ပုံအညွှန်း- မိုင်းခွဲခံရမှုကြောင့် လမ်းဘေးချော်ကျသွားသည့် ရထားတွဲများ (ဓါတ်ပုံ- လူမှုကွန်ရက်/ ပေးပို့)
YT
(မဇ္ဈိမ)။ ။မွန်ပြည်နယ်၊ ပေါင်မြို့နယ်မှလာသည့် ကျောက်တင်ရထားတစင်း သထုံမြို့နယ်၊ သိမ်ဆိပ်ဘူတာ နှင့် ဒုံဝန်းဘူတာအကြားတွင် မိုင်းထောင်ဖောက်ခွဲခံလိုက်ရသဖြင့် လမ်းချော်သွားပြီး ရန်ကုန်-မော်လမြိုင် ရထားခရီးစဉ်များ ရပ်နားထားရကြောင်း ဒေသခံများထံမှ သိရသည်။
ယနေ့ (ဧပြီလ ၁၀ ရက်) နံနက် ၇ နာရီ ၁၅ မိနစ်ခန့်တွင် ပေါင်မြို့နယ်၊ ဇင်းကျိုက်ဘူတာမှလာသည့် အတွဲ ၂၀ ပါ ကျောက်တင်ရထားသည် သထုံမြို့နယ်၊ သိမ်ဆိပ်ဘူတာနှင့် ဒုံဝန်းဘူတာအကြားတွင် မိုင်းထိမှန်၍ ရထားတွဲအချို့ လမ်းချော်ပျက်စီးခဲ့ခြင်းဖြစ်သည်။
“အသံတော်တော်ကျယ်တာ အိမ်ပါတုန်တယ်။ ပေါက်ကွဲအားပြင်းတယ် သံလမ်းတွေပြတ်ပြီး လွင့်ထွက် ကုန်တယ်။ နန်းတောင်းရွာကြီးအနောက် ရထားလမ်းမှာ ဖြစ်တာပါ”ဟု ပေါက်ကွဲသည့်နေရာသို့သွား ရောက်ကြည့်ရှုခဲ့သည့် ဒေသခံတဦးက ပြောသည်။
အဆိုပါဖြစ်စဉ်အတွင်း စက်ခေါင်းတွဲအပါအဝင်တွဲလေးတွဲ လမ်းချော်ကာ ရထားလမ်းဘေးသို့ ထိုးကျသွား ခဲ့ပြီး သံလမ်းအချို့ ပျက်စီးသွားကြောင်း သိရသည်။
ကျောက်တင်ရထား မိုင်းခွဲခံရမှုကြောင့် ရန်ကုန်- မော်လမြိုင် ရထားခရီးစဉ်များရပ်နားထားကြောင်း သထုံ ဒေသခံကပြောသည်။
“ရန်ကုန်-မော်လမြိုင် ရထားတွေရပ်ထားတယ်။ တွဲတွေဆွဲတင်ရဦးမယ်လေ၊ လုံခြုံရေးက ချက်ချင်းမသွား ရဲဘူး။ ဘီးလင်းတံတားဖြစ်တုန်းက ချက်ချင်းသွားလို့ ဒရုန်းနဲ့ချခံရတာ သေကုန်တယ်”ဟု သထုံမြို့ခံတဦး ကပြောသည်။
ပြီးခဲ့သည့် မတ်လ ၁၈ ရက်နေ့ကလည်း သိမ်ဆိပ်ဘူတာနှင့် ဒုံဝန်းဘူတာအကြားတွင် ရထားလမ်း မိုင်းခွဲခံ ရမှုကြောင့် ကျောက်တင်ရထားတစင်း လမ်းချော်ပြီး ရထားသံလမ်းအချို့ ပျက်စီးခဲ့သည်။
ယင်းသို့ မိုင်းခွဲခံရမှုကြောင့် လုံခြုံရေးအရ ရန်ကုန်-မော်လမြိုင် ရထားခရီးစဉ်များကို မတ်လ ၂၄ ရက်နေ့ အထိ တပတ်ရပ်နားခဲ့ရကြောင်း ဒေသခံများနှင့် မော်လမြိုင်ဘူတာကြီး လူမှုကွန်ရက်စာမျက်နှာ၏ ထုတ် ပြန်ချက်အရ သိရသည်။
စာတည်း။ ။စောဖေ
