ပုံအညွှန်း- ခမရ (၃၅၆) တပ်ရင်းသိမ်း တိုက်ပွဲအတွင်း သိမ်းဆည်းရမိခဲ့သည့် လက်နက်၊ ခဲယမ်းများ
YT
(မဇ္ဈိမ)။ ။ ကရင်ပြည်နယ်၊ မြဝတီမြို့နယ် သင်္ဃန်းညီနောင်မြို့သစ်အခြေစိုက် စစ်ကောင်စီခြေမြန်တပ်ရင်း ခမရ (၃၅၆) ကို တိုက်ခိုက်သိမ်းပိုက်နိုင်ခဲ့ကြောင်း ကရင်အမျိုးသားအစည်းအရုံး(KNU) ဗဟိုက သတင်းထုတ်ပြန်သည်။
ခမရ (၃၅၆) ကို မတ်လ ၁၅ ရက်နေ့၊ ညနေ ၃ နာရီတွင် စတင်တိုက်ခိုက်ခဲ့ခြင်းဖြစ်ပြီး ည ၇ နာရီအချိန်တွင် စခန်းတခုလုံးကို သိမ်းပိုက်နိုင်ခဲ့ကြောင်း KNU က ဖော်ပြသည်။
အဆိုပါ စခန်းသိမ်းတိုက်ပွဲအတွင်း KNLA ပူးပေါင်းတပ်ဖွဲ့ဘက်မှ ရဲဘော်တဦး ကျဆုံး၍ ငါးဦး ဒဏ်ရာရခဲ့ပြီး စစ်ကောင်စီတပ်သား ၁၁ ဦးသေဆုံး ၍ ထိခိုက်ဒဏ်ရာရသူများပြားခဲ့ကြောင်း၊ အရေအတွက် အသေးစိတ်ကို အတည်ပြုနေဆဲဖြစ်ကြောင်း၊ ခမရ(၃၅၆)ထံမှ လက်နက်ကြီးလက်နက်ငယ် ခဲယမ်းအများအပြားကိုလည်း သိမ်းဆည်းရမိခဲ့ကြောင်း သိရသည်။
သင်္ဃန်းညီနောင်တွင် ယမန်နေ့ မတ်လ ၁၉ ရက်နေ့အထိ ခမရ (၃၅၇) တပ်ရင်းနှင့် သင်္ဃန်းညီနောင်ဗျူဟာ အနီးတွင် KNLA ပူးပေါင်းတပ်ဖွဲ့နှင့် စစ်ကောင်စီတပ်သားများအကြား တိုက်ပွဲဖြစ်ပွားခြင်းရှိပြီး စစ်ကောင်စီက လေကြောင်းမှ ဗုံးကြဲမှုများ ပြုလုပ်ခဲ့ပြီး ခြေလျင်တပ်ရင်း ခလရ (၂၇၅) မှလည်း လက်နက်ကြီးများ ရမ်းသန်း ပစ်ခတ်မှုများ ပြုလုပ်ခဲ့ကြောင်း မြေပြင်ရဲဘော်ထံက သိရသည်။
” တိုက်ပွဲဖြစ်နေတုန်းပါဗျ။ (ခမရ ၃၅၇ ကို)တိုက်ဆဲပါပဲ” ဟု မြေပြင်ရဲဘော်က ယမန်နေ့ မတ်လ ၁၉ ရက်နေ့၊ ညနေပိုင်းက မဇ္ဈိမကိုပြောသည်။
လက်ရှိတွင် ကရင်အမျိုးသားအစည်းအရုံး (KNU) တပ်မဟာ (၆) နယ်မြေ၊ ဒူးပလာယာခရိုင်အတွင်းရှိ စစ်ကောင်စီတပ်စခန်းများကို စခန်းသိမ်းတိုက်ပွဲများအဖြစ် ဆက်လက်ဆင်နွှဲလျက်ရှိနေပြီး နေ့စဉ်နှင့်အမျှ တိုက်ပွဲများ ပြင်းထန်လျက်ရှိကြောင်း KNU က အသိပေးထုတ်ပြန်ထားသည်။
ပြီးခဲ့သည့် မတ်လ ၇ ရက်နေ့တွင် သင်္ဃန်းညီနောင်အခြေစိုက် ခမရ (၃၅၅)၊ မတ်လ ၉ ရက်နေ့တွင် သင်္ဃန်းညီနောင်၊ မတ်လ ၁၁ ရက်နေ့တွင် မြဝတီမြို့နယ်ရှိ စစ်ကောင်စီ၏ ဖလူးစခန်းတို့ကို KNLA ပူးပေါင်းတပ်ဖွဲ့က တိုက်ခိုက် သိမ်းပိုက်ထားပြီး လက်နက်၊ ခဲယမ်းများစွာ သိမ်းဆည်းရမိခဲ့ကြောင်း KNU ဗဟို၏ ထုတ်ပြန်ချက်နှင့် သတင်းရင်းမြစ်များထံက သိရသည်။
စာတည်း – သန့်ဇော်(သန်လျင်)
