ဓါတု
(မဇ္ဈိမ)။ ။ ရခိုင်ပြည်နယ်၊ အမ်း-တပ်တောင်ကားလမ်းအထွက် စစ်ကောင်စီထောက်ပို့တပ်အနီး ရက္ခိုင့်တပ်တော်(AA)မှထိုးစစ်ဆင်တိုက်ခိုက်ရာ တပ်မိသားစုဝင်များကားဖြင့် အနောက်ပိုင်းတိုင်းစစ်ဌာနချုပ်ထဲသို့ထွက်ပြေးတိမ်းရှောင်နေကြောင်းသိရသည်။
ယနေ့ မတ်လ ၂၇ ရက် နံနက်ပိုင်းတွင် အမ်းတပ်နယ်ခန်းမအတွင်း တပ်မတော်နေ့ အခမ်းအနားကျင်းပနေချိန် နပခ နှင့် ငါးဖာလုံခန့်သာအကွာအဝေးရှိသည့် ထောက်ပို့တပ်အနီး ကွမ်းခြံမြောင်ဘုန်းကြီးကျောင်းနားသို့ AA မှထိုးစစ်ဆင်တိုက်ခိုက်သဖြင့် တိုက်ပွဲပြင်းထန်နေကြောင်းဒေသခံသတင်းရင်းမြစ်တဦးက မဇ္စျိမကိုပြောသည်။
“အဲ့ဒီနား မိုင်းကွင်းတွေကို AA က ဘယ်လိုကျော်သွားလည်းမသိဘူး ထောက်ပို့တပ်ထိရောက်သွားပြီ စစ်တပ်မိသားစုက နပခထဲဝင်ပြေး ကားတွေနဲ့အကုန် နပခထဲဝင်ပြေးကုန်ပြီ၊ ဟိုနေ့က ပြောင်သေမှာ တိုက်ပွဲစတယ်။ ပြီးတော့လုံး၊ လုံးကနေ အခု ထောက်ပို့တပ်နားထိရောက်လာတာ၊ လုံးနဲ့ထောက်ပို့တပ်နားဆို တဖာလုံ ထက်မဝေးပါ “ဟု ၎င်းကပြောသည်။
ရက္ခိုင့်တပ်တော်(AA)မှ မတ်လ ၂၄ ရက်တွင် အမ်းမြို့အခြေစိုက် နပခမှသုံးမိုင်အကွာ ပြောင်သေကျေးရွာ၌ တိုက်ပွဲစတင်ဖော်ဆောင်ခဲ့၍ မတ်လ ၂၅ ရက်နှင့်၂၆ ရက်တွင် နပခနှင့်တမိုင်အကွာရှိ လုံးကျေးရွာသို့ဆက်လက်ထိုးစစ်ဆင်ခဲ့ရာ ယနေ့တွင် နပခနှင့် ငါးဖာလုံသာဝေးသည့် ထောက်ပို့တပ်အနီးသို့ ထိုးစစ်အရှိန်မြင့်တင်လာသည်ကို တွေ့ရကြောင်းဒေသခံများကဆိုသည်။
ထို့ကြောင့် AA ၏ထိုးစစ်သည် အနောက်ပိုင်းတိုင်းစစ်ဌာနချုပ်(နပခ)ကိုပစ်မှတ်ထားတိုက်ခိုက်ရန် တဖြည်းဖြည်းချဥ်းကပ်လာသည်ကို တွေ့ရပြီး ထောက်ပို့ တပ်မှာလည်း စခန်းဆုတ်ခွာပြေးမည့်အနေအထားကို တွေ့ရကြောင်း လုံးကျေးရွာခံများက ပြောသည်။
လက်ရှိတိုက်ပွဲအရှိန်ကြောင့် ထောက်ပို့တပ်အရှေ့တည့်တည့်ရှိ ချင်းကုန်းနှင့်လုံးကျေးရွာတို့မှ ဒေသခံအရပ်သား ၂၀၀ ခန့်မှာ ညောင်ဝိုင်းဘုန်းကြီးကျောင်းသို့ စစ်ဘေးရှောင်နေရကြောင်း သိရသည်။
အမ််းမြို့နယ်တိုက်ပွဲအတွင်း ယမန်နေ့အထိစစ်ကောင်စီတပ်သားအများအပြားသေဆုံးနေ၍ အလောင်းများတွေ့ရှိသော်လည်း တိုက်ပွဲဖြစ်နေဆဲအခြေအနေကြောင့် အအရေအတွက်အတိအကျကို မသိရကြောင်း ဒေသခံများကဆိုသည်။
စစ်ကောင်စီ၏ တိုက်ပွဲအတွင်း လေကြောင်းမှပစ်ခတ်တိုက်ခိုက်မှုကြောင့် အမ်းမြို့နယ် ပြောင်သေ၊ ဂယ်လောင်းနှင့်လုံး ကျေးရွာတို့တွင်နေအိမ် ငါးလုံးထက်မနည်း မီးလောင်ပျက်စီးကြောင်း သိရသည်။
အမ်းမြို့ရှိ နပခ လက်အောက်ခံ ခြေလျင်တပ်ရင်း(ခလရ-၃၇၂)၊ခလရ(၃၇၃)တပ်ရင်း နှစ်ရင်းလုံးကို ပြီးခဲ့သည့်အခေါက်က ရမ်းဗြဲမြို့သို့စစ်ကူပို့ခဲ့ရာ AA က ကြားဖြတ်ချေမှုန်းနိုင်ခဲ့သဖြင့် လက်ရှိအနေအထားအရ နပခလက်အောက်တွင် ခလရ(၃၇၁) တပ်ရင်းတခုနှင့် ကျန်တိုက်ခိုက်ရေးတပ်ဖွဲ့မဟုတ်သည့် လက်ရုံးတပ်အချို့သာ အမ်းမြို့တွင်ကျန်သည်ဟု သိရသည်။
ရခိုင်ပြည်နယ်အတွင်း ရက္ခိုင့်တပ်တော်(AA)က လေးလကျော်ကာလအတွင်း မြို့ကိုးမြို့သိမ်းပိုက်ထားနိုင်ရာမှ ယခုတောင်ပိုင်းရှိ အမ်းမြို့ကိုတိုက်ပွဲဦးတည်လာ၍ နှစ်ဘက်စစ်ရေးအရှိန်မှာ မြင့်တက်လျက်ရှိသည်။
စာတည်း – သန့်ဇော်(သန်လျင်)