ဓါတု
(မဇ္ဈိမ)။ ။မန္တလေးတိုင်း၊ မြင်းခြံမြို့အရှေ့ဘက် မန်ကျည်းတမျှားတောကျေးရွာတွင် ယနေ့ ဇန်နဝါရီလ ၂၇ ရက် နံနက် ၁ နာရီဝန်းကျင်က လူငယ် ငါးဦးအား စစ်ကောင်စီတပ်က ပစ်သတ်သွားကြောင်း မျက်မြင်တွေ့ရှိသည့် ဒေသခံသတင်းရင်းမြစ်ထံက သိရသည်။
အဆိုပါ လူငယ် ငါးဦး၏မျက်လုံးကို အဝတ်ဖြင့်ပိတ်စည်းထား၍ ကားပေါ်မှဆွဲချပြီး ပစ်သတ်လိုက်ခြင်းဖြစ်ကြောင်း ၎င်းကမဇ္စျိမကို ပြောသည်။
” ကားမီးရောင်ကို တခြားတနေရာထိုးပြီး အမှောင်ရိပ်ထဲ ပျူနဲ့ စစ်ေ×ွးတွေက သူတို့ကိုသေနတ်နဲ့ ပစ်သတ်တယ်။ ချုံပုပ်ထဲကနေ ချောင်းကြည့်လို့မြင်ရတာ၊ အဲ့ဒီအချိန်က တောကြောင်၊ ယုန်ထွက်တဲ့အချိန် တောလည်တဲ့ဓလေ့ဆိုတော့ အမဲလိုက်နေရင်း ကားလာတော့ချုံထဲပုန်းရင်းမြင်လိုက်တာ”ဟု ၎င်းကဆိုသည်။
ယင်းပစ်သတ်ခံရသည့် လူငယ် ငါးဦးမှာ တောင်သာမြို့နယ် အမှတ်(၁) ရပ်ကွက်၊ အုတ်တိုက်တောကျေးရွာမှ ကိုတင်မျိုးခိုင်(အသက် ၁၉ နှစ်)၊ကိုခိုင်ဝေဖြိုး (အသက် ၂၅နှစ်)၊ ကိုခံပြော (အသက် ၁၉ နှစ်) ၊ ကိုမြတ်သူ (အသက် ၁၉ နှစ်)နှင့် မြင်းခြံမြို့နယ် အမှတ်(၂)ရပ်ကွက်မှ ကိုမွှားတား (အသက် ၂၄ နှစ်)တို့ဖြစ်ကြကြောင်း ၎င်းတို့နှင့်ဆွေမျိုးနီးစပ်သူတဦးက မဇ္စျိမကိုပြောသည်။
” အသတ်ခံရတဲ့သူတို့တွေက သူငယ်ချင်းတွေ အဲ့ဒီထဲက ကျွန်တော့ညီတဝမ်းကွဲပါတယ်။ မြင်းခြံ မြို့ပေါ်မတက်နဲ့ ခေတ်အခြေအနေမကောင်းဘူးဆိုပြီး အဖေ အမေက လိုက်ခေါ်တာမရဘူး၊ မြို့ပေါ်တက်ပြီး KTV သွားကြတာ မြင်းခြံမြို့ပေါ် KTV တွေက စစ်တပ်နဲ့ရဲတွေကြီးစိုးထားတာ။ သူတို့ကရိုးရိုးသာမန်လူငယ်တွေဆိုတော့ ကြည့်ရတာရန်ဖြစ်တယ်နဲ့ တူတယ်”ဟုဆွေမျိုးနီးစပ်သူတဦးက ဆိုသည်။
အသတ်ခံရသည့်ရုပ်အလောင်းများကို သက်ဆိုင်သည့်မိသားစုများထံ အကြောင်းမကြားသေးသဖြင့် အလောင်းပြန်မရရှိသေးကြောင်း၎င်းကဆိုသည်။
အဆိုပါလူငယ်များအား စစ်ကောင်စီတပ်မှပစ်သတ်သည့်နေရာနှင့် ကာရာအိုကေဆိုင်(KTV)မှာ တမိုင်ဝန်းကျင်သာကွာဝေးကြောင်း သိရသည်။
မြင်းခြံမြို့နယ်တွင် စစ်ကောင်စီတပ်နှင့်ပျူစောထီးအဖွဲ့မှ မကြာခဏဆိုသလို ဒေသခံများထံ ဆက်ကြေးကောက်ငွေညစ်တောင်းခံခြင်း၊ နိုင်ထက် စီးနင်းပြုမူခြင်းများ လုပ်ဆောင်နေကြောင်းဒေသခံများက ဆိုသည်။
စာတည်း- သန့်ဇော်(သန်လျင်)
