By PKThawn
နယူးကာဆယ်ကွင်းလယ်ကစားသမား ဆန်ဒရို တိုနာလီကို လောင်းကစားကျူးလွန်မှုပေါင်း ၅၀ နဲ့ ဆက်နွှဲပြီး အင်္ဂလန်ဘောလုံးအဖွဲ့ချုပ်ရဲ့ စည်းမျဉ်းတွေကို ချိုးဖောက်မှုဖြင့် စွဲချက်တင်လိုက်ကြောင်း ဘောလုံးအဖွဲ့ချုပ်(FA)က ကြာသပတေးနေ့မှာ ထုတ်ပြန်ခဲ့ပါတယ်။
တိုနာလီရဲ့ FA စည်းမျဉ်း E8 ကို ချိုးဖောက်မှု စွပ်စွဲချက်ဟာ ၂၀၂၃ ဩဂုတ်လ ၁၂ ရက်ကနေ ၂၀၂၃ အောက်တိုဘာလ ၁၂ ရက်အတွင်းမှာ ဖြစ်ပွားခဲ့တယ်လို့ ဆိုပါတယ်။
အသက် ၂၃ နှစ် ကစားသမားဟာ ဒါကို တုံ့ပြန်ဖို့ ဧပြီလ ၅ ရက်အထိ အခွင့်ရှိနေပါတယ်။
တိုနာလီဟာ လောင်းကစားစည်းမျဉ်းတွေကို ချိုးဖောက်တဲ့အတွက် အီတလီအာဏာပိုင်တွေရဲ့ ၁၀ လကြာ ဘောလုံးကစားခွင့် ပိတ်ပင်မှုကို ကမ္ဘာ့ဘောလုံးအဖွဲ့ချုပ် (FIFA) က အတည်ပြုပြီးနောက် ကလပ်နဲ့ နိုင်ငံအသင်းအတွက် ရာသီကုန်အထိ လွဲချော်မယ်လို့ ပြီးခဲ့တဲ့နှစ် အောက်တိုဘာလမှာ ကြေညာခဲ့ပါတယ်။
သူဟာ ဂျာမနီမှာ ဇွန်လကနေ ဇူလိုင်လအထိ ကျင်းပမယ့် အီတလီရဲ့ ဥရောပချန်ပီယံရှစ်ဖလား ကာကွယ်မှုကို လွဲချော်မှာဖြစ်ပါတယ်။
အေစီမီလန်ကနေ နယူးကာဆယ်ကို ပေါင် ၅၅ သန်း (ဒေါ်လာ ၆၉ သန်း၊ ယူရို ၆၄ သန်း) ဖြင့် ဇူလိုင်လမှာ ပြောင်းရွှေ့ခဲ့တဲ့ သူ့ရဲ့ ကစားသမားဟာ လောင်းကစားစွဲလမ်းမှုရှိကြောင်း တိုနာလီရဲ့ အေးဂျင့်ဖြစ်သူက အရင်က ပြောခဲ့ဖူးပါတယ်။
အီတလီအာဏာပိုင်တွေနဲ့ အီတလီဘောလုံးအဖွဲ့ချုပ်တို့က တရားမဝင်လောင်းကစား ချိုးဖောက်မှုအတွက် စုံစမ်းမှုအပြီး အသနားခံညှိနှိုင်းမှုရရှိပြီးနောက် ၁၀ လ ကစားခွင့်ပိတ်ပင်မှုအပြင် တိုနာလီကို ဒဏ်ငွေ ယူရို ၂၀,၀၀၀ ဒဏ်ရိုက်ခဲ့ပြီး သူ့ရဲ့ပြဿနာတွေကို ဖြေရှင်းဖို့အတွက် ရှစ်လကြာ ကျန်းမာရေးကုထုံးခံယူဖို့ အမိန့်ပေးခဲ့ပါတယ်။
နယူးကာဆယ်က FA ရဲ့ ကြာသပတေးနေ့ ထုတ်ပြန်ချက်ကို တုံ့ပြန်တဲ့အနေဖြင့် “FA လောင်းကစားစည်းမျဉ်းတွေကို ချိုးဖောက်မှုစွပ်စွဲချက်နဲ့ စပ်လျဉ်းပြီး ဆန်ဒရို တိုနာလီ စွဲချက်တင်ခံရမှုကို သိမှတ်ထားကြောင်း ကြေညာချက်မှာ ပြောပါတယ်။
“သက်ဆိုင်ရာ စုံစမ်းစစ်ဆေးမှုတွေကို ဆန်ဒရိုအနေနဲ့ အပြည့်အဝ ဆက်လက် ပူးပေါင်းလုပ်ဆောင်နပြီး သူဟာ ကလပ်ရဲ့ အပြည့်အဝ ထောက်ခံမှုကို ဆက်လက် ရရှိထားပါတယ်။
“ဆန်ဒရိုနဲ့ နယူးကာဆယ်ယူနိုက်တက်တို့ဟာ ဆက်လက်လုပ်ဆောင်နေတဲ့ လုပ်ငန်းစဉ်တွေကြောင့် ဒီအချိန်မှာ နောက်ထပ် မှတ်ချက်တွေ ပေးလို့ မရသေး”ကြောင်း ကလပ်က ပြောပါတယ်။
(AFP)
