မဇ္ဈိမ။ ။ အာဏာသိမ်း စစ်ကောင်စီ ဖမ်းဆီးထောင်ချထားရာမှ ပြန်လည်လွတ်မြောက်လာသည့် သြစတေးလျနိုင်ငံသား မစ္စတာရှောင်တာနယ်၏ ထောင်တွင်းအတွေ့အကြုံစာအုပ်ကို မြန်မာဘာသာပြန်ဆိုနေပြီး မကြာခင်ထွက်ရှိလာမည်ဖြစ်ကြောင်း သိရသည်။
စာအုပ်ကို ထုတ်ဝေရန်ကြိုးစားဆောင်ရွက်နေသည့် ဘာသာပြန်ဆရာ ဦးအောင်မိုးက ၎င်း၏ ဖေ့ဘွတ်လူမှုကွန်ရက်စာမျက်နှာတွင် ထိုသို့ရေးသားထားခြင်းဖြစ်သည်။
“ ကြိုတင်စာရင်းပေး (Preorder) စနစ်နဲ့ ရောင်းပေးနိုင်အောင် စီစဥ် နေပါတယ်။ မကြာခင် ကြေညာပြီး အော်ဒါ ကောက်ပါ့မယ်။ နိုင်ငံအလိုက် သူ့နိုင်ငံကိုယ်စားလှယ်တွေကနေတဆင့် အော်ဒါတင်နိုင်ပါတယ်။ နိုင်ငံအလိုက်လည်း စျေးကွာခြားမှု ရှိမှာကိုတော့ နားလည်ပေးစေလိုပါတယ်” ဟု ဦးအောင်မိုးက ရေးသားထားသည်။
ပထမအကြိမ်အဖြစ် စာအုပ်ရေ ၃၀၀၀ ထုတ်ဝေသွားမည်ဖြစ်ပြီး ရန်ပုံငွေရရှိရန်လည်း ရည်ရွယ်ထား၍ စာအုပ်စျေး အတန်ငယ်မြင့်မည်ကို နားလည်ပေးစေလိုကြောင်းရေးသားထားသည်။
စာအုပ်အမည်မှာ သူမတူ အကျဥ်းသား ဖြစ်ပြီး မူရင်းစာအုပ်အမည် An Unlikely Prisoner ဖြစ်သည်။ ၎င်း၏ စစ်ကြောရေး အတွေ့အကြုံ ၊ အမှုရင်ဆိုင်ရပြီးနောက် ထောင်ဒဏ်ချမှတ်ခံရမှုများ၊ ထောင်တွင်းအတွေ့အကြုံများကို ထိုစာအုပ်တွင် ရေးသားထားသည်။
မစ္စတာရှောင်တာနယ်သည် ဒေါ်အောင်ဆန်းစုကြည်၏ စီးပွားရေးအကြံပေးဖြစ်ပြီး စစ်ကောင်စီအာဏာသိမ်းပြီး ရက်အနည်းငယ်အကြာတွင် ဖမ်းဆီးထိန်းသိမ်းခံခဲ့ရသည်။ ၎င်းကို ၂၀၂၂ ခုနှစ် နိုဝင်ဘာလ ၁၇ ရက်တွင် စစ်ကောင်စီက ပြစ်ဒဏ်မှ လွတ်ငြိမ်းချမ်းသာခွင့်ပေး၍ ပြည်နှင်ဒဏ်ပေးခဲ့သည်။
စာတည်း။ ။အောင်ကျော်ဖြိုး
