အာရက္ခတပ်တော်(AA) စစ်သည်အမျိူးသမီး
ဓါတု
(မဇ္ဈိမ)။ ။ ရခိုင်ပြည်နယ်၊ အနောက်ပိုင်းစစ်ဌာနချုပ်တည်ရှိရာ အမ်းမြို့နယ် ကဇူးကိုင်း တောဟိန်းတောင်ဗျူဟာကုန်းနှင့် ခလရ(၅၅)အခြေစိုက်သံတွဲမြို့နယ်တို့တွင် အာရက္ခတပ်တော်(AA)နှင့်စစ်ကောင်စီတပ် နှစ်ဘက်ထိတွေ့တိုက်ပွဲများ ပြင်းထန်နေကြောင်းသိရသည်။
အဆိုပါနယ်မြေများတွင် ယနေ့ (ဧပြီလ ၂၆ ရက်)နေ့လယ်အထိ တိုက်ပွဲများပြင်းထန်နေပြီး စစ်ကောင်စီတပ်မှ လေကြောင်းပစ်ကူဖြင့် ဆက်တိုက်ဗုံးကြဲတိုက်ခိုက်နေကြောင်း ဒေသခံများထံက သိရသည်။
ရခိုင်ပြည်နယ်တောင်ပိုင်းတွင် အဓိကကျသည့် နပခ နှင့် ၁၆ မိုင်အကွာရှိ ကဇူးကိုင်းတောဟိန်းတောင်သည် ရဟတ်ယာဥ်ကွင်းနှစ်ကွင်းပါရှိပြီး နပခကိုသိမ်းပိုက်နိုင်ရန် အဓိကအချက်အချာကျသည့် ဗျူဟာကုန်းဖြစ်သောကြောင့် စစ်ကောင်စီမှလက်မလွှတ်ရေးအတွက် လေကြောင်းပစ်ကူဖြင့်အပြင်းအထန်ခုခံနေကြောင်း AA နှင့် နီးစပ်သည့်သတင်းရင်းမြစ်တဦးက မဇ္စျိမကိုပြောသည်။
“တောဟိန်းတောင်က မနေ့ကပိုပြင်းထန်တယ်၊ ဒီနေ့လဲဖြစ်နေတုန်းပဲ။ အဲ့ဒီဗျူဟာကုန်းက ပလက်ဝက နုံဘူးတို့လိုမျိုး နပခအတွက်အရေးပါတဲ့အစိတ်အပိုင်းပေါ့ AA က တောဟိန်းတောင်ဗျူဟာရရင် နပခကို ရဖို့လွယ်သွားပြီ အဲ့ဒါကြောင့် စစ်ကောင်စီက ဗျူဟာကုန်းကျမှာစိုးရိမ်နေတာ”ဟု ၎င်းကဆိုသည်။
ယင်း တောဟိန်းတောင်ဗျူဟာကုန်းအား တကျော့ပြန်တိုက်ပွဲအတွင်း AA ကထိုးစစ်ဆင်ခဲ့သည်မှာ တတိယအကြိမ်မြောက်ဖြစ်ပြီး ယခုအကြိမ်သည် ယခင်ထက် တိုက်ပွဲပိုမိုပြင်းထန်နေကြောင်း သိရသည်။
အာရက္ခတပ်တော်(AA)
ထို့အပြင် တိုက်ပွဲဖြစ်ပွားနေသည့် ခြေလျင်တပ်ရင်း ခလရ(၅၅)အခြေစိုက် သံတွဲမြို့နယ်တွင်လည်း တိုက်ပွဲများပြင်းထန်နေပြီး စစ်ကောင်စီတပ်သားအလောင်းအများအပြားတွေ့ရကြောင်း ဒေသခံသတင်းအရင်းမြစ်တဦးကမဇ္စျိမကိုပြောသည်။
