပ်မြင်နှံ့သော ရှီထံမှ ဖြေရှင်းနည်းလမ်းကို တွေ့ရခြင်းမရှိပေ။ ၎င်းတို့အကောင်းဆုံး လုပ်နိုင်သည်က အရှက်ရစရာ ဒေတာများ ထုတ်ပြန်ခြင်းကို ရပ်ဆိုင်းခြင်းနှင့် “အပျက်သဘောဆောင် သတင်းများ” မဖြန့်ရန် စီးပွားရေးလုပ်ငန်းရှင်များနှင့် ဂျာနယ်လစ်များကို သတိပေးခြင်းသာဖြစ်သည်။ နှစ်သစ်ကူးနေ့ တရုတ်၏ အကြီးဆုံး သတင်းခေါင်းစဉ်များမှာ ရှီ နှင့် ပူတင် အပြန်အလှန် နှုတ်ဆက်နေခြင်းနှင့် ၂၀၂၄ ခုနှစ်ကို ကင်ဂျုံအမ်းနှင့်အတူ တရုတ်-မြောက်ကိုရီးယား မိတ်ဆွေဖြစ်မှုနှစ်အဖြစ် သတ်မှတ်ခြင်း ဖြစ်သည်။ တရုတ်သည် ယူကရိန်းတွင် လူမဆန်သည့် ကျူးကျော်မှုတို့ကို ဆက်လက်ကျူးလွန်နေသည့် ရုရှားအပြင် ပူတင်ကို လက်ရှိတွင် ပဲ့ထိန်းဒုံးကျည်များ ထောက်ပံ့နေသည့် မြောက်ကိုရီးယားတို့ဘက်ကနေ ရပ်တည်သည် ဆိုသည်က ရှင်းလင်းသည်။

နောက်ထပ် စိုးရိမ်ပူပန်စရာကောင်းသည့် ထုတ်ဖော်မှုက တရုတ်၏ အသေးစားလက်နက် အများအပြား ဂါဇာရှိ ဟားမတ်စ်တို့ လက်ထဲတွင် ရောက်နေခဲ့သည် ဆိုခြင်းပင် ဖြစ်သည်။ လက်နက်များထဲတွင် QBZ အမျိုးအစား ချေမှုန်းရေး ရိုင်ဖယ်များနှင့် QLZ87 အော်တိုမက်စ် ဗုံးလောင်ချာများ ပါဝင်သည်။ ချေမှုန်းရေး ရိုင်ဖယ်များအတွက် ယမ်းတောင့်များ၊ ရိုင်ဖယ် အဝေးပစ်မှန်ပြောင်း ချိန်ကွက်များ၊ နည်းပညာမြင့် နားထောင်မှု ပစ္စည်းများနှင့် ဗျူဟာမြောက် စစ်ဘက်သုံး ရေဒီယိုများကို အစ္စရေး ကာကွယ်ရေးတပ်ဖွဲ့က ထုတ်ဖော်ထားသည်။ တရုတ်ပစ္စည်းများ ဟားမတ်စ်တို့လက်ထဲ မည်သို့မည်ပုံ ရောက်နေသလဲ ဆိုသည်ကို အစ္စရေးက စုံစမ်းစစ်ဆေးလျက် ရှိသည်ဆိုသော်လည်း ဖြစ်နိုင်ခြေ အများဆုံးလမ်းကြာင်းက အီရန်မှတဆင့် ဖြစ်သည်။ အစ္စရေးနှင့် တရုတ်သည် တချိန်က နီးကပ်သည့် ဆက်ဆံရေး ရှိခဲ့သော်လည်း တရုတ်သည် ဟားမတ်စ်ကို ပြစ်တင်ရှုတ်ချရန် ငြင်းဆန်ပြီး အစ္စရေးသည် “ကိုယ့်ကိုယ်ကိုယ် ကာကွယ်မှု အတိုင်းအတာကို ကျော်လွန်” လုပ်ဆောင်နေကြောင်း တရုတ်က စွပ်စွဲသည်။ အထူးသဖြင့် ၁၉၉၂ တွင် အစ္စရေးနှင့် နှစ်နိုင်ငံဆက်ဆံရေး ပြန်စမှုူ မတိုင်မီ တချိန်က ပါလက်စတိုင်း ဂိုဏ်းအဖွဲ့များကို လေ့ကျင့်၊ လက်နက်တပ်ပေးခဲ့ပြီးနောက်ပိုင်း ယခုအချိန်တွင် တရုတ်လက်နက်၊ ပစ္စည်းများကို ဟားမတ်စ်တို့ မည်သည့်အတွက်ကြောင့် ကိုင်ဆောင်နေနိုင်သလဲ ဆိုသည်ကို တရုတ်အနေဖြင့် ရှင်းပြရလိမ့်မည် ဖြစ်သည်။

တရုတ်သည် မဟာဗျူဟာ ခြေကုပ်များ ရယူနိုင်ရန်နှင့် အမေရိကန်ကို ထိခိုက်စေရန် အမျိုးမျိုးသော ကမ္ဘာလုံးဆိုင်ရာ ပဋိပက္ခများကို အသုံးပြုရာတွင် ကျွမ်းကျင်သော်လည်း ရှီသည် လက်ရှိတွင် သူ့ကိုယ်သူ သမိုင်း၏ မှားယွင်းသော ဘက်ခြမ်းတွင် ပို၍ ပို၍ တွေ့နေရပြီဖြစ်သည်။