ပုံအညွှန်း- AFP( ၂၀၂၃ ခုနှစ် နေပြည်တော် တပ်မတော်နေ့အခမ်းအနားချီတက်ပွဲမှ စစ်ကောင်စီတပ်သားများ)
ဓါတု
(မဇ္ဈိမ)။ ။ ရခိုင်ပြည်နယ်၊ အမ်းမြို့အခြေစိုက် အနောက်ပိုင်းတိုင်း စစ်ဌာနချုပ်ရုံး(နပခ)ရှိ စခန်းမှူးရုံးအပါအဝင် အမြောက်တပ်၊ စစ်ဆေးရုံနှင့် အဆင့်မြင့်ဆက်သွယ်ရေးတပ်ရင်းတို့ကို အာရက္ခတပ်တော် (AA) က ယမန်နေ့ (ဧပြီလ ၂၆ ရက်) နေ့ ည ၈ နာရီတွင် လက်နက်ကြီးများဖြင့်ပစ်ခတ်ခဲ့ကြောင်း စစ်ကောင်စီတပ်နှင့် နီးစပ်သော မဇ္ဈိမ၏ သတင်းရင်းမြစ်ထံက သိရသည်။
ယင်းသို့ပစ်ခတ်ရာတွင် ကျည်ကျရောက်သော အမ်းမြို့ပေါ်အမြောက်တပ်မှ စစ်ကောင်စီတပ်သား ငါးဦးသေဆုံးကြောင်း တပ်တွင်းနီးစပ်သည့်သတင်းရင်းမြစ်တဦးက မဇ္စျိမကိုပြောသည်။
” AA က ပစ်တာ ၁၂၀ မမ ဟောင်ဝှစ်ဇာနဲ့ ပစ်တာထင်တယ်။ မနေ့က နပခထဲက စခန်းရုံးနဲ့ဆက်သွယ်ရေးတပ် ထိပေမယ့် အသေးစိတ်အခြေအနေမသိရသေးဘူး။ စစ်ဆေးရုံနဲ့ စရဖ ရုံးကြားထဲ တလုံးကျတယ်၊ အဲ့ဒါကအထိအခိုက်မရှိဘူး။ အမြောက်တပ်က ငါးယောက်သေတာက သူတို့မိသားစုဝင်တွေဆီကနေ ဖုန်းဆက်တော့ ညတွင်းချင်းသိရတာ၊ တပ်သားပဲလား အရာရှိပါလားဆိုတာ စုံစမ်းဆဲပါ”ဟု ၎င်းကပြောသည်။
တပ်သားသေဆုံးမှုများကို အမ်းမြို့ရှိစစ်ကောင်စီတပ်အနေဖြင့် တတပ်နှင့်တတပ်် သတင်းမပေါက်ကြားစေရန် ဖုံးဖိထားခြင်းကြောင့် သေဆုံးသူများ၏ရာထူးအဆင့်များကို မသိရသးကြောင်း တပ်နှင့်နီးစပ်သော မဇ္ဈိမ၏ သတင်းရင်းမြစ်က ပြောသည်။
အဆိုပါထိခိုက်သေဆုံးမှုရှိသည့် အမြောက်တပ်သည် နပခနှင့် တမိုင် လေးဖာလုံအကွာတွင်တည်ရှိပြီး စစ်ကောင်စီ၏ ကဇူးကိုင်းတောဟိန်းတောင်ဗျူဟာကုန်းနှင့် ၁၅ မိုင်အကွာတွင် တည်ရှိသည်။
တိုက်ခိုက်ခံရသည့် စစ်ရေးပစ်မှတ်များအနက် နပခ စခန်းမှူးရုံးဆိုသည်မှာ တိုင်းမှူးရုံး၊ တိုင်းဦးစီးချုပ်ရုံး၊ ဦးစီးအရာရှိ (စစ်ရေး/စစ်ထောက်ဌာန)ရုံးများ လက်အောက် အဆင့်လေးဆင့်မြောက်ရှိ စခန်းရုံး၏အခွဲ ဖြစ်သည်။
ထို့အပြင် နောက်ထပ် စစ်ရေးပစ်မှတ်ဖြစ်သည့် အမှတ်(၈)အဆင့်မြင့်ဆက်သွယ်ရေးတပ်ရင်းသို့ လက်နက်ကြီးကျရောက်ပေါက်ကွဲမှုမှာ ယခုဆိုလျှင်နှစ်ကြိမ်မြောက် တိုက်ခိုက်ခံရခြင်းဖြစ်ပြီး ပထမအကြိမ်တိုက်ခိုက်ခံရမှုတွင် ဗိုလ်မှူးအဆင့်အရာရှိတဦး သေဆုံးသွားကြောင်းသိရသည်။
“ညက ၈ နာရီနဲ့ ၉ နာရီအထိ ပစ်တာကြားရတယ်။ ဒီနေ့တော့ပစ်သံမကြားဘူး။ နောက်ပြီး ကဇူးကိုင်းဘက်မှာလည်း တိုက်ပွဲဖြစ်နေတယ်”ဟု အမ်းမြို့ဒေသခံတဦးက ပြောသည်။
ပြီးခဲ့သည့် ဧပြီလ ၁၀ ရက်ကလည်း အာရက္ခတပ်တော် (AA)သည် စစ်ရေးပစ်မှတ်များဖြစ်သည့် အနောက်ပိုင်းတိုင်း စစ်ဌာနချုပ်ရုံး၊ အမှတ် (၈) အဆင့်မြင့်ဆက်သွယ်ရေးတပ်ရင်းနှင့် အမ်းမြို့နယ် မီးသတ်ဦးစီးဌာနရုံးတို့ကို လက်နက်ကြီးများဖြင့် ပစ်ခတ်တိုက်ခိုက်ခဲ့သေးသည်။
၂၀၂၃ ခုနှစ် နိုဝင်ဘာလ ၁၃ ရက်နေ့က စတင်ခဲ့သည့် ၁၀၂၇ စစ်ဆင်ရေးအတွင်း AA အနေဖြင့် ရခိုင်မြောက်ပိုင်းရှိ ပေါက်တော၊ ကျောက်တော်၊ မြောက်ဦး၊ ရမ်းဗြဲ၊ မင်းပြား၊ မြေပုံ၊ ပုဏ္ဏားကျွန်း၊ ရသေ့တောင်မြို့များနှင့် ရခိုင်ပြည်နယ်နှင့် ဆက်စပ်နေသော ချင်းပြည်နယ်တောင်ပိုင်းရှိ ပလက်ဝဒေတို့ကို သိမ်းပိုက်ထားသည်။
လတ်တလောအခြေအနေအရ ရခိုင်ပြည်နယ်ရှိ အမ်းမြို့အပါအဝင် သံတွဲမြို့၊ ဘူးသီးတောင်၊ မောင်တောမြို့တို့တွင် တိုက်ပွဲပြင်းထန်နေကြောင်း အာရက္ခတပ်တော်(AA)က ယမန်နေ့ကထုတ်ပြန်ထားသည်။
စာတည်း – သန့်ဇော်(သန်လျင်)
