အမ်းမြို့မရဲစခန်း
ဓါတု
(မဇ္ဈိမ)။ ။ရခိုင်ပြည်နယ်၊ အမ်းမြို့ရှိ အကျဥ်းသား၊အချုပ်သား ၅၀ နီးပါးကို မတ်လ ၂၄ရက်နေ့တွင်ရန်ကုန်တိုင်း အင်းစိန်ဗဟို အကျဥ်းထောင်သို့ ပြောင်းရွှေ့ပို့ဆောင်ခဲ့ကြောင်း သိရသည်။
“အခုမှရုံးတက်ခါစ အမှုရင်ဆိုင်နေတဲ့ အချုပ်တရားခံ အကုန်ပါတယ်။အမှုစုံပေါ့။နောက်ပြီး အမိန့်ကျတဲ့သူတွေကို တပ်ကလာခေါ်တာ သတင်းထဲတက်လာတော့ အကုန်လုံးကို ရန်ကုန်ခေါ်သွား တယ်လို့ သတင်းအတိအကျ ရထားတယ်”ဟု တရားရုံးနှင့် နီးစပ်သည့် သတင်းရင်းမြစ်တဦးကပြောသည်။
ပို့ဆောင်ခံရသူများမှာ နိုင်ငံရေးအကျဥ်းသားများ၊ရာဇဝတ်မှု အကျဥ်းသားများနှင့် အမ်းမြို့မရဲစခန်းတွင် ချုပ်နှောင်ထားသောသူများ အပါအဝင် အမိန့်ကျပြီးနောက် တပ်အတွင်းခေါ်ဆောင်သွားသည့် အကျဉ်းသားများလည်းပါဝင်သည်ဟု သိရသည်။
၎င်းတို့ကို အမ်းမြို့နယ်တွင် တိုက်ပွဲစတင် ဖြစ်ပွားခဲ့သည့် မတ်လ ၂၄ရက်နေ့တွင် လေယာဥ်ဖြင့် ပို့ဆောင်ခဲ့ခြင်းဖြစ်ကြောင်း တရားရုံးနှင့် နီးစပ်သည့် သတင်းရင်းမြစ်တဦးက မဇ္စျိမကိုပြောသည်။
အချုပ်သားများကို ပို့ပို့ဆောင်ပြီးနောက် အမ်း-မင်းဘူးကားလမ်း ၊ အမ်းတောင်ကြားလမ်းမှ အချုပ်သားများအတွက် ရိက္ခာဆန်အိတ််များကို အမ်းမြို့မရဲစခန်းတွင် ကြိုတင်သိုလှောင်ထားကြောင်း ရဲစခန်းနှင့်နီးစပ်သည့် သတင်းရင်းမြစ်က ပြောသည်။
“အမ်း-မင်းဘူး ကားလမ်းကနေ ဆန်တွေထပ်မှာပြီး အချုပ်တရားခံတွေအတွက် မှာထားတဲ့ဆန်တွေကို ရဲစခန်းမှာ ရိက္ခာဆန်တွေ ကြိုမှာပြီးလှောင်ထားတယ်။ဟိုနေ့က အမ်းမှာတိုက်ပွဲဖြစ်တော့ ရိက္ခာပြတ်ရင်သူတို့(စစ်ကောင်စီတပ်ဖွဲ့)စားဖို့ ဖူလုံဖို့ထင်တယ်”ဟု ၎င်းကပြောသည်။
တကျော့ပြန်တိုက်ပွဲနောက်ပိုင်း အမ်းမြို့တွင် အမိန့်ကျပြီးသော အကျဥ်းသားအချို့ကို တပ်တွင်းသို့ခေါ်ဆောင်မှုများရှိနေပြီး တကျော့ပြန်တိုက်ပွဲ မစခင်အချိန်က အမိန့်ကျပြီးသော သူများကို စစ်တွေမြို့သို့လေယာဥ်ဖြင့် ပို့ဆောင်ထားသည့်အခြေအနေရှိသည်ဟုလည်း သိရသည်။
လက်ရှိအနေအထားအရ အမ်းမြို့ရှိ အချုပ်သား၊အကျဥ်းသားများသာ ပြောင်းရွှေ့ပို့ဆောင်ခြင်းဖြစ်ကြောင်း သိရသည်။
အမ်းမြို့အခြေစိုက် အနောက်ပိုင်းတိုင်းစစ်ဌာနချုပ်အနီး သုံးမိုင်အကွာ ပြောင်သေ ကျေးရွာတွင် ရက္ခိုင့်တပ်တော်(AA)နှင့် စစ်ကောင်စီတပ်တို့ မတ်လ ၂၄ ရက်မှ ယနေ့အထိနှစ်ဘက်ထိတွေ့တိုက်ပွဲ ဖြစ်ပွါးနေပြီး ပြောင်သေ၊လုံး၊ဂယ်လောင်း ကျေးရွာတို့၌ တိုက်ပွဲပြင်းထန်နေကြောင်း ဒေသခံများထံက သိရသည်။
တိုက်ပွဲဖြစ်ပွားနေစဥ်အတွင်း ယင်းပြောင်သေကျေးရွာနှင့်အနီးတဝိုက်ရှိ အမ်းမြို့မှ တပ်တောင်သွားသည့် ကားလမ်းတလျှောက် ကျေးရွာများကို စစ်ကောင်စီတပ်က လေကြောင်းမှ ပစ်ခတ်နေကြောင်းလည်း သိရသည်။
ရခိုင်ပြည်နယ်ရှိ မြို့ကိုးမြို့ကို သိမ်းပိုက်ထားနိုင်သည့် ရက္ခိုင့်တပ်တော်(AA)၏ ထိုးစစ်အရှိန်သည်
အမ်းမြို့နပခအနီးသို့ တိုက်ပွဲဖော်ဆောင်နေပြီဖြစ်ရာ လက်ရှိတွင် အမ်းမြို့နယ် အပါအဝင် ဘူးသီးတောင်၊မောင်တောမြို့တို့တွင် စစ်ရေးတင်းမာနေကြောင်း သိရသည်။
စာတည်း ။ ။ ဖူးသိမ်ကျ