မြတန်ဆောင်းစစ်ရှောင်စခန်းမှ ရခိုင်စစ်ဘေးရှောင်များ (ဓါတ်ပုံ- ပုံဟောင်း)
YT
(မဇ္ဈိမ)။ ။ ရခိုင်ပြည်နယ်တွင်း တိုက်ပွဲများကြောင့် အာရက္ခတပ်တော် (AA) ထိန်းချုပ်နယ်မြေများအတွင်း စစ်ဘေးရှောင်နေရသည့် ပြည်သူ ၅၀၀,၀၀၀ ကျော်အထိ ရှိလာကြောင်း ရက္ခိုင်အမျိုးသားအဖွဲ့ချုပ် (ULA/ AA) ပြောခွင့်ရ ဦးခိုင်သုခက ပြောသည်။
ယနေ့ (ဇွန်လ ၈ ရက်)တွင် ပြုလုပ်သည့် နဝမအကြိမ်မြောက် သတင်းစာရှင်းလင်းပွဲ၌ သတင်းထောက်တဦး၏ အမေးကို ပြန်လည်ဖြေကြားခဲ့ခြင်းဖြစ်ပြီး စစ်ဘေးရှောင်များအတွက် ဆေးဝါး၊ အမိုးအကာများ၊ အခြေခံစားသောက်ကုန်များ အဓိက လိုအပ်နေကြောင်း ပြောသည်။
” အခုအခါ နိုင်ငံတကာ အဖွဲ့အစည်းတွေဘက်က အကူအညီလာပေးဖို့ ဆိုတာကလည်း စစ်ကောင်စီက လုံးဝ ပိတ်ဆို့ထားတဲ့အတွက်ကြောင့် လူသားချင်းစာနာမှု အထောက်အကူပစ္စည်းတွေ ဝင်ရောက်လို့မရဖြစ်နေတယ်” ဟု ဦးခိုင်သုခက ပြောသည်။
စစ်ကောင်စီ၏ ပိတ်ဆို့မှုများကြောင့် စစ်ဘေးရှောင်များအတွက် လိုအပ်နေသည့် လူသားချင်းစာနာမှု အထောက်အကူများ မရဖြစ်နေသော်လည်း နိုင်ငံတကာ အဖွဲ့အစည်းများအနေဖြင့် နယ်စပ်ဖြတ်ကျော် အကူအညီပေးရန်နှင့် ဖြစ်နိုင်သမျှ နည်းလမ်းများကို အသုံးပြု၍ စစ်ဘေးရှောင်များကို အကူအညီပေးရန် ဦးခိုင်သုခက တိုက်တွန်းပြောကြားသည်။
ရက္ခိုင်အမျိုးသားအဖွဲ့ချုပ် (ULA/ AA) အနေဖြင့်လည်း ရှိသည့် အရင်းအမြစ်များကို အသုံးပြု၍ စစ်ဘေးရှောင်များအတွက် လိုအပ်သည့် ကျန်းမာရေးစောင့်ရှောက်မှု၊ လုံခြုံရေးနှင့် စစ်ဘေးရှောင်များ အငတ်ဘေး မဆိုက်ရေး စီစဉ်ဆောင်ရွက်မှုများရှိကြောင်း ဦးခိုင်သုခက ပြောသည်။
၂၀၂၃ ခုနှစ်၊ နိုဝင်ဘာလအတွင်း စတင်ခဲ့သည့် ရခိုင်ပြည်နယ် တိုက်ပွဲများအတွင်း စစ်ကောင်စီတပ်၏ လေကြောင်း၊ လက်နက်ကြီး၊ သေနတ် ပစ်ခတ်မှုများကြောင့် မေလအထိ ခြောက်လတာအတွင်း အရပ်သား ၂၆၈ ဦး သေဆုံးပြီး ၆၄၀ ဦး ဒဏ်ရာရခဲ့ကာ စစ်ဘေးရှောင် ၅၇၂,၃၀၀ အထိ ရှိကြောင်း အာရက္ခတပ်တော် (AA)၏ လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာ ပူးပေါင်းဆောင်ရွက်ပေးရေးရုံး (HDCO) က မေလ ၂၇ ရက်နေ့တွင် ထုတ်ပြန်ထားသည်။
စာတည်း – သန့်ဇော်(သန်လျင်)
