ပုံအညွှန်း- လှည်းတန်း စစ်မှုထမ်းဟောင်းရုံးတည်နေရာ
(မဇ္ဈိမ)။ ။ ရန်ကုန်တိုင်း၊ လှည်းကူးမြို့နယ်၊ ရန်ကုန်- မန္တလေး ကားလမ်းဘေးရှိ စစ်မှုထမ်းဟောင်းရုံးကို အဝေးထိန်းမိုင်းခွဲ၍ တိုက်ခိုက်ခဲ့ကြောင်း Yangon Army အဖွဲ့ တာဝန်ရှိသူထံက သိရသည်။
ယမန်နေ့ (ဧပြီလ ၂၆ ရက်)၊ ည ၇ နာရီ ၅ မိနစ်အချိန်တွင် လှည်းကူးစစ်မှုထမ်းဟောင်းရုံးအဆောက်အအုံအရှေ့ရှိ ဂိတ်ကင်းအနီး ပြင်းအားမြှင့် အဝေးထိန်းမိုင်းထောင်၍ ဖောက်ခွဲခဲ့ခြင်းဖြစ်ပြီး ဂိတ်အတွင်း ကင်းစောင့်နေသည့် စစ်မှုထမ်းဟောင်း နှစ်ဦး ဒဏ်ရာရခဲ့သည်ဟုဆိုသည်။
” ဂိတ်ကင်းထဲကိုတိုက်ခိုက်တာပါ။ အထဲမှာတော့စစ်* တွေရှိကြပါတယ်ဗျ။ ဂိတ်ကင်းစောင့် သုံးယောက်မှာ နှစ်ယောက်ထိပါတယ်။ စစ်မှုထမ်းဟောင်းတွေကပဲ လက်နက်ကိုင်ပြီးလုံခြုံရေးယူတာပါ။ စစ်မှုထမ်းဟောင်းတွေလည်း စစ်မှုပြန်ထမ်းပြီး ပြည်သူကို နှိပ်ကွပ်နေကြတယ်လေ” ဟု Yangon Army တာဝန်ရှိသူက မဇ္ဈိမကိုပြောသည်။
ကင်းစောင့်စစ်မှုထမ်းဟောင်းနှစ်ဦး ဒဏ်ရာရခြင်းအား မြေပြင်ကင်းထောက်များ၏ သတင်းပေးပို့ချက်ဖြင့် အတည်ပြုထားပြီး မည်သည့်နေရာတွင် ဆေးကုသမှုခံယူနေကာ ဒဏ်ရာ မည်မျှပြင်းထန်သည်ကိုမူ မသိရကြောင်း ၎င်းက ဆိုသည်။
အဆိုပါ တိုက်ခိုက်မှုကို Yangon Army နှင့် အနောက်ပိုင်းခရိုင် ပကဖအဖွဲ့က ပူးပေါင်း၍ လုပ်ဆောင်ခဲ့ခြင်းဖြစ်သည်။
ထိုပေါက်ကွဲသံကို လှည်းကူးမြို့ပေါ်ကပင် ကြားရသည်ဟုလည်း ဒေသခံတဦးက ပြောသည်။
” ကျွန်တော်တို့ အလုပ်က အောင်မင်္ဂလာရပ်ကွက် ဘက်မှာလေ။ အသံအကျယ်ကြီး ကြားရတယ်။ ” ဟု ၎င်းကပြောသည်။
စစ်ကောင်စီခေါင်းဆောင်နှင့် ဆက်စပ်နေသူများ၊ ပြည်သူ့စစ်မှုထမ်းဥပဒေအပေါ် အားပေးအားမြှောက် လုပ်နေသူများအားလုံးကို တိုက်ခိုက်သွားမည်ဖြစ်သဖြင့် ပြည်သူများအနေဖြင့် စစ်ကောင်စီနှင့် ပတ်သက်သည့်နေရာများ၏ အဝေးတွင် နေထိုင်ပေးကြပါရန် Yangon Army က ထုတ်ပြန်သတိပေးထားသည်။
ပြီးခဲ့သည့် မတ်လ ၁ ရက်နေ့ကလည်း Yangon Army နှင့် အနောက်ပိုင်းခရိုင် ပကဖ ပူးပေါင်းအဖွဲ့သည် ဇီးရိုးမိုင် (Zero Mile) စစ်ဆေးရေးဂိတ်အား အဝေးထိန်းမိုင်းဖြင့် တိုက်ခိုက်ခဲ့ပြီး အဆိုပါဂိတ်ရှိ စစ်ကောင်စီနှင့် ယာဉ်ထိန်းရဲ ခြောက်ဦး ထိခိုက်၊ သေဆုံးမှုရှိခဲ့ကြောင်း သိရသည်။
စာတည်း။ ။အောင်ကျော်ဖြိုး
