ပုံအညွှန်း – တိုက်ခိုက်ခံရမှုကြောင့် မီးလောင်ပျက်စီးသွားသည့် ဘုန်းကြီးကျောင်းကို ဒေသခံများက မီးငြိမ်းသတ်နေစဉ်
MTO
(မဇ္ဈိမ)။ ။ မကွေးတိုင်း ၊ ဆောမြို့နယ်ရှိ ဘုန်းကြီးကျောင်းတွင် ပြည်သူများစုဝေးနေစဥ် စစ်ကောင်စီက လေကြောင်းမှ တိုက်ခိုက်ခဲ့၍ ပြည်သူ ၁၅ ဦး ထက်မနည်း သေဆုံးပြီး ဦးရေ ၃၀ ဝန်းကျင် ဒဏ်ရာရသွားကြောင်း ဆောမြို့နယ် ပြည်သူ့အုပ်ချုပ်ရေးအဖွဲ့ (ပအဖ) ထံက သိရသည်။
ဆောမြို့နယ်၊ ကျောက်ထုတိုက်နယ်၊ အကြည်ပန်းပလွန်းကျေးရွာရှိ ဘုန်းကြီးကျောင်း ယမန်နေ့ မေလ ၉ ရက်နေ့ နံနက် ၁၀ နာရီတွင် တိုက်ခိုက်ခံခဲ့ရခြင်းဖြစ်ကြောင်း ဆောမြို့နယ် ပအဖ အဖွဲ့ဝင် ဆရာကြည်က ပြောသည်။
“ဗုံးတွေက တော့ ပေါင် ၅၀၀ ဗုံးတွေ ဖြစ်ဖို့ များတယ်။ ဘုန်းကြီးကျောင်းက တော့ အားလုံးပဲ ပြာကျသွားတဲ့အဆင့်ပေါ့နော် ။ ဘာမှ မရှိတော့ဘူး နေအိမ် တွေ နည်းနည်း ထိခိုက်ပျက်စီးတာလည်းရှိတယ်။ ” ဟုပြောသည်။
လေကြောင်းမှ ဗုံးသီး နှစ်ကြိမ်ချကာ ၊ စက်သေနတ်များဖြင့်လည်း ပစ်ခတ်ခဲ့ကြောင်း ၊ ထိခိုက်သေဆုံးသူ အရေအတွက်ကို အတိအကျ သိနိုင်ရန် စာရင်းပြုစုနေဆဲဖြစ်ကြောင်း ၎င်းကဆိုသည်။
“ အလောင်းတွေက မီးလောင်သွားတော့ ဘယ်သူက ဘယ်ဟာမှန်းမသိနိုင်တော့ဘူးဖြစ်နေတယ် ” ဟု ဆရာကြည်က ပြောသည်။
စစ်ကောင်စီက လေကြောင်းမှ တိုက်ခိုက်ရသည့် အကြောင်းအရင်းကို မသိသလို၊ ဘုန်းကြီးကျောင်းတွင် စုဝေးရခြင်း အကြောင်းကိုလည်း မသိရသေးကြောင်း ၎င်းကဆိုသည်။
မဇ္ဈိမ အနေဖြင့် ထိခိုက်၊ သေဆုံးသူ အရေအတွက်ကို သီးခြား အတည်ပြုနိုင်ခြင်းမရှိသေးပါ။
မြို့နယ် ပအဖ အနေဖြင့် ထိခိုက်ဒဏ်ရာရရှိသူများကို ဆေးရုံဆေးခန်းသို့ပို့ဆောင်ပေးထားပြီး အကူအညီများ ဆက်လက် ပေးအပ်သွားမည်ဖြစ်ကြောင်း ဆောမြို့နယ် ပြည်သူ့အုပ်ချုပ်ရေး အဖွဲ့ ထံက သိရသည်။
“ နောက်ထပ်စစ်ရာဇဝတ်မှုကို ကျူးလွန်လိုက်တာပါပဲ။ ဘယ်လို အကြောင်းပြချက်နဲ့ မေ့လို့ မရပါဘူး ဒါတွေကိုအရေးယူနိုင်တဲ့အဆင့်အထိ ကျတော်တို့ အားလုံးကြိုးစာရမှာဖြစ်တယ် “ ဟု ဆရာကြည်က ပြောသည်။
စစ်ကောင်စီက နောက်ထပ်တိုက်ခိုက်မှုများ ပြုလုပ်လာမည်ကို စိုးရိမ်၍ ကျေးရွာနေပြည်သူများသည် လက်ရှိတွင် ဘေးလွှတ်ရာကို ရွေ့ပြောင်း နေထိုင်နေကြကြောင်း ဒေသခံများထံက သိရသည်။
စာတည်း။ ။အောင်ကျော်ဖြိုး
