ပုံအညွှန်း- သင်္ဃန်းညီနောင်ညဗျူဟာသိမ်း တိုက်ပွဲအတွင်း သိမ်းဆည်းရမိခဲ့သည့် လက်နက်များ (ဓါတ်ပုံ- KNLA-GHQ)
YT
(မဇ္ဈိမ)။ ။ ကရင်ပြည်နယ်၊ မြဝတီမြို့နယ်၊ သင်္ဃန်းညီနောင်ရှိ အရှေ့တောင်တိုင်း စစ်ဌာနချုပ် (ရတခ)လက်အောက်ခံ သင်္ဃန်းညီနောင် ဗျူဟာစခန်းသိမ်း တိုက်ပွဲအတွင်း သိမ်းဆည်းရမိသည့် လက်နက်များကို ကရင်အမျိုးသားလွတ်မြောက်ရေးတပ်မတော် (KNLA) ဗဟိုက ဓါတ်ပုံနှင့်တကွ ထုတ်ပြန်လာသည်။
သင်္ဃန်းညီနောင်ဗျူဟာစခန်းကို ဧပြီလ ၅ ရက် နံနက် ၈ နာရီမှစတင်၍ KNLA ဦးဆောင်သည့် တော်လှန်ရေးပူးပေါင်းတပ်ဖွဲ့များက တိုက်ခိုက်ခဲ့ခြင်းဖြစ်ပြီး ငါးနာရီအကြာ နေ့လယ် ၁ နာရီအချိန်တွင် အပြီးသတ် တိုက်ခိုက်သိမ်းပိုက်နိုင်ခဲ့ကြောင်း သိရသည်။
အဆိုပါ ဗျူဟာစခန်းသိမ်း တိုက်ပွဲအတွင်း စစ်ကောင်စီတပ်စခန်းအတွင်းမှ သိမ်းဆည်းရမိခဲ့သည့် ၁၂၂ မမနှင့် ၁၂၀ မမ လက်နက်ကြီး စုစုပေါင်း လေးလက်အပါအဝင် လက်နက်ကြီး၊ လက်နက်ငယ်များ၊ ခဲယမ်းများ သိမ်းဆည်းရမိခဲ့ကြောင်း KNLAက ပုံနှင့်တကွ ထုတ်ပြန်လာခဲ့ခြင်းဖြစ်သည်။
သို့ရာတွင် အဆိုပါ တိုက်ပွဲအတွင်း နှစ်ဖက် ထိခိုက်၊ ကျဆုံးမှု အခြေအနေများကို ထုတ်ပြန်ပြောဆိုခြင်း မရှိသေးပေ။
မတ်လ ၇ ရက်နေ့မှစ၍ မြို့သိမ်းတိုက်ပွဲအနေဖြင့် တိုက်ပွဲများ ပြင်းထန်လာခဲ့သည့် သင်္ဃန်းညီနောင်တွင် တိုက်ပွဲကာလ တလကျော်အတွင်း သင်္ဃန်းညီနောင်တွင် အခြေစိုက်သည့် ခမရ (၃၅၅)၊ (၃၅၆)၊ (၃၅၇) နှင့် သင်္ဃန်းညီနောင်ဗျူဟာ၊ ရဲစခန်း စသည့် စစ်ကောင်စီ အထိုင်ချ တပ်ရင်းနှင့် စခန်းများကို KNLA ပူးပေါင်းတပ်ဖွဲ့က တိုက်ခိုက်သိမ်းပိုက်ထားပြီးဖြစ်သည်။
ယမန်နေ့ (ဧပြီလ ၅ ရက်)ညပိုင်းမှစ၍ သင်္ဃန်းညီနောင်- မြဝတီလမ်းပေါ်၊ မြဝတီမြို့အဝင်ရှိ ခြေလျင်တပ်ရင်း ခလရ (၂၇၅) ကို KNLA၊ PDF ပူးပေါင်းတပ်ဖွဲ့က ဝိုင်းဝန်းပိတ်ဆို့ တိုက်ခိုက်နေပြီး ယနေ့ (ဧပြီလ ၆ ရက်) နေ့လယ်ပိုင်းတွင် အဆိုပါ တပ်အတွင်းမှ စစ်ကောင်စီတပ်သား ရာနှင့်ချီ အလံဖြူထောင်၊ လက်နက်ချ အညံ့ခံခဲ့ကြောင်း မြေပြင်သတင်းရင်းမြစ်များက ပြောသော်လည်း မဇ္ဈိမအနေဖြင့် အတည်ပြုနေဆဲဖြစ်သည်။
စာတည်း ။ ။ ဖူးသိမ်ကျ