“မနေ့က ပုရစ်နဲ့ရေကောက်ရွာအစပ် ဘုန်းကြီးကျောင်းနားမှာ စစ်ကောင်စီအလောင်းတွေအရမ်းများတယ်၊ ပြည်သူ့စစ်(ပျူစောထီးလက်နက်ကိုင်)တွေက အလောင်းသွားကောက်ရတယ်၊ တချို့အလောင်းတွေဆို ကောက်မရဘူးပုပ်ပွနေတာ”ဟု ၎င်းကပြောသည်။
သေဆုံးမှုအတိအကျကိုမူ မဇ္ဈိမမှ ဆက်လက်စုံစမ်းနေဆဲဖြစ်သည်။
တောင်ကုတ်ဘက်သွားသည့် သံတွဲ-တောင်ကုတ်ကားလမ်းတကြောရှိ သံတွဲမြို့မှ ၁၈ မိုင်အကွာရှိ ဒေါ်မြရွာ၊ ရွှေလှေရွာ၊ ပုရစ်ရွာနှင့် ရေကောက်ကျေးရွာတို့တွင် ဧပြီလ ၂၂ ရက်မှစ၍ တိုက်ပွဲများဖြစ်ပွားခဲ့ရာ ယမန်နေ့နှင့် ယနေ့တွင်တိုက်ပွဲအရှိန် ပိုမိုပြင်းထန်နေကြောင်းသိရသည်။ ယင်းသံတွဲမြို့နယ်တွင် စစ်ကောင်စီတပ်မှ ကြည်း၊ ရေ၊ လေ မှ တိုက်ခိုက်နေခြင်းဖြစ်ကြောင်းသိရသည်။
အဆိုပါထိစပ်နေသော ရွာပေါင်း လေးရွာမှ ဒေသခံ ဦးရေ ၄၀၀ ဝန်းကျင်မှာ ဘေးလွတ်ရာနီးစပ်သည့်ကျေးရွာများသို့ ထွက်ပြေးတိမ်းရှောင်နေရကြောင်းသိရသည်။
ယင်း သံတွဲမြို့တွင် ထိတွေ့တိုက်ပွဲမဖြစ်မီ ပြီးခဲ့သည့် ဖေဖော်ဝါရီလနှင့်မတ်လတို့တွင် အတင်းအကျပ်စစ်မှုထမ်းစေရန် အရပ်သားအများစုကို ခေါ်ဆောင်ခဲ့ပြီး ခလရ(၅၅)တပ်မှ စစ်သင်တန်းပေးခဲ့ကြောင်း ဒေသခံများထံသိရသည်။
ရခိုင်ပြည်နယ်မြောက်ပိုင်းရှိ မောင်တောနှင့် ဘူးသီးတောင်မြို့များတွင်လည်း တိုက်ပွဲများဖြစ်ပွားနေသည်ဟု သတင်းများထွက်ရှိနေသော်လည်း မဇ္စျိမဘက်မှ ဆက်သွယ်နေရာ ဖုန်းလိုင်းအခက်အခဲကြောင့် ဒေသခံများနှင့်ချိတ်ဆက်မရသေးပေ။
အာရက္ခတပ်တော်(AA)မှ မြို့ကိုးမြို့ သိမ်းပိုက်ထားနိုင်ပြီး ရခိုင်တောင်ဘက်ပိုင်းရှိ အမ်းမြို့နှင့်သံတွဲတို့တွင် ထိုးစစ်အရှိန် စိမ့်ဝင်ထိုးဖောက်နေပြီဖြစ်သည်။
ရခိုင်ပြည်နယ် တောင်ပိုင်းတွင် တောင်ကုတ်၊ သံတွဲ၊ ကျောက်ဖြူ၊ အမ်းတို့၌ စစ်ကောင်စီ၏ စစ်ဆင်ရေးကွပ်ကဲမှုဌာနချုပ်(စကခ – ၅) လက်အောက်ခံ ခြေမြန်တပ်ရင်း ၁၀ ရင်းနှင့် နပခ လက်အောက်ခံ ခြေလျင်တပ်ရင်းများအပါ အဝင် တပ်ရင်းစုစုပေါင်း ၁၂ ရင်း ရှိသည်။
စာတည်း – သန့်ဇော်(သန်လျင်)
